Jesuh thlun duhtu pawl (sim tu - Rev. Fr. Pius Kei Lian Cung)

Jesuh thlun duhtu pawl

sim tu - Rev. Fr, Pius Kei Lian Cung

(September 30, 2020 )

Lk 9:57-62

RVA Falam Service in Thuthangtha rak ngai theutu u le nau pawl, Bawipa ih remdaihnak le lungawi hnangamnak thluasuah, nanza te parah a thar in thlenghram seh. Sep ni 30 cu mithianghlim Jerome ih puaini a si ih Jerome hmin a nei tu pawl hrangah a cuangce in thla kan camsak cio pei tiah ka lo sawm. Mithiang Jerome cu kumtampi sung Cathianghlim, siartu, zirtu lettu a siih, amah zohthim in kannih khal Bible Cathianghlim hi, sunloih in upat u si. Pathian tongkamnung hi hal in, hawl u si, Uar u si. Tuini ih kan siarmi thuthangtha  Lk 9:57-62 sung ihsin “Jesuh thlun duhtu pawl” thu ruatkhawm tlang u si.

A ngaingai tiah cun “Jesuh thlun duhtu pawl” thuhla hnakin ‘Jesuh thun taktak tupawl’ thuhla cu a thupi sawn ih, uar a um deuh. Asinan kan Bible cauk sung hrimhrim khalah “Jesuh thlun duhtu pawl” ti in thulu in pe cia. Jesuh thlun tu taktak si ding cun thlunduh  a tul hmaisa. Cun thlun taktak tu si lo ih thlunduh tu lawng simen khal a tawk cuang lo. Ka nauhak laiah kan pa le hrekkhat hnenih sin ka rak theihdah mi cu “Pathian cu, tuahhlah a timi le tuahuh a ti mi a tam, mitha fekfek si ding mi a fial, a duh a khungtuk, minung ih thluncawk khal a si lo” an ti. Tubai te ah kan sarthar mino hrekkhat ih in timi khal Pathian cu mi hnahnok tu a si. Kan nunzia le tongkam a zoh,  kan ruahnak tiangin a cek tluh, mi hnahnok le mikharhmar tu a si, a thuhla tam theih lo hi hna a thiang sawn an ti. Cu kel tete aw ka ti ruangro ko. Asile Jesuh hi mi ti kherkher, le komhar maw a si, mitha, mi duhdaw tu le pawlkom nuam ha a si deuh. Jesuh thlun duh lo tu pawl cun Jesuh hi miti fekfek, duhkhung nei le komhar hnahnok in an hmu ko ding nain, Jesuh thlun taktak tu pawl cun Jesuh cu mitha, duhdawtthiam le komnuam, umpinuam zet in an hmu ve. Thlun suak lo ih thlunduh fangih tanglan taah tel pang a ol te. Lk 9:57-62 sungih “Jesuh thlun duhtu mi pa (3)” thu hi zumtu kan zate hrangah theihfiang a thupi nasa.

1) Nunnomh duh ruangih Jesuh thlun a ngah lo. Mi pakhat in Jesuh hnenah “na fehnak kipah ka lo thlun ding” a ti. Jesuh in “cinghnia pawl in kua an nei, vate pawl in bu an nei, Milai fapa cun riahnak le lu retnak hmun khal a nei lo” tin a let. Tulaifang ramuknak hrangih hril awknak a um can ah hin mitampi in kan party vote uh, mee in pek uh, cumi kan lo pe ding, cutin kan tuan ding tiah a phunphun thu kam in minung an hawl, mi an lem. Cozah zung le company pawl khal in kan hnenih hna nan tuan le lakkha cuzat nan ngah ding, thanso nak le hlawknak a phun2 nan co ding tiah minung tam ngah thei ding in kyawngia thatha an hmang. Jesuh cun inn nei lo le ihnak ding hmunhma tha nei lo dinhmun ka si i thlu uh, a titikah thluntu tampi a ngah thei pei maw. Na mi sawmdan mak lo tuk, cuvek dinhmunpi cu zosi lo thlun paih dingih ti a ol te. Cawinn menah a suak, hnarpawn khawleng men ah a thi, ih midang thlankua tuahcia menah vui a si. Lu retnak ding hmunnei lo tiangih Jesuh a suah le a thih hi, minung thinlung sungah Jesuh in hmunhma a rak ngah lo ruangah a si.                    

