Jesuh ih nau le pawl (sim tu - Rev. Fr. Joseph Ro Nei Thang) July 30, 2021

Jesuh ih nau le pawl

Thuthangtha sim tu - Rev. Fr. Joseph Ro Nei Thang

July 30, 2021

Siarding: Lv 23: 1. 4-11. 15-16. 27. 34b-37/ Ps 81: 3-6. 10-11(2)/ Mt 13: 54-58

            Radio Veritas Asia Falam Chin service ah leitlun hmun tinkip ihsin thlarau rawl a zawh ringringtu Bawi Khrih ah duhdawt zetmi nu le pa, u le nau pawl, “kan Bawipa Jesuh Khrih ih zaangfah lainatnak, Pa Pathian ih duhdawtnak le Thlarau Thianghlim ih pumkhat sinak cu nan zate thawn um sehlaw” tiah cibai ka run lo buk hai. Tuihni cu 2021, July thla ni 30, caankeel kaar 17 nak, Tlawngkai ni nga ni asi. Cun July thla ni 30 cu St Peter Chrysologus ih puaini tla asi. Tuihni ih kan siar dingmi Pathian ih ttongkam pawl cu Puithiam hnattuan 23:1, 4-11, 15-16, 27, 34-37 tiang le Mt 13:54-58 tiang pawl tla ansi pei. Tuihni ih kan ruah khawm tlang dingmi cu “Jesuh ih nau pawl” tiah asi pei.

            Tuihni ih kan siarmi Thuthang ttha hi siar sal uhsi. Mt 13:54-58 tiangah Jesuh cu a khua ah a tlung. Cule an sinakok ah mipi pawl thu a zirh hai ih a thu a theitu pawl cun an mang a bang ngaingai “hi bangtuk fimnak hi khuitawkinso a ngah” tiah an sut aw. “Hi bangtuk mangbangza hi ziangtinso a tuah thei? Lettama fapa asilo maw? Mary kha a nu asilo maw? James, Joseph, Simon le Judas te kha a nau le ansi lo maw? A far le tla hitawk ah an um ttheh asilo maw? Khuitawkinso hi bangtuk hi a ngah” tiah anti. Cuti cun Jesuh cu an hnong. Jesuh in an hnenah “Prophet cu amah suahnak khua le innsang siarlo hmundang ahcun upatnak a tong asi” tiah ati. Zumnak an neihlo ruangah mangbangza tampi a tuahlo” tiah asi.

            U le nau pawl, Bawinu Mary in Bawipa Jesuh siarlo fapa dang a nei asi tiah Kohhran dang pawlin a tuih kan siarmi Bible catlangte thawn in do ttheu, in kap ttheu asi. Kan Catholic Kohhran khalin “Bawipa Jesuh in suahpi unau dang a neilo. Bawinu Mary in Bawipa Jesuh siarlo fapa khal siseh, fanu khal siseh a neilo asi” tiah kan rak ti cio ve. Curuang ah Jesuh ih nau le pawl tiah hi tuihni ah ruat khawm uhsi. Ziangahtile Mt 13:55-56 sungah “Hi bangtuk mangbangza hi ziangtinso a tuah thei? Lettama fapa asilo maw? Mary kha a nu asilo maw? James, Joseph, Simon le Judas te kha a nau le ansi lo maw? A far le tla hitawk ah an um ttheh asilo maw?” tiah a um fawn. El thei le asi fawnlo. Ziangtin si thlang himi Bible catlang cu! tiah kan rak ti cio ding; mihrekkhat cun kan don tla a har ding.

            U le nau pawl, hmaisabik ah kan thei a ttul zetmi cu Bawipa Jesuh in suahpi unau dang a neilo. John 19:25 ah “Jesuh ih thinglamtah kiang ahcun a Nu le a nu ih naunu le Clopas ih nupi Mary le Mary Magdalene pawl an ding” tiah kan hmu. Thianglamtah kiangah Mary pathum an ding tiah kan ti thei. Bawipa Jesuh ih nu Mary, Clopas ih nupi Mary le Magdalene khua ih Mary pawl ansi. Clopas ih nupi Mary cu Jesuh ih nu Mary thawn unau ansi tiah a ti asi. John 19:25 ah Bawinu Mary ih naunu a ti asi. Mt 27:56 ah “Cuih nunau lakah cun Mary Magdalene, James le Joseph ih nu Mary le Zebedi nupi tla an tel” tiah kan hmu lala. James le Joseph te ih pa Clopas asi. Curuangah Clopas le Bawinu Mary ih naunu Mary te in James le Joseph te an nei asi. Curuangah James le Joseph te cu Bawipa Jesuh thawn first cousin (tawin kwe) ansi ti kha a lang fiang. Pupa pawlih zumnak cauk sungah Simon le Judas te tla Bawipa Jesus ih winkwe (cousin) unau pawl ansi tiah in zirh asi.

