In humhimtu Jesuh (Rev. Fr. Lucas Tha Ling Sum) June 30, 2021

In humhimtu Jesuh

Thuthangtha sim tu Rev. Fr. Lucas Tha Ling Sum

June 30, 2021

Siarding: Seem 21: 5, 8-20; Saam 34: 7-8, 10-13 (7); Mt 8: 28-34.

            Bawi Khrih ah duhdawtmi u le nau, nan zaten, RVA ihsin kan lo hmuak a si. Pathian in a thar in thlawsuah lo pe hram seh.  Tui tlawngkai ni thum, June 30 sun ih kan siar mi Baibal thutthangtha Mt 8:28-34 sung ta thawn pehpar aw in “In Humhim Tu Jesuh” timi thu ka lo hlawm ding a si. Hmaisa ah Baibal kan ngai ta pei. Mt 8:28-34.

            “Jesuh cu tili khat lam ral Gadara an timi ramah a thleng ih cutawkih thlan lungkua sung ihsin a ra suak mi minung pahnih in an ra tong. Himi pahnih cu khawsia polh mi an si ih ttihnung ngaingai an si ruangah cuih lamzin cu zohman in an zawh ngam lo. Hmakhat teah an au ih, ‘Maw Pathian Fapa, nang le kannih ziangso kan seng aw? A tik cu a kim hlanah kanmah hrem dingah maw na rat?, tiah an ti.

Cutawk ihsin hla nawn ah rawl a ei reromi vokrual an um. Khawsia pawl in Jesuh cu an dil ih, In dawisuak ding a si ahcun khitawk ih vok pawl sungah khin in lutter aw, an ti.

Jesuh cun, va lut uh, tiah a ti. Khawsia pawl cu cuih mi pahnih sungin an suak ih vok pawl sungah an va lut. Vokrual cu cutawk kham hrap ihsin an dawp ciamco ih tili sungah an tlathat ttheh. 

Vok kil tu pawl cu khuasung ah an vung tlan ih cuih thuhla pawl le khawsia polhmi pahnih parih thilcang mi pawl cu kim tein an sim ttheh. Curuangah khawsung mi hmuahhmuah cu Jesuh tong dingah an feh, Jesuh an hmuh tikah an ram ihsin hmundang ih feh dingah zangfah an dil.” Himi cu Pathian ih ttongkam a si. Bawi Jesuh Khrih hnenah thangtthatnak um ko seh.

            Zumtu u le nau, mitu ih kan thei vek in Jesuh in khuavang ih polh mi, minung pahnih a dam ter a si. Hi khuavang ih polh mi pahnih ih Bawi Jesuh an hmuh veten, an thinphang in hi tin an ti: ‘Maw Pathian Fapa, nang le kannih ziangso kan seng aw? A tik cu a kim hlanah kanmah hrem dingah maw na rat?, tiah an ti. Jesuh cu an tthih na sa. Bawi Jesuh ih zianghman a leh man hlan ah an mah ten, “in dawisuak ding a si ahcun khitawk ih vok pawl sungah khin in lutter aw,” tiah an dil. 

            Jesuh in va lut uh, a ti. Khuasia pawl cu vok sungah an lut ih cuivok pawl cu khamhrap ihsin an dawp ciamco ih tili sungah a tlathat ttheh, a ti. Isarel pawl thuanthu kan zoh asilen vok hi Isarel pawl hrangah cun a thianghlim lo mi le hnih suak za ran nung an si, timi kan hmuh.

            Zumtu u le nau, tuittum ah khuavang pawl in lungkim mi, thil pahnih an nei: (1)nak cu Bawi Jesuh cu Pathian ih Fapa a si, timi a si. Cun (2)nak cu vok pawl cu an mah vek ih thianghlim lo mi an si, timi a si.

            Thuthangttha ngai tu u le nau, kan nih khal a caancaan ahcun mi thu ih kan theih bangin khuavang ih polh mi kan si pang ttheu. Ttongdangih kan sim asilen kan thinlung sungah khuavang a lut pang ttheu a si. Sihmansehla kan hrangih thuthangttha cu Bawi Jesuh in kan sungih a um tu setan dawi suak dingin kan hnenah a ra ringring timi a si. Ziangruangah tilen kanmah ten kan dawi suak thei lo. Jesuh ih huham le cahnak thawn lawng in kan sungih a um mi setan cu kan dawi suak thei ding a si. Cutin asilen ziang kan tuah a ttul? Ahleice in, 

1.  tangdor nak thawn kan sual sir ih kan nuncan ziaza thleng a ttul. 

2.  Bawi Jesuh ih Thi le Sa kan ei a ttul a si. Cun

3.  cat lo ih thla kan cam a ttul a si.

            Thuthangttha ngai tu nan zaten, Pathian in khuavang kut sung ihsin siseh, tthat lonak a phunphun ihsin siseh, kumkhua in, lo humhim hram seh. Amen.