Innsang cu Pathian Kohhran/Pawlpi

Rev. Fr. Polycarp Thawngte ih Thuthangtha sim mi (Holy Family Puai ni) (December29, 2019 - Zarhpi Ni)

Nazareth Innsang (Thianghlim Innsang) upatnak le hngilhlonak puaipi

Nazareth khua ih Thianghlim innsang, kan innsang cio hi thlacam tlangnak le thudik zir tlangnak, khat le khat somdawl aw ih humhim awknak hmun ron si ter hram aw.

Thianghlim Innsang (Holy Family) Puai (Year–A)            

Siarding: Sir 3:2-6,12-14; Col 3:12-21; Mt 2:13-15,19-23

          Tui ni cu Nazareth Innsang (Thianghlim Innsang) upatnak le hngilhlonak puaipi kan tuah bangin kan Thuthangtha sungah mithianghlim Joseph in an fapa humhim dingin vancungmi ih thupeknak hmuahhmuah thlun ih a nufa a tlaanpi le a vahpi rero thu kan thei a si. Hi thu thawn milh aw dingin innsang/innsungsang timi hi Zotung tong von sang duak tahrat in ron lo relpi ka duh ta. Ziangahtile Falam tongih innsang timi tongfang hi fangkhat ciar ih von then tikah a duhsan ka thei deuh lo, a sullam ka tong thei lo. Zotung tong in cun Inn-byng tiih kawh a si ih a tongfang pakhat cio khal in sullam/duhsan nei zet ih ka hmuh mi a si. Inn ticu inn a si ko ih 'Byng' timi cu cuam a si. Cuam timi cu Laimi pawl in kan rawl retnak, Lairawl (fang, vainim, bete, busul, tvk) pawl a kumkum rori ih him zetih kan khawl nak, kan rawl humhim nak thabik a si. Curuangah innsang timi innbyng cu sungkua umkhawm men kha si lo'n kan humhim awknak hmun, kan himnak hmun, kan beunak hmun thabik a si. Nu-pa la te lawng kan si khal le a thupi bik in cun nupa sualnak lam Satan siatsuah nak ihsin in kilhim tu, khat le khat sambaunak ih somdawl aw dingih thanaunak le thincemnak siatral nak sungin kan luat nak dingin in humhim tu ding a si. Farual cawi innsang tlaih cun nu le pa in fa le pawl in hum him ih, fa le pawl khal in nu le pai hmai belmang maan kan timi: mithmai siatnak, thangsiatnak tivek pawl in kan nu le kan pa pawl kan humhim thei lawngah innsang nuam, innsang tha, Khristian innsang puitling, Nazareth-Innsang Thianghlim nun zirtu kan si thei ding.

