Jesuh Ton Cu Thlengawknak (sim tu Rev. Fr. Peter Zin), January 3, 2021.

Jesuh Ton Cu Thlengawknak

Thuthangtha sim tu Rev. Fr. Peter Zin

January 3, 2021

 Siarding: Isaiah 60:1-6; Efesa 3:2-3, 5-6; Matthai 2:1-12                                                                                        

          “Mifim pawl cu Pathian in an mang ah Herod hnenih kirsal nawn lo dingin a sim ruangah lamzin dangin an ram ah an tlung.”

          Falam RVA service in Thuthangṭha a ngaitu Bawi Khrih ah duhdawtmi nu le pa, u le nau pawl, a hmaisa bik ah Bawipa ih tleunak cu nan par ah tlang seh la nan nunnak cu mawi sinsin hram seh tiah thla ka lo cam sak. Tuni 2021 January 3 (Zarhpi) ni ah “Mifim pathum puia” asilole “min-tong-paa-puai” tiah kawl le lai in kan ko ṭheu mi, mirang in “Epiphany of the Lord” tiin an timi puai kan tuah a si. Kan lai ṭong le kawl ṭong in cu ‘mifim pathum puai’ tiin kan ko ṭheu ih mifim pathum pawl ih puai kan tuah vek khi a bang ṭheu. Asinan mirang in ‘Epiphany of the Lord’ timi kan zoh asile, ‘Epiphany’ timi cu Greek ṭong in a ra mi a si ih a sullam cu ‘langternak’ ‘phaw-piah-chin asilole ṭhin-shia-piah-chin’ tinak a si. Curuangah tuni kan tuah mi puai hi ‘Bawipa ih langternak puai’ tiah kan ti thei ding. Hi langternak timi cu a hlan ah miih hmu dah lo mi thei dah lo mi kha langternak a si. A hlan ah zohman ih hmu dah lo mi le a um dah lo mi, Pathian sinak in minung sinak a lak mi Jesuh Khrih kha minung hnen ah Pathian in mithmuh thei in a langter ruang ah Pathian hnen ah kan lungawinak, kan thangṭhatnak puai kan tuah nak ni a si.

          Tunni ah kan siar dingmi Bible pawl cu veikhat siarnak ah Isaiah 60:1-6 tiang a si ih Jerusalem parah Bawipa ih tleunak cu ni bangin a tlangnak thu asi. Veihnih siarnak ah cu Efesa 3:2-3, 5-6 tiang a si ih hlan lai ah thuthup a rak si dah mi kha a tu ah cu miphun zate hrang ah phuan a rak si zo nak thu a si. Gospel cu Matthai 2:1-12 tiang a si ih nisuahnak lam ih Mifim pathum pawl in naute Jesuh an hawl ih an biaknak thu asi.

          Mifim pathum te ih Jesuh an va tonnak thu mal lai kan zoh sal ta hrih pei. Naute Jesuh cu Herod siangpahrang a si lai ah Herod ih ukmi ram sungih Bethlehem khua ah a suak ih a suak hnu rei lo te ah nisuahnak lam ihsin arsi zohthiam mifim pathum pawl cu Jerusalem ah an ra ih, “Judah mi pawl ih Siangpahrang dingah a suakmi naute khuiahso a um? Nisuahnak lamah a arsi kan hmu ih amah biak dingah kan ra,” tiah an sut. Cuih thu a thei tikah Herod siangpahrang pa cu thin har in a um ti a si. Herod in puithiam upa pawl le Daanthiam pawl a kokhawm ih, “Messiah cu khuiah a suah ding?” tiah a sut. Annih in, “Judea ram Bethlehem khua ah a suak ding,” tiah an sim tikah mifim pathum pawl cu a ko hai ih a thup tein Messiah suaknak ding thu hla a sut hai ih “naute cu va hawl uh la nan hmu le in sim ve uh, amah biak dingah ka feh ve ding,” tiah thu a cah hai. Kan thei vekin Herod cun naute va biak ding a duh taktak mi si lo in, va that ding kha a duh sawn mi a si. 

