Jesuh Khrih ih zirh mi doctrine (sim tu Rev. Fr. Joseph Ro Nei Thang), April 23, 2021.

Jesuh Khrih ih zirh mi doctrine

Thuthangtha sim tu Rev. Fr. Joseph Ro Nei Thang

Siarding; Tirh. 9: 1-20; Saam 117; Jn. 6: 52-59.

            RVA Falam Chin Service ah thlarau rawl thianghlim a zawh ringringtu Bawi Khrih ah duhdawt zetmi nu le pa, u le nau pawl, thosaltu kan Bawipa Jesuh Khrih cu nanmah thawn um ringring sehla hnangamnak, thlarau le le pumsa le thinlung damnak pawl lo pe hram ringring hram seh tiah thla za ka run lo cam sak hai. Tuihni cu Pasca caan sung, Kaar thumnak Tlawngkai ni nga ni, 2021, April ni 23 ni asi. Cun April 23 cu St George ih puaini asi ruangah George hmin latu pawl tla “Happy feast day” tiah ka run lo cibai hai. Tuihni ih kan siar dingmi Pathian ih ttongkam pawl cu Tirhthlah 9:1-20 tiang asiih Saul ih lungthlengnak thu asi. Cun Thuthang ttha ahcun John 6:52-59 tiang pawl tla ansi. Tuihni ih kan ruah khawm tla dingmi cu “Jesuh ih zirhmi Doctrine” tiah asi pei. 

            U le nau pawl, tuihni kan siarmi thuthang ttha hi siar sal uhsi. John 6:52-59 ah cutiih a ti ruangah an lakah thinheng thu-el awknak tiang a suakih “Ziangtinso hi pa hin kan ei dingah a taksa cu in pek thei ding?” tiah an ti ciamco. An hnenah Jesuh in “thungaitein ka lo sim, Mifapa ih taksa nan ei lo ih a thisen tla nan in lo ahcun nan sungah nunnak nan nei lo ding. Zokhal ka taksa a ei ih ka thisen tla a intu cu kumkhua nunnak a nei ih ni netabik ah nunnak ah ka thoter ding. Ziangahtile ka taksa hi rawl taktak asiih ka thisen tla in dingmi taktak asi. Zokhal ka taksa a ei ih ka thisen tla a intu cu ka sungah a nung; cule keimah khal a sungah ka nung ve asi. A nungmi Pa in i thlahih amah ruangah ka nung vekin zokhal keimah i eitu cu keimah ruangah a nung ve ding. Vancung ihsin a rungttummi sangreu timi cu himi hi asi; nan pu le nan pa pawl cun sangreu an ei ih malte a hung ei ahcun an thi thotho. Asinain vancung ihsin a rungttummi sangreu a eitu ih piang cu kumkhua in an nung ding” tiah ati. Himi cu Kapernaum khua sinakok sungih thu a zirh lai ih a simmi pawl ansi” tiah asi. 

            U le nau pawl, a ngaingai ahcun doctrine timi cu zirhnak tiah a sullam a um. Asinain doctrine kan ti tikah huham a nei cuang deuh a bang; Jesuh Khrih ih zirhmi tiah tla kawh thei asinain doctrine kan bet tikah a picang deuh ngaingai asi. Asile Bawipa zirhmi doctrine pawl cu ziangmi pawl so ansi? Bawipa ih zirhmi pawl lakah himi zirhnak doctrine cu a thupibik asi. A sa ei ding le a thisen in dingmi hi a thupibik le a thukbikmi thuzirh asi. Tuihni kan siarmi ahhin “Ziangtinso hi pa hin kan ei dingah a taksa cu in pek thei ding?” tiah an ti ciamco tiah kan hmu. John 6:60 ahcun Amah thluntu mi tampi in acuih thu cu an thei tikah “A thuzirhmi hi a hartuk ual! Zo in so a thuzirhmi cu a pom thei ding?” anti ih mi tampi in a cohlang theilo, a dungthluntu pawl hmanin an cohlang theilo ih an tlansan asi. Asinain Bawipa ih thuzirh hi a dikmi asi ruangah Bawipa in a sup sallo. Bawipa ih zirhmi doctrine cu a dikmi asi ruangah yukting sal ding ti vek a ngahlo. A simmi thu cu thlarau le nunnak asi. 

