Jesuh cu hnatuan a thok (sim tu Rev. Fr. Pius Cung), January 4, 2021.

Jesuh cu hnatuan a thok

Thuthangtha sim tu Rev. Fr. Pius Cung 

January 4, 2021.

Siarding: Mt 4:12-17, 23-25.

          Thuthangtha ngaitu u le nau pawl, kum 2021, ih Kumthar laksawng damcahnak, lungawinak le hnangamnak thluasuah cu nan zate parah thleng  hramseh tiah thlaza ka cam. Nan tumtah mi pawl khal hlawhtling in nan thlacamnak pawl khal famkim hram seh. Jan 04, hrangih kan siarding mi Thuthangtha cu  Mt 4:12-17,23-25 a si. Cathianghlim kan ngai tlang pei. Johan kha thawngah an thlak ti a theih tikah Jesuh cu Galilee ah a feh. Nazareth ah um loin Kapernaum khua ih um dingin a feh. Kapernaum khua cu Zebulun le Naftali phun pawl ram sung Galilee Tili kapih a um mi khua a si. Hitiih a umnak cu profet Isaiah ih a rak sim ciami kimternak dingah a si. Isaiah cun: “Zentail mi pawlih umnak Galilee ram sung, Jordan tiva ralkhatih um, Tipi lamah , Zebulun le Naftali ram, Khawthim sungih a um mi pawl in Tleunak maksak an hmu ding,  Thihnak ramthim sungih a um mi pawl parah tleunak a suak ding”, tiah a rak ti. Cuih tikcu ihsin Jesuh in, “Nan sual sir uh, ziangahtile vancung Uknak a nai zo,” tiah thusimnak hram a thok. Jesuh cu Galilee peng khawzakip ah a feh ih sinakok kipah thu a zirh vivo. Vancung uknak thuathangtha a sim vivo ih natnak a phunphun a tuar tu pawl kha  a dam ter vivo. A thuhla cu Siria ram hmuahhmuah tiangin a thang thluh; curuangah cun natnak le harsatnak a phunphun a tuartu, khuasia ih polh mipawl, merainat nei pawl le a zengmi pawl kha a hnenah an ratpi ih an zate in a danmter thluh. Galilee le Dekhapolis peng, Jerusalem le Judea peng le Jordan tiva ral ihsin mi tampi an ra ih a mah cu an thlun.

Kan thulu dingah “Jesuh cu hnatuan a thok” ti ka hril. 

1. Thuthangtha a sim.

          “Nan sual sir uh, ziangahtile vancung Uknak a nai zo,” tiah thusimnak hram a thok. Jesuh nih vancung Uknak thu a zirhnak  veten a sim hmaisabik mi thu cu sualsirnak a si. Vancung uknak sungih telthei dingah sualsirnak cu tuahhmaisabik tengteng a tul. A thupit tuk ruangah Jesuh in hmaisabik ih a thusimnakah a hmang. Jesuhnih a hnatuan hram a thawh can ih sualsirnak inzirh vekin 2021 hi sualsirnak thawn thok u si. A cemcia 2020 hnak in 2021 hi kan sualnak a mal deuh kum, kan thatnak le kan thianhlimnak  a karh, a tthan kum sihram seh. 

2. Mina a dam ter.

          Natnak le harsatnak a phunphun a tuartu, khuasia ih polh mipawl, merainat nei pawl le a zengmi pawl kha a hnenah an ratpi ih an zate in a damter thluh. Kan damlo tikah, kan cah dingzat kan cak theilo, kan tuan dingzat kan tuan thei lo, kan famkim dingzat kan kim thei lo. Cuai kan kim nawn lo. Baksam mi kan nei tinak a si. Kan thlarau khal sualnak phunzakip ruangah a mawi dingzat mawi thei loin, a that ding zat tha thei loin, baksam mi tampi a nei. Curuangah damnak Jesuh kan tulih Amah in famkimnak, tlamtlinnak ah in thlenpi. Jesuh thawi kan komawk tikah kan cuai a kim. “An zate in a danmter thluh” ti rori a si. Lungawi um tuk aw. Taksa, Thinlung le Thlarau ih kan damnak cu Jesuh a si, a pantu hmuahhmuah ih co thluh a si, A hmin Thanghthat si ko seh, Amen.

3. A hmin a thang.

          A thuhla cu Siria ram hmuahhmuah tiangin a thang thluh. Jesuh ih hminthan nak cu a mai miphunpi pawl le Judah ram lawngah silo in miphundang le ramdang a si mi Siria tiang a thang. Jesuh cu a theitu le a lawmtu an tam vivo tikah a hminthannak cu a nasa vivo. Jesuh theitu le zumtu mipumsiar an tam vivo tikah kan lungawi a awi. Cun pumpak cioih kan nun khalah Jesuh hmin hi thang bet rero dingmi a si. Leitlun, mi hminthang pawl hi camkhat sungte hminthang le, kum reideuh hminthang mipawl an um. A sinan, thihhnukhal ih mithang thotho le kumkhuaih hminthang sinsin vivo tu cu kan Bawipa Jesuh lawng a si. Nitin kan nunnakah hin Jesuh hi a hminthang sin rero hram seh. Veikhat kan theihnak lawng silo in theihbet rero ah theih a nuam sinsin mi Jesuh a si. Kan mai sinak, dinhmun le kan hminhnak in Jesuh ih nun le hmin sawnhi thang sin, larsin vivo thei hram seh.   

4. Thluntu tampi a nei.

           “Galilee le Dekhapolis peng, Jerusalem le Judea peng le Jordan tiva ral ihsin mi tampi an ra ih a mah cu an thlun” ti in kan siar. Kan umnak leipar ih Jesuh a ra suah cun kan leitlun thuanthu cu a thleng aw ih a thar ah a cang. Jesuh kan nunih a ra luh cun minung nunnak khal a thar in a thleng aw ve. Curuangah Jesuh tonngah cun thinlung le nunzia a thleng aw ih a thuzirh tlun le a mah vek ih nunnak lampi ah mi a hruai. A sia lam ih thleng awk, a si loih a tha lamih thlengawk vivo a si. Jesuh thluntu kan si ih a penghoi lo le khawdang cuan loin Jesuh tuhi kan hmaiah zoh ringring u si. Vancung ihsin leipar ah a rungtum mi Jesuh cun leilung mipawl cu vancungah in hruai sal a si. Amah thlunin nung u si, A mai umnakah kumkhua kan um ve ding a si. 

           Jesuh ih thusimnak kan ngai tikah lungawinak, hnangamnak le nun thlengawk nak kan ngah. Amah kan ton le kan zumnak in kan ziangkim damnak kan co. Ahmin thannak hi kan uar dingmi, kan porh ding mi, kan phuan dingmi, kan aupi ding mi a si. A dungthlun tu, zumtu pakhat kan sinak  hi 2021 kumthar sung le kan nun sungah lang sin, fiang sin hram seh. Kum 2000 tluk rei zo mi sanih Vancung Uknak hnatuan a rak thok tu Jesuh Khrih hi, 2021 kum khalah kan leilungpi ah siseh nangle kei, pakhatcio ih kan nunnak ah siseh Pathian uknak hna thar a thok rero thotho a si. Lei le van hrang siseh minung pawlih kan rundamnak hrangah siseh colhni umlo le bangcan umlo hna tuan thok ringring tu Kan Bawipa Jesuh thawn hmunkhat in thinlung thar, ruahnak thar, nunzia thar thawn thatho zet in kumthar le nuntharnak thok ve u si. Pa le Fapa le Thiangthlarau hmin in, Amen.