Jesuh Tel Lo Cun (sim tu Rev. Fr. Lucas Sum), January 6, 2021.

Jesuh Tel Lo Cun

Thuthangtha sim tu Rev. Fr. Lucas Sum 

January 6, 2021.

          Thuthangttha ngai tu, nan umnak cio ah Pathian in kumthar thlawsuah, a hleice in damcah nak, lo pe hram seh.

          Tui ttumah Jesuh tel lo cun timi thu thawi ten ruat khawm tlang uh sih. Hmaisa ah Pathian ttongkam ngai ta hrih uh si.  

          Marka 6: 43 - 52 “Cui hnuah zamrang tein Jesuh in a dungthluntu pawl cu long sungah a luh ter ih tili khat lam ral Bethsaida ah a hmai ah rak feh sung dingin a thlah. Cule misenpi pawl cu a tlun ter. Damten va tlung uh a ti hnuah tlangpar ah thlacam dingah a feh. Khua a thim tikah long cu tili laifang a thlengih Jesuh cu amah lawng ten tlang parah a um lai. Thli kha an mah lamih a hran ruangah a dungthluntu pawl in long an hlau tikah harnak tampi an tong ti kha a hei hmu. Curuangah zinglam nazi pathum le paruk kar lakah an hnenah cun, ti par in a va feh. An kiang a tlen tikah lan san a tum, asinan ti parih a feh kha an hmu. Mithla ah an ruat ih an thin phang in an raak ciamco. An hmuh tikah an zaten an ttih ngaingai.

          Hma khat te ah Jesuh in ‘Nan thinphang hlah uh! Keimah so khaw ka si,’ tiah a ti. Cule long sungah an hnenah a vung lut ih thli cu a dai. Dungthluntu pawl cu an mang a bang zet, ziangah tile mi thawngnga rawl a daarnak kha a sullam an thei thei lo, an thinlung in a ruat ban lo a si.”

          Zumtu u le nau, Bawi Jesuh in mi tu ih kan siar mi Baibal sung ihsin kan hrangih a thupi zet mi thu pa hnih in zirh. Tawi ten von ruat khawm hrih uh si. 

          Pakhatnak ih in zirh mi cu “thlacam ih thupitnak” a si. Nitin kan nunnak ah mitampi cu thlacam a ttul lo, thlacam khal ka thiam lo, kan tiih thlacam dai thlang in kan um pang ttheu. Mitu ih kan thei vek in Bawi Jesuh in a dungthluntu pawl cu Bethsaida ah feh ding in a thlah. Cun a thuthangttha sim mi le zirh mi ngai tu mipi pawl khal a tlun ter ttheh hai. Zo hman a hnenah an taang nawn lo. Cun Jesuh cu thlacam dingin tlangpar ah a feh a si. Ziangruangah Bawi Jesuh hi Pathian ih fapa rori a si nan, thla a cam a si pei, timi ruah ding tampi a um. Thla a camnak san hi tampi a um. Cumi tampi sung ihsin, pakhat a si ve mi cu, thlacam a thupi tuk, nan nih khal thla cam ve ringring uh, timi in zirh duh ruangah a si. Thlacam a thupit le a ttul ih rungah a mah Bawi Jesuh rori hman thla a cam ttheu a si. A mah rori khal in hi tin cam uh tiah in zirh. Cumi cu ‘Vancungih Um Kan Pa” timi thlacamnak a si. thlacamnak hmuahhmuah lak ih a ttha bik thlacamnak a si. Mi vek ih thlacam kan thiam lo a si hman ah ‘Vancung ih Um Kan Pa’ timi thlacamnak te tal cu kan cam hrimhrim a ttul a si. 

          A pahnihnak ih Bawi Jesuh ih in zirh duh mi cu ‘a mah Jesuh thawi kan um asilen thla a muang ih a mah Jesuh thawi kan um lo a si ah cun  thla a ttem’ ti mi a si. Ttongdang ih kan sim asilen Jesuh thawn kan um asilen khuavang sual sawmnak in in neh thei lo ding, tinak a si. A dungthluntu pawl hi Bawi Jesuh thawi an um tlang ah cun ziang hman ttih le thlaphan ding an nei lo. Asinan, Bawi Jesuh cu amah lawng tlangparih thla a cam lai ah a dungthluntu pawl cu long sungah an um ih thli a hran ih ti suar a leh tik ah an thin a phangih an thla a ttem. Asinan, Bawi Jesuh cu an long to mi sungih a vongluh ve cun zianghman an ttih nawn lo. An hnga a ngam tuk.

          Cun Johan 20: 19-23 sungah khal ah hitin kan hmu: “Nipi ni zanlam ah dung thluntu pawl cu hmunkhat ah an tong aw. Judah mi hotu pawl an ttih ruangah sangka hmuahhmuah an khar ttheh.” Zumtu u le nau, Jesuh an hnen ih a um lo ruangah an thla a ttem. An ning a ttih. Cathianghlim in hi tin in sim bet: “Cu mi lai fangah “Jesuh cu a ra lang ih an mah lak ah a ding in ‘Nan hnenah daihnak um ko seh’ a ti. Cu mi ttheh cun dungthluntu pawl khal thlarau thianghlim an co ih ziang hman an ttih nawn lo. an hna a ngam tuk.

          Zumtu u le nau, thlacamnak thawn Pathian naih sinsin uh sih. Thinlung, thlarau, pumsa hna ngamnak cu Pathian hnen lawngah hawl ciau uh sih.

Nan zaten Pathian in lo umpi ringring hram seh! Amen.