Jesuh Khrih Cu Zo Asiih Kannih Teh Zo Kan Si?

Baptism of the Lord (January 12, 2020 - Zarhpi Ni)

RVA a rak ngaitu pawl nan zate hnen ah kan Bawipaih pek mi daihnak thleng hram seh tiah hmaisabik ah cibai ka run lo buk hai a si.

          Duhdawtmi nulepa ulenau pawl, tuini (Jan. 12, zarhpini) cun kan Pathian biaknak kum sungih Christmas tikcu caan a liam muarmo thlangih Ordinary Season kan timi menmen caan ih zarhpini voi 1nak kan thok thlang a si. Himi ni ah sullam thuk zet nei in Nu Pawlpi in kan Bawipa Jesuh Khrih ih Baptism a ngahnak Puaisunglawi tuah dingah a ni in khiah sak a si. 

          Tuini kan tuahmi Puai thawn pehpar in St. Maximus cun Christmas caan ttheh vete ih kan Bawipa ih Baptism a ngahnak Puaini kan tuah hi thil ttha zet pakhat a si ti’n a rak hmu. “Ziangruangahtile, Christmas ah minung in hrin a rak si ih tuini ah Sacrament in hrin a si;  Christmas ah Falahim sungin hrin a si ih tuini ah mangbangza in hrin a si; Christmas ah a Nu in mifim pathum ih biak dingah a rak cawi ih tuini ah a Pa in mi hmuahhmuah ih biak ding in a rak phuangsuak” tiah Christmas le Jesuh Khrih ih Baptism laknak Puai ih pehtlaihawknak thu St. Maximus in fiang zet in a rak sim. 

          Tuini kan siar mi Cathianghlim pawl cu: Is 42:1-4, 6-7/ Acts 10:34-38/ Mt 3:13-17 an si. Tuini kan tuahmi Puai in siseh, kan siar mi Cathianghlim pawl in siseh, Jesuh Khrih cu mi zovek a si ih, kannih Jesuh Khrih zumtu pawl khal mi zovek kan si timi in khihhmuh sak a si. 

          Kan Bawipa Jesuh Khrih cu kan hrangah zo a si timi le, kannih teh ziang kan si timi hi kan thih tiangih kan ruah ringring ding mi thu pakhat a si. A ol zawngin aphi vun suah ding ti seh la: Jesuh Khrih cu siahhlawh dinhmun in a rami Fapa a si ih kannih cu sal dinhmun in fate dinhmun ih khaisan mi kan si ti’n a tlangpi thu in kan sim thei ko. 

          Tuini Jesuh Khrih ih Baptism laknak Puai kan tuah vek in, kan Bawipa in Baptism a ttul maw si ti ih thusuhnak nei duh tla kan tam zet ding zum a um. Kanmah lawng kan si lo Johan Baptista khal a olok a song ve. Baptism la dingih Jesuh Khrih a hnen ih a rat tikah, “Keimah sawn hi na hnen ihsin baptism la ding ka si, ziangtinso nangmah riangrri ka hnenih na rat?” ti’n mangbang zet in a rak sut. Cutikah Jesuh in, “Atu cu hitiin tuah si ko seh. Ziangahtile Pathian in tuah dingih in fialmi cu hiti hin kimter thluh ding a si” tiah a let. 

          Johan ih pekmi Baptism cu sualsirnak baptism a si ti kan thei. Asile, ziangruangah sualnak nei lo mi le sualsirnak ttul lo mi Jesuh Khrih in Johan ih pek mi Baptism a rak sang? Himi thil a cannak hi Jesuh Khrih in Baptism ngah a ttul ruangah siloin kanmah hrang sawn ah a si ti’n kan pom. Sualnak thawn a khatmi minung pawl hmuahhmuah aiawh in Baptism a rak sangih cuti cun kan sinak in ttawm zia a rak lang ter. Sualnak fate hman neilo mi Jesuh ih Baptism a laknak in kannih misual pawl hrangah Baptism timi hi a ttul hrimhrim mi thil a si ti in zirh a si. Culawng siloin, Jesuh Khrih in Jordan tiva ih Baptism a rak lak tikah cuih tiva ih tidai in amah a thiangfai ter ti si lo in, amah riangri in tidai a thiang ter sawn a si. Curuangah amah a zumtu hmuahhmuah Pathian fate ih cohlan kan sinak ding hrangih a ttulmi Baptism kan lak tik ih kan hmanmi tidai pawl cu Jordan tiva ih Baptism a laknak thawngin a thiangfai ter thluh a si.