          Mifim pathum pawl cu Siangpahrang tharte a suak ding ti an thei tik ah an lungawi in an hawl rero lai ah Herod cu thin nuam lo in, khuruahhar in a um. Ziangruangah a thin a phang ti sile amaih siangpahrang si nak a cuh pang ding a phang a si. A maih a neih mi aanaa kha mi in an lak ding ti a phang. Ziangtluk in aanaa a duh ti sile a thuanthu kan zoh tikah amaih fate rori hman a siangpahrang sinak an cuh ding a phang ruangah a that hai ti a si. Cu tluk rori in thuneihnak aanaa a rak duh mi a si. Tihnimnak petu Johan ih thinlung thawn cu linglet rori a si. Johan cu Bawi Jesuh kha a sang sawn ah, a hmai ah asilole a tlunah a ret duh lai ah Herod cu a mah hnak in a sangsawn, thu nei sawn, sinak lam ah a tum sawn mi an ra um pang ding hi a phang tuk. Mi in in neh pang ding, ka hnak in an sang sawn pang ding, an ṭha sawn pang ding tivek mahhnak in midang an sang deuh ding duh lo le ṭih hi thin bangnak, mah le mah hrem awnak a si. 

          Mifim pathum pawl khal cu arsi dung thlun in an feh an feh ih naute Jesuh cu an tong ngah ta. Naute umnak inn sung an lut tikah naute Jesuh cu a nu Mary thawn an hmu ih khukbil in an biak. Cun an kengmi laksawng sui, frankincense rimhmui le mura zihmui an suah ih an pek. Sui cu siangpahrang a sinak lang ter nak a si, frankincense rimhmui cu Pathian a sinak lang ternak a si ih mura zihmui cu a thinnak ding langter nak a si. Herod in naute nan hmu a sile in sim ve uh ka feh dingih ka biak ve ding a tiah a cah hai vek in Heroh hnen ah va kir sal ding cu an tum ko. Asinan Pathian in an mang ah Herod hnenih an kirsal nawm lo dingin a sim ruangah Herod hnen kirsal nawn lo in lamzin dangin an tlung ta a si.

          Tuni ah Herod hnen kirsal lo in lamzin dangin an tlung timi te hi a cuangce in sim ka duh. Jesuh Khrih an tong ngah hnu ah Herod hnen kirsal lo in Pathian sim mi sawn ngai in lamzin dang an zawh. Jesuh Khrih ton cu thlengawnak a si. Jesuh an hmu hlan an fimnak hmang in khual an tlawng, an tlawng nak san khal cu a ṭha zet mi a si ko. Asinan Herod ih a bum hai mi kha an thei thei lo. Leitlun kan khual tlawn nakah kan fimnak lawng kan ring a si le a tawk fang tiang cu tluang zet in kan feh thei men ding. Asinan Satan ih bumnak kan tong tikah kan thei lo ding asi. Mifim pathum pawl in Jesuh an tong ngah hnu cu Herod thu ngai lo in Pathian sim mi sawn an thlun vek in kan nih khal leitlun kan khual tlawn nakah Jesuh kan tong ngah taktak a si le cu Satan ih bumnak lam ah thlun nawn lo in Pathian ih simmi vek in kan thlun ve ding asi. 

          Bawi Jesuh thawn tonawk cu thlengawknak a si. Tuukhal pawl Bawi Jesuh an tong ngah hnu in mi nauta mi menmen ih sin thuthangṭha sim tu milungawi bik ah an cang. Mifim pathum pawl Bawi Jesuh an tong ngah hnu ah Pathian simmi thu thlun in lungawi in an tlung a si. Siahkhawng tu Zakia, Matthai te pawl, khuasia ih polhmi Mary Magdalen le midang tampi khal an nunnak ah Bawi Jesuh an tong ngah hnu ah an thlengaw ṭheh a si. Kan nih teh Bawi Jesuh kan tong ngah zo maw? Kan tong ngah le ngah lo cu Jesuh ruangah thlengawnak kan nei maw tihi zoh theih a si. Ziang tluk in kan thleng aw zo? Jesuh Khrih kan zumnak thawng in ziang tluk tiang lungawinak kan hmu zo ti kha tuni ah ruat sal u si. Pathian ih tleunak kan zate par ah ni bangin tlang ringring hram seh.   

Fr. Peter Lal Zin Thang (Hakha Diocese)