Homily for Thursday (22.9.2022)

Homily for Thursday (22.9.2022)
               Thuthangtha a rak ngaitu nan zate parah Bawipai pekmi hnangam daihnak a thar in thleng hram seh tiah hmaisabik ah thlaza cam phah in cibai ka run lo buk hrih hai a si. Tuini tiang khuavang canthi in hmu tertu Pathian hnenah lungawi thu sim tlang hrih ding khal ka sawm aw duh a si.
Vansiat malmakanak le beidonnak a phunphun tong hman nungla, Bawipai thluasuah a siar thiamtui’ hrang ahcun cuvek lak khalah lungawinak cu a um ringring thei thotho timi cu zumtu tampi ih an tontehmi thil khal a si. Curuangah nitin kan nun ih kan hmuhton mi lakih a telcih theumi hmuh theih le hmuh theihlo thluasuah pawl asiar thiamtu si ding khal kan zuam cio pei.
              Tuini a veikhatnak ih kan siarmi Thusimtu 1:2-11 sung kan zoh a sile, leilung tlun ah hin zianghman tlaihsan tlak thil an um lo zia le, thil hmuahhmuah hi zianghmanlo an si zia thusimtupa hnen ihsin kan thei. Thusimtu ih nganmi pawl kan zoh tikah, minung hi nunman neilo, hnatha tuanmi khal tankainak neilo vek khop in a ngan ih beidongnak lam ih mi hruai duh vek tla a bang. Hmansehla, a ca nganmi a net lam kan vun siar tikah, beidong in zianghman tuan loih um ding tha a pek lam si loin, minung ih nunman kan neihnak cu Pathian kan tihzahnak le a thu kan thlunnak ah a thumaw mi a si sawn timi nun in zirh duhmi a si. Pathian ziangah rel loin kan duhduh ih a daan kan buar men a si ahcun nunman neilo kan si ding tinak a si cu. Kan Bawipa Jesuh Khrih cun, “Mi pakhat in leilung pumpuluk co hmansehla amah ih nunnak a sun ahcun
ziangso a thahnem? Zianghman a thahnem lo” tiah Mk 8:36 sungah fiang zetin in sim. Nang le kei teh leilung tlun hrang lawngah kan nunnak kan hmang pang maw?
             Tuini Gospel ih kan siarmi Lk 9:7-9 sungah leilung tlun hrang lawng a ruattu Siangpahrang Herod thuhla kan thei. Jesuh Khrih ih thuhla a theih tikah awloksong anhai in a um ih, ton ngah a duh nasa ti a si. Asinain, Jesuh Khrih ton a duhmi hi thinlung thiang teih tong duh cu a si lo, huham nei zetin thil maksak a tuah theitu a si tikah a bawi tohkham long tu ding a si pang pei maw ti’n thlaphannak thawn thah duhnak thinlung a neih ruangah ton a duh mi a si.Culawng si loin, a lu a rak tan termi mawhnak neilo miding Johan Baptista a nungsal a si pei maw timi ruahnak a neih ruang khalah thlaphang ih a umnak a si. Johan Baptista hi miding a si ti khal a rak thei ko nan, amaih thatlonak phuang in nun thleng ding rak simtu a si ruangah thawng a rak thlak mi khal a si.                                                                                                                                                                                                                                                 Hipa a thah ruangah zalen zet le hnangam te’n a um thei thlang ding hmang ti’n a ruat men thei nan, Jesuh Khrih ih thuhla a theih ruang men ih thlaphang le awloksong ih a umnak hin, a thinlung muril sungah hnangamnak a umlo zia a lang ter.Herod ih nun in, kan zate ih nun khal a khihhmuh a si. Kanmaih nun nuamnak dingah mi parah thatlonak kan va tuah tin te’n kanmah sawn tihphannak thawn kan khat theu a si ko lo maw? Mawhnak zianghman neilomi pawl parah thil thalo thleng dingih kan rak phiar ngah pang, a silole, a diklo zawngin an hmin kan thangsiat pang ti ek can ah, anmah thawnhmaiton hmuhawk ding hi kan huphurh zet ko lo maw? thatlonak kan tuahmi in thei pang pei maw ti’n thlaphang le phuhrungaw in kan um theu si lo maw? Herod ih ton rero mi khal cuciah hi a si. Herod hi a sunnak bik pakhat cu Jesuh Khrih hi a bawi tohkham long duh tu si loin, a phuhrungawknak, a
thlaphannak le a sualnak hmuahhmuah ihsin luat ter duh tu a si timi a rak theihfiang ngah lo mi hi a si. Nang le kei teh phuhrungaw le thlaphang in kan um pang maw? Phuhruangawknak ihsin luat kan duh taktak a siahcun himi hi kan tuah tengteng a tul: Minung parih thatlonak kan tuah ruangah si maw, asilole, a si lo zawngih kan thangsiat ruangih an mithmai zoh ngamlo le phuhrungaw ih kan um a si ahcun, an theih ah siseh, theihlo ah siseh, tha te’n sim in ngaithiam dil ngam hi a thupi tuk. Hiti ih ngaithiam kan dil hlan sung cu an hmai ahcun kan phuhrung aw ringring ding si mai.
             Pathian le kanmah karlak khal cuti thotho a si. Pathian hmai ah kan sualnak a tam tuk timi kan theihawk keukeu can ah Pathian kan hmaisong tuk ih phuhrungawk tuknak ruangah thlacam zuam lo le, amah biak dingin biakinn ih pumkhawmnak lam khal ah tel zuam lo in kan um ih cuti’n sualnak sungah kan cencilh aw lan ta theu. Hiti vek ih kan um sung cu kan thinlung muril sungah hnangamnak le nuamnak taktak a um thei lo. Himi ihsin luat thei dingcun, Pathian zangfahnak rinsan in sualsirnak thawn amah kan pan le ngaithiam kan dil tengteng a tul ve.
Phuhrungawknak le thlaphannak ihsin luat thei dingah ngaithiam dil ngam tu si kan zuam cio pei.

 

Add new comment

11 + 0 =