Jesuh ih thlacamnak famkim ter aw

Tuesday, May 26, 2020

May 26, 2020 hrangih Thuthangttha, Thlarau rawl

Thosal zarhsarihnak, tlawngkai nihnih ni (May 26, 2020)

Siarding: Acts 20:17-27; Ps. 68:10-11, 20-21; Jn 17:1-11

Hmaisabik ah John ih nganmi Thuthangttha bung hleisarihnak cu a pum in "thlacamnak" a si. Jesuh in "a Pa" hnen ih thla a camnak a si, "Puithiam thlacamnak" ti khal in an ko ttheu, ziangah tile Jesuh cu Lei le Van karlak, A pa le A dungthluntu pawl karlak ah amah le amah re aw in tuicaan le hmailamcaan ih a mah zumtu pawl hrangah thla a cam ruangah a si.Tuisun kan siarmi Bible catlang cu tthen hmih in kan hmu thei. Cucu (a) Jesuh in a Pa cu hmaton in bia in thla a camnak thu (Jn 17:1-5) le (b) A dungthluntu pawl hrang ih thla a camnak thu (Jn 17:6-11) an si.

Bawipa cu "vanlam a zoh" ti a si. Bawipa Jesuh cu thla a cam tikah vanlam a zoh phah ttheu vekin Pathian khal cu "ka Pa" ti ah a ti ttheu (Jn 11:41; Lk 11:2). Hitivek in a mai ruangpum "umtudaan" le a hmanmi ttongkam pawl hi alak ih rel si lo in Jesuh cu ziang titluk lunglut in thla a cam ti le Pa thawn an nelawknak daan a langter.

Bawipa Jesuh cu a liamcia mi a hnattuan a zoh sal tikah, Pathian ih a fialmi a tuah thluh zo ti a hmuh tikah, "tuah ding ih i fialmi hmuahhmuah ka tuah thluhnak thawngin sunloihnak ka lo pe" tiah a ti. Bawipa in a Pa ih hnenah ziang tivek in sunlawinak a pe ti in sim, cucu a fialmi kha famkim te ih tuah a si.

Na tuah na ttuan dingmi ttuanvo kha tthate ih na tuahnak thawngin Bawipa kha sunlawihnak pe ve aw.Amah Bawipa ih sunlawinak thu khal a rel cih. Bawipa Jesuh cun Pathian ih sinak cu a pho lang: Pathian cu duhdawtnak a si, thleidannak umlo duhdawtnak, misual pawl khal thliar cuanglo duhdawtnak a si. Cui duhdawtnak, Pathian ih sinak, ih thuk zia le kauh zia cu Thinglamtah parah fiangzet in kan hmu thei. Pathian i in duhdawt tuk ruangah a fapa neihsun hman ui lo in kan hrangah in pek, Thinglamtah parih thihnak tuar ding tiangin in pek (Jn 3:16). Khat lam ah, Bawipa Jesuh ih thungainak cu Thinglamtah parah a lang bik, amai nunnak pek tiangin thu a ngai.

Himi kan zohkhawm tikah Jesuh in Pathian hnen ih a pekmi sunlawinak cu Thinglamtah par ihsin a rak si. Cui thinglamtah cu misualpawl tlennak hrangah a rak si.

Cun a dungthluntu pawl hnenah "kumkhua nunnak" a pek. Thuthangttha ngantu John ih hrang ahcun "kumkhua nunnak" timi cu thudang si loin Jesuh cu Pathian thlahmi a si tile Pathian phuang suaktu a si ti zum hi a rak si.

Kumkhua nunnak timi cu kan thih hnu lawng ih hramthok si loin tu ih kan nunnak ihsin hram a thok thei, a ci a rak tto cia. Ziangah ti le kannih zumtu bulpak cio le Bawipa thawi kan pehtlaih awknak ihsin kan ngahmi a si ruangah a si.

Kannih pawl nitin ih kan nunnak ah Pathian ih hmin pholangtu, phuangsuaktu le nunpitu si zuamin Pathian cu sunlawihnak pe ve uhsi.

