Jesuh thluntu, sitheinak pa(3) (sim tu Rev. Fr. Pius Cung)

Jesuh thluntu, sitheinak pa(3)

Thuthangtha sim tu Rev. Fr. Pius Kei Lian Cung

November 4, 2020

Siarding: Filipi 2:12-18; Lk 14:25-33.

Pa le Fapa le Thiang Thlarau hminin, Amen. Bawipa ih pekmi damnak le lungawinak cu nan parah thleng hram seh. Nov 4, ih thuthangtha kan siarmi Lk 14:25-33, sungin “Jesuh thluntu, sitheinak pa(3)” kan hmu. Bible kan ngai hmaisa pei. Lk 14:26 “Zokhal siseh ka hnen a ra ih a nu le pa, a nupi le fate pawl, a u nau le a farnu pawl le amah le amah khal keimah hnak ih a duh deuh a si ahcun ka dung thluntu a si thei lo ding.”  14:27 “Zokhal sisehla amah ih thinglamtah phur tahratin ka dungih i thlun lotu cu ka dungthluntu a si thei lo ding.” 14:33 “Nan neihmi hmuahhmuah nan tanta lo ahcun keimah ih dungthluntu nan si thei lo pei,” tiah Jesuh in a sim. Ka dungthluntu nan si thei lo ding tiah vei 3 rori in simih a thupi tuk tinak a si. Minung, Thinglamtah le Neihsiah hlawnthil pawlhin Jesuh dung thlun thei lo ding in, in donkham, in cawlhkalh theu a si. Jesuh ih dung, tluangte ih thlun theitu si dingin thu pa(3) kan ruat tlang pei.   

1) Milai hnak in, Jesuh duhbik ding;

            Jesuh in “khat le khat duhdawt aw uh” tiah veitampi in sim. A si nain  Jesuh a mah hnakih minung kan duhdawt deuh ding cu Jesuh in a duh lo, in siang lo. Jesuh a mah rori kan duh bikmi si ding a duh. Jesuh cu Duhdawtnak a si ih, kan hnen ih si in in dil mi khal duhdawtnak a si. A thinlung, a nunnak le a sinak hrimhrim in duhdawtnak  hi a hal, a hawl. Duhddawtnak cu kan thinlung sungin a thok. Adam cun Pathian hnakin a nupi, Eve a duhdawt sawn ruangah Pathian tongkaa hnakin  a nupi ih thu a rak thlun sawn. Pathian hnakih minung duh sawn hi sual a rak thawhkehnak, sual hrampi a rak si. Curuangah a si, “keimah hnak in nupa, nufaa le unau, nan duh sawn ah cun ka dungthlun tu nan si thei lo in ti.             

            Kan nu kan pa, kan innsang fa le suahpi unau, rualpi pawl hi Jesuh hnen in hruaitu an si thei ih, Jesuh thawn in hla tertu khal an si thei. Kan khawm pei, ti canih rualpi thawn lenvah kan tum ti men ih khawmpelh men tivek  tlahi  Jesuh hnakin rualpi kan duhsawn tinak si mai. Nulepa in fa le cu kan duhdawt cio. Asinan Pathian duhdan ih kaihruai lo le, an mai duhdan kan thlunsak, kan duat a si ah cun Pathian hnak in minung duh sawn kan cang ding. Mah le mah kan duhawk hnak in Jesuh amah duh sawn ding Bawipa in fial. Kan mai duhnak, innsang le rualpi midang duhnak hnakin Bawipa duhnak hi hawl sawn in, hril sawn u si. Jesuh hi kan nunah a pakhatnak si ringring hram seh.  

2) Mai thinglamtah put ding;

Jesuh in nan mai thinglamtah phurin i thlunuh in ti.  Thinglamtah timi cu zanthing a tung le a phei thuahaw, kalhaw ih kan ret le Thinglamtah  a cuang. A tung le a phei antonawknak ah hri in maw kan tem, tlawngkhen in maw kan khen tikah thinglam tah kan ti. A tung kha a phei in a tan a phei khal a tung in a kalh ve. Phundang in kan sim a si le a tung le a phei timi cu kahral aw an sinan, hmunkhat teih an tonawk tikah thinglamtah ah a cang. Dai aw lo ih a dang veve ih retah cun thinglamtah a si lo. A tungveve ih ret tlang le a phei veve ih ret khawm men in  thinglamtah a cang thei lo.  An kalhaw nan, an tongaw. Pathian ih duhdan le minungih duhdan khal a ralsan aw theu.  A pahnih kan kom khawm, kan tongaw ter a si le kan hrangah thinglamtah a si. Pathian duhnakvek ih thlunthei famkim khal kan um loih, minung duhnak lawnglawng thlunih nun mai khal a ngah lo. Curuangah kan put dingmi kan thinglamtah cio hi theifiang a tul zet. An tumsen khal an bangaw lo ding, an rihzan khal an dang aw cio ding. Va dangaw ko hai seh, pakhat cio cu kan nei.                            

