Homily for Tuesday (20.9.2022)

Homily for Tuesday (20.9.2022)
              Bawipai pekmi hnangam daihnak cu thuthangtha a rak ngaitu nan zate parah a thar in thleng hram seh ti’n thlaza cam phah in cibai ka run lo buk hai a si. Tihnung za le rap thlak emem mi thuthang tampi lakah amaih thuthangtha ngai thei dingin khua in khan sak
ringring tu kan biak Pathian hnenah lungawithu sim phah in thangthat cio ding khal ka run lo sawm duh hai a si. Tuini hrangih kan Gospel siar dingmi hi a tawi pam ih a zate’n ka run lo siar sak ta ding: Jesuh ih nu le a nau pawl kha a hnenah an ra, asinain mi an tam tuk ruangah an tong thei lo. Mi pakhat in Jesuh hnenah, “Na nu le na naule pawl lenglam ah an ding ih an lo tong duh,” tiah a ti. Jesuh in mipi hnenah, “Ka nu le ka naule pawl cu Pathian thu a thei ih a thluntu pawl an si,” tiah a ti. Luka 8:19-21 Bawi Khrih ah duhdawtmi u le nau pawl, tuih kan run siarmi Cathianghlim hi tha te’n kan ruat tlang hnik pei.
             Kan Bawipa Jesuh Khrih ih background kan zoh a sile, Judah miphun sungtel a si vekin, innsang le sungkhat unau sunsak zetmi miphun ihsin rami a si. Unau sungkhat an sunsak awk tuk ruangah kanmah laimi pawl vekincousins kan timi pawl khal unau ti’n an cohlang aw. Cumi ruangah Mary le Joseph in Jesuh Khrih lo fate dang an nei lo nan, Bible ngantu pawl in a cousins pawl thuhla an ngan tikah a unau pawl ti’n an tarlang. Tuini ih kansiarmi sung khalah a nu le a nau le pawl ti’n kan hmu thei. Kan Bible in Jesuh Khrih ih unau pawl a ti tikah nu-khat pa-khat sungsuak unau si loin cousins unau pawl a ti duh mi a si sawn timi thu hi Bible hrilfiahnak dangdang thawn kan run sim theu zo ruangah tui tum ahcun himi thuhla cu cepniar in kan run rel duh lo ding. Hi tluk in unau sungkhat a sunsak mi miburpi hnenih thu a zirh rero lai ah a nu le a nau le pawl in an tong duh ti a si. Cumi an vung sim tikah, misenpi cun, a nu le a nau le pawl a tong ta ko ding ti’n an ruat cio ko ding.
             Hmansehla, anih cun “ka nu le ka nau le cu Pathian thu a thei ih a thluntu pawl an si” a rak ti top.Himi tongkam an theih tikah minung tampi cun, innsang le unau pawl ziangah a rel lo a si hi ti’n amah Jesuh Khrih mawhphurh duh tla an rak um men thei. Khat lei lamah, a nu le a nau le pawl a rak hnihsan tu tla an um men ding. Hmansehla, Jesuh Khrih ih tongkam kan zoh tikah, ‘annih cu ka nu le ka nau le an si lo’ ti lam zawngih sim a si lo zia kan hmu thei ko. Curuangah a nu le a nau le pawl hrangih zomtaihnak tongkam khal a si lo lawlaw. Jesuh Khrih ih a sim duh ngaingai mi cu, lei tisa lam zawngih pehtlaih awknak hnakin Pathian ih thu kan thei ih kan thlun nak thawngih pehtlaih awknak a thupi sawn timi a si. Thuthangtha ruangih kan pehtlaih awknak hi a rak sunglawi tak em…..
           Jesuh Khrih ih tongkam ruangah a sungkhat unau le a miphunpi hrekkhat pawl cu an tha a sia tla si thei men; asinan, innsang tanta rori ih a dung a thluntu pawl hrang ahcun ziangtluk thazang ngahnak tongkam tha so a si ding! Tuini ah thuthangtha ruangah nang le kei tla Jesuh Khrih ih innsang sungtel kan si thei ve mi hi vun ruatsal in lungawi thu kan sim pei uh. Khat lei lamah, thuthangtha ruangih kan unau a si vemi pawl ziangih kan rellonak pawl hrangah ngaithiam tla kan dil tlang pei.Cun, tuini Cathianghlim ih in zirhmi a dang pakhat cu, Jesuh Khrih ih nun a si. A nu le a nau le pawl buaipi
ding hnakin mipi a buaipi sawn. Ziangruangah tile, anmah hnakin mipi in an tul sawn zia a hmufiang.
           A cancan ah, innsang lam buaipi man lo ding khop in misenpi ih in tul can a um phah ding. Cuvek can ih mipi rian ding kan hril sawn tikah kan innsang kan phatsan cu a si cuanglo. Mipi hrangah kan innsang hrangih kan buai tulmi kan sacrifice sawn a si. India ram zalennak rak laksak tu Mahatma Gandhi ih nun kan zoh khal a sile, a ram mipi hrangih a buainak ruangah a innsang le sungkhat unau pawl tha te’n a buaipi man lo thu kan thei. Thuthangtha ruangah innsang, sungkhat unau le rualpi pawl tanta in pum a petu khal minung tampi an um ve ko. Nang le kei teh, kan fimthiamnak le kan thazang pawl mipi ih in tul can ih hmang ve dingah kan man zo maw?

Add new comment

4 + 8 =