Jesu cu na Siangpahrang si ter aw

Jesu cu na Siangpahrang si ter aw

Khrih Siagpahrang Puai

Siarding: 2Samuel 5:1-3; Ps. 121:1-5; Colossians 1:12-20; Lk. 23:35-43

Tuisun cu Khrih Siangpahrang puaipi kan tuah. Khat lam ahcun kan Falam Biakinnpi puai a si ih kan innsang puai ti khal a theih. Curuangah nan zaten "Happy Feastday" ti ah nan kut ka lo kai.

Hmaisabik ah "Siangpahrang" timi tongfang ih sullam zoh ta uhsi. "Siangpahrang" ticu "nehnak hmuahhmuah cotu," "thuneitubik" tinak a si. Mai duhtlan ih thleng theih a silo vekin hril tling mi khal a si lo. Siangpahrang sinak voikhat an pek hnu cun a tesinfa tiang in a zar an rawn to ih Siangpahrang an rawng si vivo lanta. Curuangah Siangpahrang sinak cu an suahkehnak "hrin" in a feh.

Mt 28:18 sung ih "lei le van ih thuneihnak hmuahhmuah cu ka hnenah pek a si zo" ti ih kan hmuh vekin Jesuh cu lei le van ih Siangpahrang a si. Tiduhsan cu Jesuh cu a minung sinak ah siseh, a Pathian sinak ah siseh Siangpahrang a si.

Jesu cu minung a sinak ah David ih tesinfa a si. Kan siarmi Bible 2 Samuel 5:1-3 sung kan zoh asile David cu Israel Siangpahrang si ding ah hriak culh a si thu kan hmu. David ih thuanthu kan zoh a si le a minung sinak ah a famkim ve lo, tlaksiatnak khal a nei ko nan tangdornak thawn Pathian hnenah a kir sal. A kilkhawimi mipi pawl hrangah an beunak le an hnangamnak a si vek in tuini tiangah Israel pawl hrangih a sunglawi hleice le an hngilh sianglomi Siangpahrang a si. Pathian ih hril le hriak culh a si vekin "ka miphun Israel cu na cawm ding ih na hoha ding" ti ih a fialmi a si. Culawng si loin amah Pathian rori in "na innsang le na uknak ram cu kumkhua in dinhnget a si ding, na lal tohkham cu kumkhua in dinhnget a si ding" tiah a ti. Cuticun David le a tesinfa cu Pathian ih miphun Israel ih Siangpahrang an rawng si ruangah Jesu khal cu a minung sinak ah Siangpahrang a si.

Jesu cu Pathian a si ti cu sim le rel dang khal a tul in ka ruat lo. Curuangah Jesu cu lei le van ih Siangpahrang a si.

Asinan himi a siangpahrang sinak cu a ni le tawn ah vuk le vek ti-ih ra cangsuakmi a si lo, ni khat hnu nikhat nuam tete in a dinso vivo mi a si. A hleice in sersiammi pawl cu sualnak sal sung ihsin tlen suak in amah thawn a komawkternak thawngin a siangpahrang sinak cu a dinso vivo a si.

Minung ih ruahnak ahcun Jesuh cun Israel rampi a dinsal ding ih cumi ah siangpahrang a tuan ding ti asinan Jesuh ih siangpahrang sinak cu minung ruah daan zawng cun a si lo. Jn 18: 36 ah, "kei ka uknak ram cu hi leilungtlun ah a si lo"ati. Jesuh ih siangpahrang sinak cu hi leitlun thuneihnak ihsin le ral nehnak ihsin a ra mi si loin Thinglamtah parih amah le amah a pekawknak in a si.

Asinan kan Bawipa Jesuh cu Thinglamtah par ahcun nehtu si loin nehmi a bang. Siangpahrang asinak cu hnihsuah sainak men a bang.

Hruaitu pawl in "midang a runhim vekin amah le amah runhim aw seh" ti ah nautat zomtaihnak thawn an tinak thawngin Jesuh cu "runtupa" asi thu an nemhnget. A lu tlun ih "Hipa hi Judah pawlih Siangpahrang a si" ti ih ca an tarnak thawngin Jesuh cu Siangpahrang a si thu an nemhnget. Amah Jesuh thawi thinglamtah parih thlai tlangmi misual pakhat ih tongfang le awkam in Jesuh cu Messiah - Pathian ih hriakculhmi a si ti a lang. Cun, Bawipa cu ralkap pawl in "zu thur" an hawn tul. Farah zonzai khalih an hman theimi "zu" a si ruangah "zu an tulhnak" hi a tha zawng ih ruah theih a si. Amah lawngte cui zu thur cu siangpahrang pakhat ih hrang ahcun nautat zomtaihnak ah a cang.

