"Hremtu ral phunthum"

Thuthangtha sim tu Rev. Fr. Joseph Ro Nei Thang

July 9, 2021

Siarding: Gn 46: 1-7. 28-30/ Ps 37:3-4. 18-19, 27-28. 39-40(39)/ Mt 10: 16-23

            Leitlun hmun tinkip ihsin RVA Falam Chin Service ah thlarau a zawh ringring tu Bawipa Jesuh Khrih ah duhdawt zetmi nu le pa, u le nau pawl, “kan Bawipa Jesuh Khrih ih zaangfah lainatnak, Pa Pathian ih duhdawtnak le Thlarau Thianghlim ih pumkhat sinak cu nan zate thawn um sehlaw” tiah cibai ka run lo buk. Tuihni cu 2021, July thla ni 9, kumkhat sungih caankeel kaar 14 nak, Tlawngkai 5 ni asi. Tuihni kan siar dingmi Pathian ih ttongkam pawl cu Semtirnak 46:1-7, 28-30 tiang; Psalm ahcun 37:3-4, 18-19, 27-28, 39-40 tiang, Psalm a sawnnak ahcun:- Miding pawlih rundamnak cu Bawipa hnenin a ra” tiah asi. Thuthang ttha ahun Matthew 10:16-23 tiang asi pei. Tuihni ih Kan ruah khawm tlang dingmi cu “Hremtu ral phun thum” tiah asi pei.

            Tuihni kan siarmi Thuthang ttha hi siar sal uhsi. Mt 10:16-23 ah Bawipa Jesuh in a Tirhthlah 12 hnenah “Ngai uh! Cinghnia hraang rual lakih tuu bangin ka lo thlah. Curuangah rul vekin fimkhur uhla thuro vekin nan nun neem uh. Ralring uh, ziangahtile nanmah a lo kaitu dingah mi an suak ding; zung ah an lo thlenpi dingih sinakok ah an lo vuak ding. Keimah ruangah uktu le siangpahrang pawl hmai-ah an lo thlenpi dingih anmah le Gentile mi pawl hnenah ka thu thantertu nan si ding. Thu tthennak hmunah thlenpi nan si tikah ziangso ka sim ding ti le ziangtinso ka sim ding tiin nan donhar hlah uh. A tikcu a kim tikah nan sim dingmi cu theiter nan si leh ding. Ziangahtile a ttongtu ding cu nanmah si lo in, nan sungih a ttongtu cu nan Pa ih Thlarau ttongkam asi ding. Mi in anmahih unau lala kha thah dingah midang kutah an thlengter ding. Pale pawl khalin an fate thlunah cubangtuk tthiamtthiamin an tuah ding. Fale pawl khalin an pa le pawl an ral dingih midang kutah an thlen ding. Keimah ruangah mikip in an lo hua ding. Sikhalsehla a net tiangin a tuar theitu cu runsuak ansi ding. Khua pakhat ah an lo hrem asile khuadang ah va tlan uh. Fiangtein ka lo sim: Mifapa a ra thlen hlanah Israel ram sungih khua hmuahhmuah hi nan tlawng ttheh man lo ding” tiah a cah asi ti thu asi.  

            A tuih kan siarmi Bawipa ih thuthang ttha ihsin thu tampi kan ruat khawm tlang thei. Tuihni ih kan siarmi Bawipa ih thuthang ttha ahhin Bawipa Jesuh in a Tirthlah pawl hnenah “Ngai uh! Cinghnia hrang rual lakih tuu bangin ka lo thlah. Curuang ah rul vekin fimkhur uhla thuro vekin nan nun neem uh” tiah a cah asi. An fehnak ding hmun ahhin anmah dodaltu hi an tam ding, an thusimmi hi ziangsiarlo in an um ding tiah a cah. Cun Bawipa Jesuh in a dungthluntu pawl hnenah cutin cinghnia hrang lakah a run thlah tikah hremtu ral phun thum thu tla a sim cia hai asi. 1). Ram uktu pawlih hremnak asi. Bawipa Jesuh in “Keimah ruangah uktu le siangpahrang pawl hmai-ah an lo thlenpi dingih anmah le Gentile mi pawl hnenah ka thu thantertu nan si ding” tiah Bawipa nih a cah cia ta. 2) Biaknak hruaitu pawlih hremnak asi. Biaknak lamih hruaitu pawlin Tirthlah pawl an hrem ding thu tla cu Bawipa Jesuh in “Ralring uh, ziangahtile nanmah a lo kaitu dingah mi an suak ding; zung ah an lo thlenpi dingih sinakok ah an lo vuak ding” tiah a kam cia asi. Sinakok ah a cancan ah biaknak lamih thurel catnak ah an hmang ttheunak hmun asi. Cumi biaknak thurelnak hmunah vuak an tong ding tiah Bawipa in a cah cia. 3) Mah innsungsang ih hrem awknak asi. Midang ih hrem silo in Bawipa Jesuh le a thuthang ttha ruangah inn sungsang ah remlonak le buainak a um tengteng ding tiah Bawipa in a sim. Bawipa Jesuh in “Mi in anmah ih unau lala kha thah dingah midang kut ah an thlengter ding. Pa le pawl khalin an fa te tlunah cubangtuk tthiamtthiamin an tuah ding. Fa le pawl khalin an pa le pawl an ral dingih midang kutah an thlen ding. Keimah ruangah mikip in an lo hua ding” tiah a cah cia asi.