                    Thuthangtha simtu tampi cun Jesuh zum hi, lennak, thansonak, hminthannak, kumkhua nunnuamnak, rundamnak, ngaithiamnak thu lawnglawng sim a si theuih, ngainuam le lungkim zetih Amen pek rero a tam. Nunnomhnak duh ruangah maw Jesuh hi kan thlun.  Jesuh cun a hmaiah thinglamtah a hmu ih, zonzaih harnak le thihnak a tuar ding khal a sim cia. A dungthluntu pawl khal mai thianglamtah phur ding in zirh ih, a mai hmin ruangih harnak, hremnak ton ding khal tampi in sim cia. Nunnuam huahhi men ih Krifa si mai hi kan tumh dingmi a si lo. Harnak phunzakip lakah Jesuh parih kan zumnak fekten kai hnget in, a hminin tuartheinak thazaang la u si. Jesuh in in tuarpi ve a si. Kan Bawipa Jesuh cu minung thinlung hmufiang tu a si ih, na fehnak kipah ka lo thlun ding titu pa ih thinlung khal fiangten a hmu. Thinlung tak tel lo, awkam mawinak men ih ka lo thlunding titu pawl ih thinlung le nunnak ah Jesuh in umnak hmun a nei lo. Harnak tampi lakah mantha zet le Pathian thutum tampi a um ti thei in inn nei lo, luretnak le riahnak hmunh thitha nei lo Jesuh cu  lungkimzet le thatho ten thlun ko u si. Nelrawnramcar ah Jesuh vakvai rero ter siang loin kan thinlung, kan thlarau le kan nunnak ah umnak tha thluninn pe cio u si.

2) Jesuh thlun hi neta ah ti men a ngah lo.  Mipakhat hnenah Jesuh in “i thlunaw” a ti. Cupa cun “Bawipa ka pa ka va phun hmaisa pei” a ti. Kum upapa thih hmaisa timi tong a um nain, thihcan ngaingai a thlen ah cun upa maw nauta kan thi hmaisa deuh pei ti zohman in kan sim thei lo. Nunnak petu Pathian kutsungah a um ih a mah lawng in a nei, a thei. A pa hnakin a mah tla a thi hmaisa sawn thei. “Mithi cu mithi pawl in phum hai seh, nang cu Pathian uknak phuangsawn aw” tiah Jesuh in a ti. Pathian uknak cohlang duh lo le Jesuh ih thupek mi zum thei lo pawl cu thlarau lam in mithi an si. Himi pa khal Pathian uknak hrangih a nun, a caan a pek lo ah cun,  mithilak ih mithi pakhat a si ve thlang ding. Pathian uknak hrang le Jesuh thlun hi neta ah ti hrimrim a ngah lo. Pa a thih ih famkim tei a ruak vuisak ta hnakin, mai nunah Pathianuknak co hlang in, Pa a thih hlan ah paihnen ih va sim tu ding si hi a thu pi sawn tuk ko lo maw. Innsang tulnak tampi kan nei cio ding nan, Pathian uknak thuthangtha hi kan tulbikmi le kan thupitbikmi a pakhatnak si ringring thei hram seh. 

3) Thinlung thukthun le dunglet hoi phah in Jesuh thlun a ngah lo. Mi pakhat in “Bawipa ka lo thlun ding a sinan ka sungkhat pawl ka vabiak ta pei” a ti. Jesuh in “zokhal dunglet hoiphah ih lei a let tu cu Pathian uknak hrangah san a tlai lo” tiah a ti. Unau sungkhat le rualpi maw thupi deuh cumi hmuahhmuah in petu Jesuh ha a thupi deuh. Thuhla dang siaherhmi tampi neih le thinlung botcat theilo, laklawh ih Jesuh thlun tum cu lamtluangte ih nun a theih lo. Sung le khat pawl in rak siang lo hai seh le tulsal men ding khi  a si. Unau sungkhat thawi biakawk maw Jesuh thawi biakawk so a thupi sawn. Jesuh thlunthei lo ding in in dirt u le a peng in hoi ter tu pawl minung le hlawnthil pawl hi theithiam u si. Kan mai tulnak le duh dan Jesuh hnen sim hmaisak rero hnak in a mai in simmi ngai hmaisak ding hi kan hrangah a thupi tuk. Kan mai tampi kan tong mi hnakin Jesuh nih kan hnenih a tong mi tampi ngai hi a hlawk, a miat sawn. Pathian uknak hmuhfiangnak a si. 

Duhdawtmi u le nau tuisun ah hin Jesuh hnenah “ Bawipa na fehnak kipah ka lo thlun ding” kaa khat ten rak ti ve hnik. Jesuh ih a lo sawn dingmi cu “Ka feh duh nak bik cu nangmai thinlung a si” tiah in sawn ding a si. Bawipa a hmin sunglawi sin seh, Amen. “Jesuh thlun duhtu pawl” simen lo in ‘Jesuh thun taktak tupawl’ si cio u si. Bawipa ih tongkam ngainak ah lungawisopar theitu siding in le Bawipa ih uknak le thuthangtha theisin tu le phuangsuak sinsin theitu si dingin Mithianghlim Jerome; kan mai hrangah thla in cam sak aw, Amen.