Tui kan san ih an uarzet le a lengzet pakhat cu "pawlkom" din hi a si. Biaknak lam dinhmun ih pawlkom a phunphun a um vekin lei tisa lam khalin pawlkom a phunphun an um. Ziangvek pawlkom va sikhal sehla cui pawlkom hram va thawh hnak in kum reipi tiang thinkhat lungkhat te ih feh vivo ding hi a harsa sawn ttheu. Cuvek ih kum saupi a dam theinak dingih a ttulbik pakhat cu "pumkhat" sinak hi a si. Thubuai hlabuai a um tikah himi "pumkhat sinak" hi a thupi sinsin. Thubuai cu pial lo in hmunkhat te ih kan phoih ding a thupi.

Hi leilung tlun ih kan hmuh kan ton dingmi pawl ah nehtu kan si theinak dingah le amah Bawipa cu hmual neizet ih kan aupi theinak dingah Bawipa in kan hrangah thla in camsak. Cui thlacam saknak cu ziang dang si loin "pumkhat" kan si theinak dingah a si. Hiti ih pumkhat sinak cu amah Pathian parah hram a bun. Pathian cu minung ih theihthiam ban hnak ih thuk in pumkhat a si, "Bawi pathum Pathian pakhat" a si.

Kannih zumtu pawl ih "pumkhat" kan sinak cu Leilungpi hmaiah Pathian kan phuannak a si.

"Miding ih thlacamnak cu a cakzet ih hmual a nei a si" (James 5:16) a ti. Pathian ih hmaiah Bawipa Jesuh hnak ih miding kan um pei maw? um lo. Asinan kan kiang kan kap kan zoh tikah tthentthek awknak lawng in a khat. Dodal awknak le engtai awknak lawngin a khat.Cuti a si le ziang ruangah Bawipa Jesuh ih thlacamnak, "pumkhat kan sinak" ding ih a thlacamnak cu tutiang a famkim lo? Ziang ruangah tile nangmah le keimah ruangah, kan thinlung a hak tuk ruangah a si. Jesuh ih thlacamnak a dokalhtu le dawnkhamtu na si pang maw?

Bawipa ih thla a camsak mi kan zoh tikah, "Anmah hrangah thla ka cam, Leilung hrangah thla ka cam lo" a ti. Bawipa in a dungthluntu pawl cu "leilung par" ih an um ruangah rawn kilkhawi aw tiah thla a cam kan hmu. Himi kan zoh tikah , Bawipa in "leilung" timi ttongfang a hman tikah "sualnak" thawn a pehpar awaw. Cuti a si ruangah Bawipa in amah zumtu pawl hrangah thla a cam ih sualnak sungih a ummi, hi leilung daan ih a ummi pawl hrangah thla a cam lo.

Cuti a si le amah zumtu pawl cu zo an si? St Paul ih thlengawknak thuanthu kan zoh tikah "zo na si" ti ih Saul ih thusuhnak cu Bawipa in, "na hremmi Jesuh ka si" (Act 9:5-6) a ti. Jesuh ih thla a camsak mi pawl cu amah zumtu pawl an si ih amah zumtu pawl cu amah Bawipa ih taksa an si ruangah Bawipa in "na hremmi Jesuh" a tinak a si.

Himi kan zoh tikah Jesuh ih thlacamsakmi si na duh ahcun "leilung" ah um lo in "Jesuh ih dungthluntu" na si a ttul ding, Jesuh ih dungthluntu diktak si ding ahcun zum tlak bik cu amah Jesuh in "keimah, ka taksa" a rak timi pawl an si. Jesuh ih dungthlntu pawl thawn pehzomnak na neih lo ahcun Jesuh ih thlacamsak mi ah na tello pang ding phan a um, Jesuh ih dungthluntu pawl ih thuzirhmi na zum taktak a si ahcun an hnen ihsin hmundang ah na tlan lo ding. Neh le hnu ih a rawng tto mi kohhhran ih na um a si ahcun dungthluntu pawl thawn nan pehzomnak hri a cat a si ding. Cuticun Jesuh ih thlacamnak cu a dokalhtu na si ding. Jesuh cu va do kalh aw hlah. A dungthluntu pawl thawn pehzom sal aw la cuticun Jesuh ih thlacamnak cu famkimtertu na si sawn ding.