            Bawipa Jesuh in a Tirthlah pawl a thlah tikah Thlarau Thianghlim in a umpi ringring ding thu tla a kam cia asi. Hremnak phun thum in an buaipi ding nain cumi cu thusimnak le tettikhaannak hrang caan ttha asi ding tiah a cah cia. Uktu pawlin zungah an thlenpi can ah siseh, Biaknak lamih thutthennak zung asimi sinakok ah an thlenpi caan ah siseh Thlarau Thianghlim in a umpi ding ruangah “Ziangtin sawn ding le ziangmi sim ding” tiah donharnak a umlo dingin Bawipa in a sim cia. Curuangah Bawipa Jesuh in “Thu tthennak hmunah thlenpi nan si tikah ziangso ka sim ding ti le ziangtinso ka sim ding tiin nan donhar hlah uh. A tikcu a kim tikah nan sim dingmi cu theiter nan si leh ding. Ziangahtile a ttongtu ding cu nanmah nan si lo, nan sungih a ttongtu nan Pa ih Thlarau ttongkam asi ding” tiah a cah cia. U le nau pawl, Bawipa Jesuh in a dungthluntu pawl a umpi dah vekin a dunghtluntu pawlih zirhmi a zumtu a Kohhran member pawl hrangah thla a cam sakih san cem tiangin a umpi lai ding asi. 

            U le nau pawl, Jesuh Bawipa in a Tirhthlah pawl hi amah tlawng ding hmun le khua ah a thlah sungih an hnenah hremtu ral phun thum um dingin a cah dah vekin a tu ah tla Jesuh Khrih ih Kohhran hrangah kan ton ttulmi le kan do ttulmi ral phun thum a um asi tiah a pumtthen asimi a Kohhran nih in zirh asi. Zumtu kan si tikah ral phunthum kan nei asi. Cumi pawl cu leitlun ral, Satan ral le thi le sa ral tla ansi. Ral pawl kan neh theinak dingah Bawipa hnenah thazaang dil cio uhsi. Tukforhnak kan tuar caan ah tukforhnak hmuahhmuah a nehtu Bawipa Jesuh kha va pan cio uhsi. Tukforhnak hi ‘aw men’ ding kan silo. ‘Voikhat voihnih te asi pam’ tiah oltein a khuan pek hlah uhsi. Ziangahtile 1Peter 5:8 ah Peter in ‘nan ral Satan cu a huk celcelmi kiosa bangin a ra dingih ralring tein nan umlo ahcun a lo deh thluh dingah a bawh ringring asi tiah zumtu pawl hi ralrinnak ca a kuat asi. Tuihni kan siarmi Bawipa Jesuh Khrih ttongkam rengreng ah “Sikhalsehla a net tiangin a tuar theitu cu runsuak ansi ding” tiah Mt 10:22 ah in sim asi. Tukforhnak a phunphun hi a net tiangin neh theitu, raldonak ah a net tiangin do in ttang thei tu rak si hram uhsi. Cutin kan tuar thei ttuntto asile runsuakmi kan si ding asi.

            A ngaitu u le nau nan zate parah mizaangfah theitu Bawipa in thluasuah lo pe ringring hram seh, lo kilveng ringring hram seh catlovin. Amen.