            Kan thei ttulmi cu Bible ih Thukam thar cu Greek ttong thawn an ngan asi. Matthew in hmaisa ah Aramaic thawn a ngan dah nain neta ah Greek ttong thawn a ngan sal asi tiah kan hmu thei. Greek ttongfang “adelphos” timi cu nu le pa ih sungsuak unau tla ansi thei, cousin unau tla ansi thei, cun mah ih tuu le pawl tla ansi thei asi. Abraham in tupa Lot a nei asi. Hmun khat in an um tlang nain ttilva lam ahcun bulpak in an nei fingfing. Abraham hi Bawipa in thluasuah a pekih ttilva lamah a lian zet, ttilva tampi a nei. Lot in tla ttilva tampi a nei ve ih an ttilva khaltu pawl hi an hau awk phahphah ttheu, ziangahtile an ttilva pawl hrangah hrampi khopkham in a umlo ruangah asibik. Cumi cu Abraham in a thei tikah Lot hnenah “unau kan siih na minung pawl le ka minung pawl hi to aw rero ding ansi lo. Kan tthen aw sawn pei” tiah a ti asi. Abraham in a tupa Lot hi Semtirnak 13:8 ah “unau kan si” tiah ati asi. Falam Bible ah “sungkhat kan si” tiah an let. Mah ih tupa khal unau timi Greek ttong in Adelphos kha an hmang asi.

            Mah ih hnattuanpi tla cu unau tiah kawh asi ttheu. Paul in a hnattuanpitu Timothy kha unau tiah a ko asi. 2Korin 1:1 ah “Pathian lungkimnak in hrilmi Khrih Jesuh ih tirhthlah keimah Paul le kan unau Timothy in Korin khua ih ummi Pathian Kohhran le Akhaia peng khuazakipih a ummi mithianghlim hmuahhmuah nan hnenah ca ka lo kuat” tih a asi. Bawipa Jesuh in zumtu hmuahhmuah cu unau kan si asi tiah Mt 23:8 ah in zirh. Bawipa Jesuh in suahpi unau a neilo lo ruangah thinglamtah parah an tar lai ah a nu hi John ih hnenah a aap ta asi. Suahpi unau a neih ahcun midang ih hnenah a aap lamlam lo ding asi ti kha thluak a neimi hmuahhmuah in ruat thei asi.

            Bawipa Jesuh ih unau pawl cu Pathian ih duhnak a tuah suaktu pawl hi ansi. Mk 3:31-35 ah “Jesuh ih nu le a nau le pawl an ra. Inn lengah an dingih inn sungah mi an vun tirh. A kiangah mi tampi an rak to ih annih in ‘zohnik, na nu le na naupa pawl le na farnu pawl leeng ah an um, nangmah an lo poi’ tiah anti. Cutikah Jesuh in ‘zoso ka nu asi? Ka nau le tla cu zosi ansi?’ tiah ati. A kiangkap ih a totu mipi pawl khih zoh phahin ‘hinah ka nu le ka naule tla an umko asi. Zokhalsisehla Pathian ih duhnak a tuahtu hmuahhmuah cu ka unau, ka farnu le ka nu ansi’ tiah a sawn tiah kan hmu thei.

            U le nau pawl, nang le kei tla Jesuh ih unau kan si thei. Jesuh ih unau na si deuh maw? Jesuh ih unau na si duh ngaingai maw? Pathian ih duhnak tuah suak awla Bawipa Jesuh ih unau ngaingai na cang ding asi,,,aamah khan. Bawipa nih fiang tein le dik tak asim zo. Zokhal Pathian ih duhnak a tuahtu poh cu Bawipa ih unau pawl ansi.

            Bawipa ih unau ngaingai kan si theinak dingah Bawipa nih thluasuah in run pe hram seh. Amen.

           

Add new comment

8 + 0 =