Innsang pehtlaih awknak nun (thuthangtha sim tu Rev. Fr. Dominic Hnin)

Innsang pehtlaih awknak nun

Thuthangtha sim tu Rev. Fr. Dominic Thawm Hlei

Caantluang zarh sawmthum nak, tlawngkai nihnih ni (October 27, 2020)

Siarding: Ephe. 5:21-33; Ps. 128:1-5; Lk 13:18-21

• Tuisun ih kan siarmi Bible hmaisabik Ephe 5:21-33 hi Colose 3:18-4:1 thawn an bang aw zet ih Innsungsang nun daan ding lamzin in sim. Cui Kolose cakuat cu tuisun kan siarmi Bible ah kau deuh in a simfiang. Himi thu cu hlan lai Greek miphun pawl le Rome miphun pawl ih inn sungsang an rak ruahdaan le an hmuhdaan a si bik. 
• Ephesus khuami pawl hnen ih cakuat kan zoh a si le pumkhat sinak hi thupi zet in a rel ii cui pumkhat sinak cu innsungsang dinhmun in tahtthimnak a pek.
• Himi innsungsang petlaih awknak ah Christian innsungsang cu kaihhruai awknak ah a sangsang te-in remhthat a simi pawlkom phunkhat in a tar lang. Hiti ih a tarlang ruangah engtaitu pawl le dodaltu pawl in "kan nunphung le kan innsang umtudaan in siatsuah a si" ti in an heek thei nawn lo.
• Greek pawl le Rome mi pawl ih thuanthu kan zoh tikah innsungsang cu pasal le nupi, nulepa le telefa, bawi le hnenum ti in a dotdot ih rak ummi pawlkom pakhat a si. Asinan himi innsungsang kaihhruai awknak ah Khrih le a Kohhran ih karlak ih pehtlaihnak cu cawn ding le zohtthim ding ah in pe.
• A hleice in nupa karlak ih a um dingmi tuanvo pawl an si. Khrih hmaizahnak ruangih pakhat le pakhat an thu an ngaiawknak cu Thiangthlarau thawn an khat a sit i langnak phunkhat a si ve. Khrih cu amah rori khal thu ngai ih a um vek in le cui a thungainak cu zohtthim in nupa karlak ah pakhat le pakhat thu ngaiawk ding a si.
•  
• Col 3:18 sungah "Nupi pawl, nan pasal thu ngai uh" a ti mi kha ziang ruangah an pasal thu ngai a tul, ziang tivek in an ngai ding timi cu a sim fiang, "Bawipa ih duhnak nan thlun bangin, nan pasal duhnak thlun uh (Ep 5:22)" a ti. Khrih ih thu kan ngainak cu kan innsang sungah a luanglut ding a si.
•  
•  
• Bawipa Jesuh cu ziang ruangah amah le amah sumnak a pek timi khal sim fiangnak a um. Bawipa in a ruangpum a simi a Kohhran hrangah amah le amah a pe aw, a suum aw. Ziangah ti le cui a ruangpum a simi a Kohhran cu thianghlim te ih amai hnen lala ih a thlenter duh ruangah a si. Himi hi Thessalonica cakuat (1Thess 3:13) sung ahcun "kan Pa le kan Pathian hmai ih a pek duh ruangah a si" a ti. Van sunlawinak ahcun Khrih cu Pa Pathian thawn hmunkhat an si ruangah zianghman hnaohnok a um lo. Bawipa cun a Kohhran cu Baptismnak le Thuthangttha aupinak thawn a thianghlimter a si.
•  
• Cangantu cun nu le pa thu a rel lai-ah Kohhran thu ah a kaat duak. Kohhran cu "thianghlim" ti ih a relnak thawng in Kohhran ih hminsinnak pali cu kim te-in a rel suak: "Pathian pakhat lawng ka zum" ti ih Zumnak hrampi cu hla ih kan saknak ah "a thianghlim, pakhat, catholic, athlahmi pawl thawn zommi Pawlpi ka zum" kan ti ttheu vek in Kohhran cu (One) - pakhat a si ding, (Holy) - a thianghlim ding, (Catholic) - mi zapi hrang ah a si ding ih, (Apostolic)- Athlahmi pawl - culole - Dunthluntu pawl thawn pehzommi a si ding.
• Khrih ah Kohhranpi cu pumkhat kan si tiah (Eph 1:15-2:22) a relzo vekin, Thlarau pakhat, Bawi pakhat, zumnak pakhat le Baptism nak pakhat ah funkhawm thluh kan si.
• Cun Gentile le Jew pawl hrangah ti a si vek in tthenttheknak umlo, mihmuahhuah hrangah a si.
•  
•  Khrih in a Kohhran a duhdawt vek in pasal khal in a nupi cu a duhdawt ding a si. Mai nupi duhdawt, mai pasal duhdawt timi hi "mah le mah duhdawtawk" a rak si, ziangah ti le "mipa in a nu le a pa tanta in a nupi thawn an kom aw. Cutiin tisa khat ah an cang" ti ih (Gen 2:24) ah kan hmuh vekin "annih cu pahnih an sin awn lo, pakhat an si (Mt 19:6)". Himi hi Pathian ih khawkhanmi a si.
• Mah le mah duhdawtawk ti hi kan mah le kanmah kan tuamhlawm le kan kilvenawknak in a lang ttheu. Hliamhma kan tuar tikah sii kan hnih, kan tuam; kan ril a rawng tikah rawl eiding kan hawl; tivek in a phunphun in kanmah le kanmah kan duat aw. Cun kan parah thilsia a thlen ding kan duh lo. Cu pawl cu mah le mah kan duhdawtnak ruangah a si.
• Cuvek thotho in kan pumseu a simi kan nupi le kan pasal cu humhimnak le tuamhlawmnak, dimdoihnak, tuarpinak le hlawmawknak pawl thawn duhdawt uhsi. Pakhat le pakhat zawn ruahsak awknak thawn kan innsungsang cu ceimawi in nunnak thaw pe uhsi.