Jesuh Khrih in leitlun ih arung ttumnak cu remnak hrangah silo in tthen ttheknak asi

Jesuh Khrih in leitlun ih arung ttumnak cu remnak hrangah silo in tthen ttheknak asi (October 24, 2019)

Bawi Khrih ah duhdawt zetmi Pathian ih falepawl “kan Bawipa Jesuh Khrih ih zaangfahnak veel, Pa Pathian ih duhdawtnak le Thlarau Thianghlim ih pawlkomnak cu nan zate hnenah um hram seh” tiah cibai ka run lo buk hai. Tuihni cu 2019 kum, October ni 24, Tlawngkai nilini asi ih kan siar dingmi Bible pawl cu Paul in Rome khua ih Catholic Kohhran member pawl hnenah ca a kuatnak bung 6: cang 19-23 tiang asi. Cun Thuthang ttha ahcun Luka bung 12:cang 49-53 tiang asi pei. Kan ruah khawm dingmi cu “Jesuh Khrih in leitlun ih arung ttumnak cu remnak hrangah silo in tthen ttheknak asi” ti thu asi. 

Bawi Jesuh cu rem-daihnak siangpahrang bawi asi ti kha kan rak thei cio mi asi. Asinan tuihni kan siarmi Gospel sungah cun “leitlun ahhin remnak a run keng tiah maw si in ruat? Asilo, remnak silo in tthentheknak sawn ka run keng asi” tiah Luka bung 12:cang 51 ah fiang zetin in zirh tikah Bible hi a kalh aw vekin kan hmu thei ding asi? Himi Bible bung cang te hi thei-thiam a har zetmi asi. Bible nih in sim duhmi tthen-ttheknak timi cu ziangso a sullam a um? Kan ruat khawm tlang pei uh. Mt bung 16:cang 13-17 sungah “Jesuh cu Sizaria Filipi peng ah a fehih cutawk ah a dungthluntu pawl kha mi in milai fapa hi zo asi in ti so” tiah a sut. Annih in “mihrekkhat in baptisma petu Johan asi an lo ti. A tthenkhat cun Elijah asi an lo ti, cun midang tthenkhat nih cun Jeremiah asilole prophet pakhatkhat asi an lo ti” tiah an let. Jesuh in “nannih in teh kei hi zo asi in ti so” tiah a sut. Simon Peter in “Nang cu a nungmi Pathian ih fapa Messiah na si” tiah a ti. Cutikah Jesuh in “Johan fapa Simon, mi vannei na si! Ziangahtile hi thu cu minung hnen ihsin na ngahmi asilo;vancung ih a ummi ka Pa in na hnenah a lo phuanmi asi” tiah a ti asi.

Bawi Jesuh in hi leitlun a nunlai ah thuthang ttha sim in khual a tlawn tikah mina pawl a damter, khuasia pawl a dawisuak, mangbangza khihhmuhnak pawl a tuah, mithi pawl tla a tho ter sal tikah mipi in an hmu daan, an zum dan hi an bang awlo, an tthen tthek cio asi.

Jesuh Khrih kan zum tikah siseh, amah ih Kohhran sungah kan um tikah siseh, kan inn sungsang ah rem daihnak u lo in tthen ttheknak a suak ringring, hau awknak tawh awknak a um ringring asi. Nu le pa cu Baptist si sehla, u pa bik tu cu Revival sisehla, farnu cu Gospel sisehla cun mah cu Catholic sisehla cuvek inn sungsang ah rem daihnak a um theilo asi tikha Bawi Jesuh nih in sim cia asi. A dik lo maw Bawipa ih thusim mi cu. Cun a cancan ah daan thu le Kohhran thu ah kan el awk lai ding… a cancan ahcun kan thlacam daan, kan hla sak daan, thu hla lamah kan lungawi lo zawngin cangvai daan pawl an rung pawt lai ding. A hlu peknak ruangah tla na kohhran, ka kohhran tiah an el awk lai ding. Rawl ulh thlacamnak caan a bang awlo ruangah “hnattuan buai ti lak lai ah rawl ulh thu e, thlacamnak thu e….” tiah buainak a suak thei ttheumi asi. Major Seminary ah ka um lai ah Brother pakhat khi a unau le a nu le pa in an hnong dah asi. A u pa biktu kha paingthar Kohhran pawlin sum ngahnak ttha zet ya-htoo kha a pek ih a nau le pawl siseh, a nu le pa siseh a zoh thei, a cawm thei ih hlei ah amah umnak Kohhran sungah a luhter thluh asi. A cuih Brother cu a u pa in a lem rero nain a cuih Kohhran ah a lut cuanglo ruangah an hnonnak asi, an biak aw lo asi; cutin cun a phun hra a aung tikah Minor seminary ah a lut ih UDE a ttheh tikah Major Seminary ah puithiam tlawng a kai ngah ih cun Theology a ttheh tik ahcun Puithiam Ordination a ngah asi. Puithiam Ordination a ngahni ahcun a nu le a pa siseh a u le nau pawl siseh an um thei cawk nawnlo ih mithli tlak ko in an naupa kha mipi hmai ah ngaithiamnak an dil sal asi. 

Aw…Jesuh Khrih thluntu taktak kan si ahcun nu le pa, u le nau pawlih huatnak le hnonnak hman ah kan ton a ttul asi. Jesuh Khrih in “zokhal sisehla, keimah hnakin a nu le a pa a duhdawt sawntu cu i thluntu dingah a tlak lo. Keimah hnakin a fanu siseh, a fapa siseh a duhdawt sawntu cu i thluntu dingah a tlak lo asi” tiah Mt 10:37 ah in rak zirh cia asi. 

Kan ralring ttul zetmi cu cuntin tthen-ttheknak a suak tikah “Fellowship” pawlkomnak tiah an rak pan ciamco ding asi. Fellowship ti mi hi lu-hmuh-yay hrangah cun a ttha ko nain biak-khawmnak fellowship ahcun a ttha hrimhrim lo. Na zumnak a derhdai tertu asi ti kha thei thiam aw. Lu-hmuh-yay asilole Christian nunphung in kan feh ahcun a ttha ko, a tawk ko. Asinain Pathian biakkhawmnak service an ti tikah kan Catholic daan in an thlun thei pei maw? Missa raithawinak ah siseh kan thlacamnak ah khuk an bik thei pei maw? Kanmah vekin Jesuh Khrih an zum thei maw? Kan biakin hi lenkhawmnak vekin in rak can sak pei maw? Cuvek pawl tiang ruat ding kan si asi. A rem cang dandan in um ko seh tiah a tir ihsin a shung pekin a khuan pek cih ding kan si lo asi. Tthen tthek nak le buai thlaknak a suahter sawntu ansi. Na zumnak a tlutertu, a sawn tertu fellowship sungih combine worship service kha hrial awla na kohhran kha titsa nei zetin ttang aw. Baptism na ngahni ah Jesuh Khrih thawn letthat zo mi na si kha. Pathian ih komter mi cu zovek milai khalin tthen ter hlah seh tiah asilo maw? Nangmah ih tisa duhnak thlunin Jesuh Khrih kha titsa phoh hlah aw, Jesuh Khrih parah uire hlah aw, zuva hlah aw.

RVA a ngaitu nan zate parah Pathian in a thar in thlusuahnak lo toih hram seh. 

 

Add new comment

4 + 2 =