          Cuihleiah, Jesuh Khrih in Baptism a ngah hnu ah Thiangthlarau Pathian cu a parah thuro bangin a rung ttum ih Pa Pathian khal in “Hi pa hi ka duhdawt zet mi ka Fapa a si; a parah ka lung a kim zet” ti’n Jesuh Khrih ih sinak a rak phuang suak. Ahram thok ihsin a rak neih cia mi Thlarau Thianghlim cu tuini ah a hnen ah a thar in pek a si. Cucu kan maih hrangah a si. Leitlun a nun sung hmuahhmuah ah Baptism a ngah ni ih pekmi Thlarau Thianghlim thawngin hna a ttuan. Thlarau Thianghlim pek a si ni ah duhdawt tlak zetmi Fapa a sinak khal phuansuak a si. 

          Hi duhdawt tlak zet mi Fapa cun Thlarau Thianghlim thawngin Baptism a run pe (rf. Mt 3:11, Mk 1:3, Lk 3:16). Cun a dungthluntu pawl hnen ah a hnenih pekmi Thlarau Thianghlim cu Pentecost ni ah a run thlah. Cuih ni cu Pawlpi suahni ti’n kan ko. Dungthluntu pawl khal cun cuih Thlarau Thianghlim thawngin Baptism cu an run pe vivo. Zumtu pawl cun Baptism thawngin Thlarau Thianghlim kan co ih cuticun Pathian fate sinak kan co. Baptism lo cun, Pathian fate sinak co a theih lo ih vancungram thlen khal a theih lo (cf. Jn 3:5-). Curuangah Jesuh Khrih amah rori hman hi Baptism a ngah hnu lawngah Thlarau Thianghlim a thar in pek a si ih Pathian Fapa a sinak khal phuan a si. Zumtu pawl kannih khal cu Baptism kan ngah lawngah Pathian Thlarau kan co ih Pathian fate ah kan cang; cuticun, vancungram luah theitu ah in tuah. 

          Kan Bawipa Jesuh Khrih in Baptism a laknak thawngin, amah a zumtu pawl hrangah Baptism a ttul hrimhrim timi in zirh lawng siloin, “Hi pa hi ka duhdawt zet mi ka Fapa a si; a parah ka lung a kim” tiih tluangkhawn tlak fate si ve dingah in sawm a si. Baptism kan ngahnak thawngin Pathian fate kan si ti cu a fiang ko nan, vancungram luah thei taktak ding cun, Pathian lung kim ter tu kan si ding a thupi. Kan Bawipa Jesuh Khrih in ziangtin a Pa ih lung a kim ter ti cu kan thei cio; a Pa ih duhnak tuah hi rawl ei hnak in thupi sawn ah a ret. 

          Baptism ngah zomi zumtu nang le kei, Pathian fate kan si lawng hi tawk timen lo in, Pathian lungkim tertu si khal kan zuam a mamwh nasa. Baptism kan ngah ni ih kan co mi Thlarau Thianghlim ih hruainak kan thlun lawngah Pathian lung kan kim ter thei ding. 

          Baptism ruangih kan co mi Pathian fate kan sinak parah lungawi thiamtu si thei ringring dingin le kan hrangih ret cia mi ro khal a co tlak taktak tu si thei dingin Jesuh Khrih vek ih Thlarau  Thianghlim ih hruainak thlun thei ringring zuam cio uh si.