Jesuh le Khrih (Messiah), (sim tu Rev. Fr. Peter Zin), January 2, 2021.

“Jesuh le Khrih (Messiah)”

Thuthangtha sim tu Rev. Fr. Peter Zin 

January 2, 2021.                                                                                                       

Siarding: 1 Johan 2:22-28; Ps.98:1-4; Johan 1:19-28.

          “Jesuh cu Messiah a si lo, a titu poh cu thuphanpertu a si. Cupa cu Khrih ih Ral a si ih Pa le Fapa a hnongtu a si. Ziangahtile, Fapa a hnongtu cun Pa khal a hnong a si. Zokhal Fapa a pomtu cu Pa khal a pom ve.”

          Falam RVA service in Thuthangṭha a ngaitu Bawi Khrih ah duhdawtmi nu le pa, u le nau pawl, ‘Happy New Year’ tiah a hmai sabik ah cibai ka lo buk hai. Pathian lam hruainak in 2021 kan thleng thei ih thluasuah in pe tu, in kilkhawi ringring tu Pathian kan thangṭhat ih a hnen ah lungawi thu kan sim. Tu kum 2021 khal ah Pathian in thluasuah in pek in in kilkhawi cio sehla a mah duhnak vek in a nung thei sinsin tu kan si theinak dingin a mah Pathian in thazaang a tharin in pek cio hram seh. Cun 2020 sungah ninghang, riahsia, vansang in a um tu pawl, 2021 cu nan hrangah lungawi kum, Jesuh Khrih nan zumnak thawng in hnangam kum si hram seh tiah thla ka lo cam sak. 

          Tuni January 2 (Zarhte ni) ih a veikhatnak ah kan siar ding mi Bible cu 1 Johan 2:22-28 tiang a si ih Jesuh cu Khrih asilole Messiah a si nak thu simnak le Khrih ah pehzom aw ringring ding in forh aw nak a si. Kan siar ding mi Saam hla cu number 98:1-4 tiang a si ih lungawi nak thawn a rundamnak, mangbangza a tuahnak le a huham thawn a ral nehnak pawl hrangah Pathian hnen lungawi thusimnak le a mah thangṭhatnak hla asi. Kan siar dingmi Gospel cu Johan 1:19-28 tiang a si ih Baptisma petu Johan in a mah hnak in a tum sawn mi pa a dungah a ra lai tiah Jesuh Khrih kha khih hmuh in tette a khan nak  thu a si. 

          Kan nih Christian pawl hrang ah cu Jesuh Khrih tiah Jesuh le Khrih kom cih in kan ko ṭheu. Asinan mi hrek khat hrangah cu Jesuh le Khrih hi an hmuh daan asilole an pon daan a phun dang. A mah Bawi Jesuh san lai in kan zoh thok ding a si le, Jesuh cu kan Bawipa ih a hmin, a nauhak te lai in an ko mi hmin a si ih a mah a thei tu Jew miphun pawl in a mah cu Jesuh a si ti an thei. Asinan Khrih a si ti an thei lo, an pom thei lo asilole an pom duh lo. Jesuh cu an thei. Khrih a ra ding tikhal an thei. An theilo mi cu Jesuh cu Khrih asi ti an thei lo. Tuni kan siar mi Gospel sungah Jew miphun hotu pawl in puithiam hrekkhat pawl le Levi mi pawl kha Johan hnen ahcun an thlah ih, ‘zoso na si?’ tiah an va sut ter. Johan in ‘kei hi Messiah ka si lo,’ tiah fiang tein zapi theih ah a sim. Ziangruangah ah Johan in Messiah ka si lo tiin a let tisile mi tampi in a mah kha Messiah ah an ruat ruang ah a si. Cun Johan in Messiah cu a dungah a ra lai ih a nih cu a lam sial sak tu men lawng a si tiah khal fiang te in a sim.

          A caancaan ah Khrih kan ti, a caancaan ah Messiah kan tiih a thei lo tu hrang ah cu a hnok dueh men thei. A thei lo tu pawl hrangah mal lai hrilhfiahnak tuah ta ka duh. Khrih le Messiah hi a sullam a bang aw mi a si ih ‘hriak culh mi’ tinak a si. Khrih cu Greek ṭong in a ra mi a si ih Messiah cu Hebru ṭong in a ra mi a si. Cun ‘Jesuh’ timi cu ‘saviour- rundamtu’ tisilole ‘God saves -Pathian in a rundam’ tiin a sullam a nei. Jesuh cu Messiah a si le si lo ruahnak dangdang a um ruangah tuni kan siar mi Bible a veikhatnak 1 John 2:22 ah ziang a ti tisile ‘Jesuh cu Messiah a si lo, a titu cu thuphanpertu a si. Cupa cu Khrih ih Ral a si ih Pa le Fapa a hnongtu a si,’ a ti. Pathian in Messiah a thlah ding ti a zum na tein, a tu tiangah Jesuh cu Khrih a si, Messiah a si ti a zum lo tu khal an um lai a si.

          Kan nih zumtu Christian pawl in cu Jesuh cu Khrih a si tiah kan pom mi a si. Natein Bawi Jesuh a zumtu lak lala khal ah kan hmuh daan, kan zum daan a dang aw mi tete khal a rak um phahphah lala. Mi malte in ziang an ti ti sile Jesuh cu minung menmen a si ih Jesuh sungah Khrih kha a lut asilole a um ti vek in an sim. Jesuh kha mi dang, Khrih kha thil dang pakhatkhat vek in an hmu. Asinan kan nih hrangah, kannih ih zumnak asilole zirhawnak ah cu Jesuh le Khrih hi ṭhen theih asilo ih pakhat lawng asi. Tuni ah kan siarmi khal ah Jesuh sungah Khrih a um a ti lo ih “Jesuh cu Messiah a si lo, a titu poh cu thuphanpertu a si. Cupa cu Khrih ih Ral a si ih Pa le Fapa a hnongtu a si,” a ti. Sim duh mi cu Jesuh cu Messiah a si tinak kha a si.

          Thlarau thazaang kan lak dingah lo sawm ka duh mi cu a pakhatnak ah thuthangṭha kan simnak, kan hnaṭuannak pawl hi mah ih hmin ṭhatnak, mah ih ruahnak, duhnak vekmen silo in Baptisma petu Johan vek in Messiah hang ah thusim le hnaṭuan ringring ding kan si. Mipi in a mah kha an pan asinan a mah in mipi kha Messiah hnen lam ah feh dingin lamzin a hmuh a si. Cun a pahnihnak ah Bible ngantu Johan in ziang a ti tisile, ‘ka fa le pawl, Khrih thawn nan pehzom awknak ahcun hmun ringring ko uh; cuticun amah a rat tikah ralṭhatnak in kan khat dingih a ra thlen ni ah ningzak ih a hmai ihsin kan relh rero a ṭul lo ding,’ a ti. Nitin kan nunnak ah Khrih hrangah a nung theitu, Khrih thawn a nung theitu si thei ding in Pathian hnen thluasuah dil in zuam ringring uh si. Pathian in kan ṭul sam mi thazaang in pek cio hram seh.

Fr. Peter Lal Zin Thang (Hakha Diocese)