            Bawipa Jesuh in “nan zatein himi hi lak uhla ei uh, ziangahtile himi hi ka taksa asi. Himi hi lak uhla in uh, ziangahtile himi cu ka thisen asi” tiah a dungthluntu pawl thawn netabik zanriah einak ah thu a pek. Tuihni kan siarmi John 6:53-58 ahcun Bawipa in “thungaitein ka lo sim, Mifapa ih taksa nan ei lo ih a thisen tla nan in lo ahcun nan sungah nunnak nan nei lo ding. Zokhal ka taksa a ei ih ka thisen tla a intu cu kumkhua nunnak a nei ih ni netabik ah nunnak ah ka thoter ding. Ziangahtile ka taksa hi rawl taktak asiih ka thisen tla in dingmi taktak asi. Zokhal ka taksa a ei ih ka thisen tla a intu cu ka sungah a nung; cule keimah khal a sungah ka nung ve asi. A nungmi Pa in i thlahih amah ruangah ka nung vekin zokhal keimah a eitu cu keimah ruangah a nung ve ding. Vancung ihsin a rungttummi sangreu timi cu himi hi asi; nan pu le nan pa pawl cun sangreu an ei ih malte a hung ei ahcun an thi thotho. Asinain vancung ihsin a rungttummi sangreu a eitu ih piang cu kumkhua in an nung ding” tiah a ti. John 6:33 ah Bawipa Jesuh in “Pathian ih pekmi sangreu cu vancung ihsin a rungttum ih leitlun minung pawl nunnak a pek” tiah asi. Cumi leitlun minung pawl hnenih a pekmi nunnak cu kumkhua nunnak asi tiah John 6:53 ah Bawipa nih in zirh asi. Curuangah Bawipa ih thisen a inlotu le a taksa a eilotu cu kumkhua nunnak a nei thei lo tiah Bawipa in fiang zetin in zirh asi. Ziangahtile Bawipa ih thisen kan innak thawngin siseh, a taksa kan einak thawngin siseh Bawipa cu kanmah thawn a um dingih kanmah khal Bawipa sungah kan nung ding asi kumkhua chatuan in. Cucu Bawipa ih zirhmi thu doctrine asi. 

            Bawipa in ei dingah le in dingah in sawm asi. Cuhlei ah ei lo le in lo ahcun nunnak ngah a theilo thu in zirh. “Nunnak nan neilo ding” in ti. Nunnak kan nei theilo ahcun “nan thi ding” timi thawn a sullam an bang aw. Adam le Eve te hnenah Bawipa in Eden hmuan lai ih a sia le a ttha thlaidan theinak thinking ih rah cu “nan eilo ding, nan ei le nan thi ding” tiah Pathian in thu a pek. A tikcucaan a kim tikah cun Bawipa in “Ei uh, in uh, nunnak nan nei ding; nan eilo, nan inlo ahcun nan thi ding” tiah in ti asi. Cun Moses ih hruaimi Israel mi pawlin nelrawn ramah Manna sang an ei ih Pathian ih tiamkammi ram ah an thleng thei. Asinain an thotho asi. Vancung ihsin a rungttummi nunnak sang a eitu hmuahhmuah cu kumkhua nunnak an ngah theinak dingah ni netabik ah nunnak ah thoter dingin Bawipa in fiangzetin thu a kam asi. Cuhlei ah Bawipa Jesuh hi a Pa Pathian ruangah a nung vekin Bawipa ih thi le sa a eitu, a intu pawl cu Bawipa ruangah an nung ding asi tiah John 6:57 ah in zirh asi. Bawipa nih doctrine in zirh asi.

            Bawipa ih thi le sa a eitu, a intu hmuahhmuah cu unau ah kan cang asi. Bawipa ah pumkhat kan cang asi. Bawipa ih thi le sa in duhdawtnak sungah in ttawnttem thluh ih pumkhat kan cang. Curuangah zumtu kannih lakah hmel mawi le hmelsia, mifim le mi-aa, milian le mifarah tiah thlaidannak a um nawnlo asi. Bawipa ih thi le sa ah pumkhat kan si. Cumi cu Bawipa ih thuzirh doctrine asi ve. 

            Maw Bawipa, Cumi sangcu in pe ringring hram aw (Jn 6:34) tiah thlacam uhsi. Nunnak sang sungah a um ringringtu Bawipa in nan zatein lo thluasuah hram seh, Amen.