Tuini Bible veikhat siarnak, Fi 2:13 ah “A mah tumtahmi duh dingah le nan tuahsuak dingah Pathian cu nan sungah hna a tuan a si” in ti. Pathianih tumtah mi kha kan duh a tul ih, kan tuan suak a tul. Kan ruahmi, kan tuahmi le kan tongmi ah hin kanmai palungtummen in, tongmai, tuah mai ding kan si lo. Pathian ih duhdan sutrawnta in khawkhan lairel, nunzia neih u si . Thatlonak tuahduh can le tongkha thawi camriam duh can khalah Pathian ih duhdan khan kan mai duhnak kha kan tanter dingih thatnak le thluasuah peknak ah kan cangter thei ding a si. Himi duhdan a kalhawmi Pathian thutum le minung thutum hi kan koptlang ter ding, kan khenbet dingih, duhnak pakhatah kan kom ding. Kan thinglamtah ah a cang. Cutik lawngah Jesuh dungthlun a theih.  Jesuh nih Pa ih fialmi vek in ka tuan, i thlahtu ih thu ka ngai a ti rero vek in Pathian duhnak ih lungkimve thei, Pathian thutum ih “aw, elaw, siseh” ti thei huahho mai nun hi kan put dingmi thinglamtah a si. Cui nun nei ih Jesuh thluntu cun,  Fi 2:15 ih, “Van ih arsi tleu bangin leilung mi lakah tleu uh” in timi famkim tertu kan si ding. Kan thlacam theu mi tlahi mai duhmi lawnglawng dil rero loin a mai duhdan theihthiam ding le tluntheinak ding in dil u si. Pathian duhdan le kanmai duhdan a laiah tongaw ter in kan tem fek, kan khenhnet a si le, leipar ah arsi kan si ding. Fi 2:16, ih Paulih tongmi “Ka hna tuannak le taimak ka suahnak pawl hmuahhmuah hi a lak an si lo” a ti mi cu kan bulhlim ta ah a cang ve ding a si.

3) Hlawnthil hnakin Jesuh duhbik ding;

            Neihmi hmuahhmuah tanta ding in fial. Jesuh cu khaw khat hnu khawkhat, khual tlawng vivo in Vancunguk nak thuthangtha a sim. Puantom le tulhai mi pawl ritzet in a phur rero lo. Kulii hmang khalin a phurter cuang lo. Kan thlun dingmi pa cuvek a si laiah bawmpi khat thilrit phur in maw kan thlun ding. Tanta uh in ti zawk rero nan, tam deuhdeuh khawl le, ken le phurh kan tum deuhdeuh. A dung kan thlun khawsuak thei pei maw. Rannung le ramsa pawl khal hmunkhat in hmundang ah an cer theu. Asi nain thilrit phur in  an cer lo, thiltam phur phah in an vai lo. Minung cu khual kan tlawn le kansam, kan hmai, kan mit le kan hmur tuamhlawm ceimawi nakding hmanah dip fate a khat. Jesuh hnak in kan mai mawinak a langsawn pang kei. Job cun tak lawngin ka piang ih tak lawngin ka kirsal ding a ti.    Leipar kan nunsung cu lei thilri hi kan tul ko, Jesuh khal in kan tulzia in theihsak tuk ve ko. A si nain leitlun thilri sumsaw, innlo thuamhnaw pawlhi, Jesuh hmuthiam lo dingih in phentu tla ah an cang pang kei. Phurrit le kekar fuung tertu an cang pang kei. Minung in thil pakhatkhat kan duh, kan uar cun kan thinlung sungah a cam, kan ruahnakah a tam.  Jesuh in cui kan ruahnak le kan thinlung tiang ah hmunhma lak a duh. Hlawnthil sumsaw hnak in Jesuh hi kan duhbikmi, kan ruah bikmi Kan thinlung muril ih hmun luahbik tu sihram seh. 

Kan mai duhnak kha mal ter sin in, Jesuh kan duhnak hi thanglian vivo hramseh. Kan mai duhnak famkim ter hnakin Jesuh ih duhnak sawn hi famkimding le tuansuak thei zuam hram u si. Kan duhbik dingmi cu “Jesuh le  a Thinglamtah” a si, Amen. Pa le Fapa le Thiang Thlarau hminin, Amen.