Jesuh Thawn

Rev. Fr. Lucas Sum ih thuthangtha sim mi (April 4, 2020 - Zarhte ni)

Siarding: Jn 11: 45 - 56

Upatmi zumtu u le nau, Pathian ih remdaihnak nan hnen ah um hram seh. Hmaisa ah Baibal cathiang kan ngai tlang pei.

 Johan bung 11: cang 45 - 48: “Mari topi dingih a ra mi mitampi in Jesuh ih thiltuah mi pawl an hmuh tikah amah cu an zum. Asian mihrek cu Farasi pawl hnenah an kir ih Jesuh ih thil tuah mi cu an sim ttheh. Curuangah Farasi pawl le puithiam upa pawl cu Khonsil pawl thawn an tong aw ih, ziang so kan tuah ding? Hipa ih mangbangza a tuah vivo mi hi zohhnik uh. Hitiih kan zoh men ringring a si ahcun mi hmuahhmuah in amah hi an zum dingih cutikah Rom cozah pawlin kan Biakinn le kan miphun an siatsuah theh ding a si, tiah an ti.”

Zumtu u le nau, mi tu ih kan ngai mi cathiang hlim sungah a thu pi bik in ziang kan hmu a si tilen, mitampi in Jesuh ih mangbangza a tuah mi pawl an hmuh tik ah Jesuh cu a zum, timi a si. 

A Sinan a zum lo tu pawl khal an um ve. Cumi a zum lo tu pawl cu a bik in Farasi pawl le puithiam pawl an si. Hi Judah hotu pawl hi mi ik siknak thinlung nei mi le mi  tha lo an si. Jesuh an zum duh lo lawng siloin Jesuh thah tiang an tum a si. Hi tin kan Baibal in fiangten in sim: “Cuih ni thok in Judah hoto pawl cun Jesuh thah dingah phiarnak thu an ruat a si, a ti. 

Hitivek ih Jesuh cohlang thei lo ih thah tiang an tum ruangah Jesuh cu riah sia zet in a um. Curuangah Judea peng ah khual tlawng nawn loin a suak ih nelrawn kiangah a feh ih a dungtluntu pawl thawn an um, tiah Cathianghlim in in sim hrih.

Zumtu u le nau, Jesuh cu Judea pengah khual tlawng nawn lo in a suak timi te hi a poi bik mi a si. Jesuh “khual a tlawng” timi te hi mal ten kan ruat tlang pei. 

Jesuh ih khual tlawn le midang milai pawl ih khual tlawn khi kan tah tthim tikah bang awk lonak a um. Leitlun ah hin ziangruangah lolen zawih hrangah khual kan tlawng? Kan nih lei tlun mi pawl ih khual kan tlawn khi, a ruang cu, kan maih hrangah lawngah a si bik theu. Asinan, Jesuh cu khual a tlawn tikah a maih hrangah pakhat hman a tel lo. A tlawnnak khua le ramih um mi thuthangttha sim ding, khuavang dawi suak ding, mina pawl dam ter ding, mit caw pawl khua hmuh ter ding, hna set pawl thu thei ter ding, ke zeng pawl feh ter ding tivek pawl hrangah a si. A tawi zawngih kan sim a silen mipi hnenah rundamnak thuthangttha sim ding le thluasuah pe dingah a si. 

Zumtu u le nau, Jesuh in Judea ramih a mah a zumduh lo tu mipi pawl a tlawng duh nawn lo ih an hnen in a suak, tiah mi Baibal ih in sim te hi kan hrangah tthih nung za ngaingai a si. Tuicaan ah hin Jesuh in kan umnak leilung pi ah siseh, kan inn sungsang ah siseh, mipkhat ciar ih nitin kan nunnak ah siseh, in tlawng duh nawn lo pang ding, kan hnen ihsin in feh san pangding ti hi phan a um tuk. Jesuh ih in tlawn nawn lo a si ah cun thlawsuah malsawm kan co nawn lo ding tinak a si. Leitlung ah hin harsatnak a phunphun kan tong ding tinak khal a si. 

Sihmanseh lah zuntu u le nau, Jesuh in nang le kei ih duhdawt tuk ih ruangah nitin kan nunnak ah a phunphun in in lengih thlawh suah in pe ringring a si. Tahtthiamnak ah milai pakhat khat ih hnen ihsin thatnak kan ngah nak, cun nitin nunnak in peknak tivek pawl in kan thei thei a si.

In duhdawt tu Jesuh Khrih hnen ah lungawi thu sim in thangthat ringring uh si.

Zumtu nan zaten, Pathian in van thlawsuah le leithlawsuah lo pe hram she. Pathian in kum khua in lo umpi ringring hram she. Amen.