Jesuh Hmin In (sim tu Rev. Fr. Peter Zin) May 15, 2021

“Jesuh Hmin In”

Thuthangtha sim tu Rev. Fr. Peter Lal Zin Thang

May 15, 2021

Siarding:Tirh. 18: 23-28; Saam 47: 2-3, 8-9, 10; Jn. 16: 23b-28.

          “Thungai in ka lo sim: Ka hmin in nan dilmi hmuahhmuah cu ka Pa in a lo pe ding. Atu tiangah ka hmin in zianghman nan dil dah lo. Dil uh nan ngah ding; cuticun nan lungawinak cu a kim ding.” (Jn 16: 23b)

          RVA Falam Service in Thuthangṭha ngai in thlarau thazaang a laktu Bawi Khrih ah duhdawtmi nu le pa, u le nau pawl, nan um nak cio ah Bawipa in a lo um pi ringring seh la hnangam daihnak a lo pe hia hram seh. Dungthluntu Peter in ‘Bawipa nangmah hnen lo cu khui ah so kan feh cuang ding, kumkhua nunnak petu ṭongkam cu nangmah hnen lawngah a um si,’ a ti vekin kan nih khal harsatnak le thin nuam lo nak a phunphun kan tong hman sehla amah Bawipa hnen ah pan in thazaang a lak thim tu si dingin zuam ringring uh si tiah a hmai sabik ah ka lo sawm duh.

          Tuni ih kan siar dingmi Bible pawl sungin thlarau thazaang lak tlang uh si. Kan siar dingmi cu veikhatnak ah Dungthluntu 18:23-28 tiang asi ih ṭongkam thiam, thu sim thiam zet mi Apollos in Jesuh cu Jew miphun pawl ih an hngah rero mi Khrih a si tikha Bible hmang in fiang zet in a simnak thu a si. Gospel kan siar ding mi cu Johan 16:23-28 tiang a si ih kan ngai tlang ta hrih pei. 

Johan 16:23-28

          Thungai in ka lo sim: Ka hmin in nan dilmi hmuahhmuah cu ka Pa in a lo pe ding. Atu tiangah ka hmin in zianghman nan dil dah lo. Dil uh nan ngah ding; cuticun nan lungawinak cu a kim ding. “Atu tiang cu hi thu pawl ka sim tikah tahṭhimnak lawnglawng ka hmang. Sikhalsehla tahṭhimnak hmang nawn lo in lailan in ka Pa ih thu ka simnak tikcu a ra thleng ding. Cuih ni a thlen tikah a hnenah ka hmin in nan dil ding; nanmah ih ai ah ka lo dil sak ding tiah ka sim lo; ziangahtile ka Pa amah rori in a lo duhdawt a si. Nannih in, in duhdawt ih Pathian hnen ihsin ka rat kha nan zum zo ruangah ka Pa in a lo duhdawt a si. Pa hnen ihsin ka ra ih leilung ah ka ra thleng. Atu cu leilung ka tlansan dingih Pa hnenah ka feh ding,” tiah a ti. (Bawipa ih Thuthangṭha asi)

          Bawi Jesuh in ‘Ka hmin in nan dilmi hmuahhmuah cu ka Pa in a lo pe ding, dil uh nan ngah ding’ a ti tikah ziangziang khal a si le kan duh mi hmuahhmuah a mah hmin in kan dil ding ih kan ngah ding tiah ruahnak hi a um thei. Curuangah mi hrek khat in Jesuh hmin hi mah duhduh ih hmang thei mi thilri vek in khal an hmang tum vivo ti vek khal cu kan hmu thei ding. Christian kan si nak ah zumnak hi a hram thok nak a si ih zumnak nei lo in Christian taktak si a thei lo. Zumnak hi a thupi zet. Zumnak nei cu a thupi zet nan khat lam ah ziang si kan ṭul timi tete khal ruat a rak ṭul ṭheu. ‘Ka hmin in nan dilmi hmuahhmuah cu ka Pa in a lo pe ding,’ tiah Bawi Jesuh in a ti tikah mi hrek khat cun an zumnak a tum zet nan ziang si kan ṭul lai timi te an hngilh ṭheu.

          Jesuh hmin in thusim, Jesuh hmin in hnaṭuan, Jesuh hmin in thlacam tiin kan ti tikah ‘Jesuh’ tiah a hmin sal menmen lawng hi a si lo ti hi Bible ṭha deuh in kan zoh a si le kan hmu thei ding. Thuṭhimnak ah ‘Bawipa Bawipa tiah i ko tu hmuahhmuah in vancungram an co lo ding, Bawipa na hmin in thuthangṭha kan sim, na hmin in khuasia khal kan dawi an ti tikah Bawipa in ka lo thei lo, nan nih miṭha lo pawl,’ tiah Bawi Jesuh in a sim mi pawl khal kan hmu thei. Curuangah Jesuh hmin in thusim, Jesuh hmin in hnaṭuan, Jesuh hmin in thlacam ti mi hi a hmin sal men siloin a mah duhnak vek in tuah hi a hmin in tuah asi ti kan thei thei. Thuṭhimnak ah Jesuh Khrih kan zumnak le kan duhdawtnak thawng in mifarah pakhat kan bawn asile kan ka in Jesuh hmin in kan ti lo hman ah kan tuah mi hi Jesuh hmin in kan tuah a si. Kan ral kan ti pei ih kan hua mi pakhatkhat kha Jesuh hmin in thi seh tiah thla kan cam a si le Jesuh hmin cu kan sal menmen nan amah duhnak vek in kan cam lo ruangah a hmin in thlacam kan si lo ih mah duhnak in thlacam men kan si. 

          Curuangah kan thlacam mi a famkim thei dingin cu Jesuh kha kan sung ah a um ih kan nih khal a sung ah kan um a ṭul. Cuti asi lawngah a ṭul lo mi kan dil lo ding, a dil daan kan thiam ding ih kan dilmi khal Pathian in a famkim ter ding, cun kan lungawinak a famkim ding a si.   

Fr. Peter Lal Zin Thang (Hakha Diocese)