          Brother bawah, keimai ti daan te cun kan tlangval lai ah Tthal tlawngpit sung le Falam ah nauhak pawl Pathian thuzirhnak thawn Biakinn ah kan rak fimkhawm ih kan rak kil khawi theu. Nikhat cu sun rawl ei kan cawlh lai fangah Biakinn Khawnglawng tum, Darkhing awn veikhat te ka thei ih mithi a um maw a si ding tin lungphang nawn in ka va zoh. Darkhing tumtu le ka hmu si lo tikah nauhak pawl in an lek si ding ti ka thei cih ih zosi huatsuak ka ti tikah nauhak pawlin 'kannih kan si lo a leengin lut mi nauhak pahnih te si' in ti. Cuih nauhak pahnih te cu ziang ruangah Pathian thu zir lo in hiti vek in nan vak men ka tiih kan Biakinn ah thuzirnak a um lo in ti. Silole innlam ah nu le pa nan nei lo maw; hnatuan bom tla an ttul lo maw; nan nu le pa in nun an lo zirh lo maw, mi Biakinn lam tiang huatsuak ih nan vah rero men ti tiangih nun ka sim laiah pakhat sawn in zamrang ten i son vukvi ih ka awlok i ti song ko lo maw. Ziang a ti tile: 'ka pa zuu a rii ih inn ah ka um thei lo ruangah ka vak' ti si. Cutikah 'na pa zo a si' tin ka sut bet ih a pai hmin i sim cun Tum Thelh Thang ih 'a netnak ah bop kheuh in ka vai' a ti bangin ka bop kheu in ningzak in ka vai. A pa cu ka pupa a rak si cu. Aiaw, ka thin aw! A hmin cu ka rel lemlo ding Falam um rei pawlin an thei thluh pang ding. Far Men Par hla ka von mang bet lala: 'Saancop tuukhal pawlin an khal maw Bawipai tuu: 'a na, a na, acuih ka thin'.' Hi hla hi pastor le siangbawi pawl hrang lawng vekih ruat tu tla kan rak um pang kei, Tuu Khaltha puaini ih ka sim theu mi ka ron lo hlawm bet ke. Siangbawi e, pastor e ti um lo, zumtu kan za ten kanmah le dinhmun cio ah tuukhal kan si thluh tihi thei thiam cio sehla a va tha awm ha. Cuvek thotho in Bawipai hmaiah cun kan zaten tuu kan si thluh, a tuurun kan si. Ahleice in nu le pa timi cu innsang tuurun hrangah tuukhal kan si. Kan innsang, kan tuurun himnak dingah kan hnenah ttuanvo tumpi pek kan si tihi hngilh siang hram hlah uh si. Kiang le kap, Kawlram sungih innsang tampi von thlir tikah ka pupa bangih fale pawl khui an thleng ih ziang an tuah, poi an tok maw tok lo ti kha thei lo tampi kan um ding a bang. Nu le pa hrek khat le phei cu kan hmuhlo lai ih kan fale poi an khoih ngah pangih mi'h in sim sin le kannih fale an si zik lo, kannih fale pawl cuvek in an huatsuak lo tiah kan hmuhban lo nak ih kan fale an nun sual khal le kan tan lamlam. Democracy ngaingai thawn ram cangkang pawl vek tla sisehla cu kan fale kan kilkhawi ngah lo ruangih nu le pa thawnginn thleng le palik pawl ih fale lon sak tak kan tam ding zum a um a si.

          Innsang hi kan kilhim awk nak ding thabik a si zia hi CCC timi Catholic Pawlpi ih Pathian thuzirhnak cabu sungah nambat 2196-2233 tiang rori a um a si. Cucu Pathian Thukham 10 sungih nu le pa upat aw timi thawn pehpar ih in zirhmi a si. Himi thukham hin fale pawl hrang lawng in zirh duhmi si lo in innsungsang nuntu khawsak daan ding nu le pai tuanvo khal a tel theh a si. Himi zirhnak sungin malte ron tarlang ka duh mi pawl cu: 'Khristian innsang cu kohhran ih pawlkomawknak langfiang ter tu le phuangsuak tu bik a si ruangah 'innsang kohhran' tiih kawh a tlak a si;' cuihhlei ah 'Bawithum kom Pathian pakhat ih pawlkomawknak khal a khihhmuh hrih a si.' Curuangah si innsang cu Pathian kohhran ka ti duhsan. Pathian ih kohhran hrampi cu innsang a si. Cuvek thotho in mipi, rampi sung pawlkomnak pawl ih hram khal innsang a si. Kan innsang a tthat le kan Kohhran/Pawlpi a ttha ding; kan venghnen, kan khua le ram, kan rampi tthatnak ding khal kan innsang nunih bunaw mi a si.

          Curuangah tuini ah hleice zet in innsang tthekdarh, innsang buaibai, innsang tlasia pawl hrangah thlacam bawm phah in kan innsang cio ah Bawipai in pekmi ttuanvo le covo ttha teih kan lak thei nak dingin Thianghlim innsang hnenah bomnak zaangfahnak kan dil tlang pei uh: Nazareth khua ih Thianghlim innsang, kan innsang cio hi thlacam tlangnak le thudik zir tlangnak, khat le khat somdawl aw ih humhim awknak hmun ron si ter hram aw. Amen. 

Add new comment

7 + 9 =