Jesuh in Lk. 23:34 ah, "ziang an tuah ti an thei aw lo" a ti vek in hi pawl in an tuahnak pawl cu a sullam an thei fello na-in an tuahmi pawl zoh tlang thluh a si le Jesuh cu Siangpahrang a ti, Messiah a si ti le Runtupa a si ti thu cu a lemlei zawng - indirect - in an langter a si.

Hruaitu pawl le mifim pawl, mah le mah khaisang aw pawl in Jesuh ih sinak cu fiang te in hmu lo le thei lo khal hai sehla, "mifim pawl le mi cak pawl hnen ah silo, mi farah le mi nauta pawl hnen ih langawter Bawipa (Mt. 11:25)" a si vekin, Bawipa thawi thinglamtah parih tar ve mi rukfir pa cun a rak hmu fiang in a rak cohlang. "Bawipa, na lalram ih na rat tikah ii hngilh hram aw hlah" a ti. Jesuh cu uktu Siangpahrang a si ti le Rundamtu a si ti voikhat sim ah a sim tel thluh.

Bawipa Jesuh cu lei le van ih siangpahrang a sinak cu sersiamnak ruangah siseh, Rundamtu a si ruangah a si.

Kolose 1:16-17 ahcun " van ih um siseh, leitlun ih um siseh, hmuh theih siseh, hmuh theihlo siseh, ziangkim hi amah ihsin sersiam an si ih amai hrangah an si, amai ruangah thil ziangkim an ra um" a ti. Ziangkim parih thu neitu a si. John 1:3 khalah "amah tello ih sersiammi zianghman a um lo" ti a si. Cuticun Bawipa Jesu cu sersiamnak ih a bulhrampi a si ih sersiammi hmuahhmuah parih thuneitu Siangpahrang a si.

Bawipa Jesuh cu minung hmuahhmuah rundamtu a sinak thawngin kan Siangpahrang a si.

John 3: 17 ah "Amah (Jesuh) ihsin leitlun rundam a si theinak dingah a thlah sawn a si." a ti. Amah bawipa Jesuh khalin "leitlun thuthen dingah ka ra lo, rundam dingah ka ra (Jn 12:47) " a ti. Rundam kan tikah "sualnak ihsin "tlen" kan si zo timi khal a khihhmuh ve. Bawipa cun in tlenzo, amai ta kan si. Cutiih amai ta kan si ngaingai ahcun anih cu kan siangpahrang a si.

"I hngilh hram aw hlah" ti ih Bawipa hnenih a diltu rukfirpa hnenah Jesuh cun, "tui ni ah keimah thawn Paradise ah na um ding." ti ah a sawn. Paradise tihi Persian miphun pawl in "hruangkulh that mi pangpar hmuandum" hrang ih an hmanmi tongfang a si ih Semtirnak - Genesis - cauk sungih "Eden hmuandum" khi a khihhmuh. Cui Eden hmuandum cu miding pawl ih umnak, Adam le Eve te pahnih an tlaksiat hlan ih an rak umnak a si bangin Pathian thawn an rak pawlkom awknak hmun a si. Bawipa Jesuh in "tui ni keimah thawn Paradise ah na um ding" a ti nak thawngin Pathian thawi komawksal theinak a lang ter. Adam le Eve ih tlaksiatnak sualnak ruangah Eden sangka cu khaarpit a rak sizo na-in tu ah Bawipa Jesuh in in onsak sal a si. Mt. 18:11; le Lk. 19:10 pawl ah "minung Fapa cu a hlo mi hawl ding le run ding ah ka ra" a ti vekin Eden ihsin a rak hlo zo mi cu in hawlsuak ih in rundamsal a si. Ziangruangah ti le amai ta siding ah le a rammi siding ah a si.

Bawipa ih sersiammi na si, a tlenmi na si ruangah a rammi na si ih amah cu na Siangpahrang a si. A thu ngai in a ram ih daanthu thlun aw.