Jesuh unau si dingah (sim tu - Rev. Fr. Dominic Hnin)

Jesuh ih unau siding ah

Caantluang zarh kulhluannga nak, tlawngkai nihnih ni (September 22, 2020)

Siarding: Prov. 21:1-6, 10-13; Ps. 119:1, 27, 30, 34-35, 44; Lk 8:19-21

• Tuisun kan siarmi Thuthangtha ah "Jesuh ih nu le nau le pawl cu Jesuh ih umnak ah an va feh nan mi an tamtuk ruangah an tong ngah lohli thei lo" ti a si.

• Ziangruangah an vafeh ti hi cangantu Luke cun a rel lo. Asinan Thuthangttha ngantu Mark cun a rel. (Mk 3:28-30) ah kan Bawipa Jesuh cu "a thinlung a kim nawn lo si hmang, a sungah khawsia a lut a si hmang" ti ih mipi ih an ruah ruangah a ti.

• Innsang pakhat ah te le fa pawl an lungawi caan ih hmaisabik ih lungawi ve tu cu kan nulepa an si vek in, an riahsiat caan ih a ttanpitu bik le riahsiabik ve tu cu kan  nulepa an si. Ti duhsan cu te le fa kan siat kan tthat ih a cuangce ih in hlawmpi hmaisabik tu cu kan nulepa an si.

• "Jesuh cu a kim nawn lo" ti ih mipi ih an ruah tikah, a nu le a sungkhat pawl ih hrangah mit hmai naunak le thin bangnak men a si. Cu hleiah, "zo si ka nu le ka nau le pawl cu an si (Mk 3:33)" a rak ti. Mai suahnak nu hman theithiam nawnlo tluk in maw a si thlang ti ih an ruah tikah ziang tluk in an thin a na ding. A hleice in a nu ih hrangah cun Prophet Simeon ih a rak simcia mi "na thinlung cu vainam thawi sun tak vek a si ding (Lk 2:34-35)" a ti mi cu a kim curco. Cucu minung mit ih hmuhnak a si.

•  

• Bawipa cun cutivek in a ruat ve lo ding. Ziangah ti le kannih minung ih ruahnak le Bawipa ih ruahnak cu a dang aw tuk, Is 55:6-9 ah "ka ruahnak cu nan ruahnak bangtuk a silo, ka lamzin le nan lamzin tla khi an dangaw a si. ka ruahnak le ka lamzin cu nan ruahnak le nan lamzin hnakin a sang sawn a si." in ti.

• Minung cun minung mit in an zoh ih a pawn leng an hmu. Pathian cun a sung muril a zoh ih kan thinlung le kan sinak diktak a hmu. Prov. 21:2 ah " Pawnleng langnak men hnak in thudik ih nun hi Bawipa ih hmai ahcun man a nei sawn" a ti. 

•  

• Minung in Mary cu Jesuh hringtu a si ruangah Jesuh ih nu a si nan tu ahcun Jesuh in a nu hman a theilo an ti, a aa thla a si hmang an ti. Asinan Jesuh cun minung mit in zoh men lo-in a thinlung a zoh tikah a sinak diktak a hmu ih curuangah "Pathiaan thu a thei ih a thluntu pawl cu ka nu le ka unau an si" ti ah aupi phah in Mary cu ka "nu" ti ah a nem hnget vekin kannih Pathian thu a thei ii a thluntu pawl khal Jesuh in ka "unau" in ti.

•  

• Mi hminthang pawl, a hleice in kanmah ih kan "upat le zohtthimtlak - idol" ti ih kan ruahmi pawl kan hmuh tikah kan lung a awi. Hngilhlonak ah kan ti in kan zuk pi ta ih kan di a riam zet ttheu.

• Christian ka si a ti awtu pawl hrangah diriamnak ding thu tuisun ah kan thei. Cucu kan thlun rero mi kan Bawipa Jesuh Christ amah rori in "ka unau" pawl in ti. Ziang tluk ii lung awi ding kan si. Jesuh thawi unau kan sinak cu laihri zom awknak in a si lo. Pathian thu kan theih le kan thlunnak in a si.

•  

• Jesuh in a unau si dingah "theihnak" le 'thlunnak" timi hruang kulh a hmang. Cui theihnak le thlunnak cu hi leitlun fimthiamnak lam si loin Pathian thu theihnak le thlunnak hi a si.

• "Pathian thu theihnak le thlunnak" hi Jesuh thawi unau in sitertu, kan laihri in zom tertu ''thaw nung" a si. Pathian thu na theih lo ahcun thlun ding a um lo ding. Na thei na cing ih na thlunlo a si ahcun cui "thaw nung" cu a thi ding ih Jesuh thawi unau sinak laihri a cat ding.

• Mi tampi cun nitin kan khawm, Bible kan siar. Cuticun Pathian ih ttongkam kan thei ringring. Asi, a dik. Amah lawngte, peh bet ding a um lai. Cui na siar le na theih mi kha "tawk" hrih lo in "na thlun" a ttul hrih. Cu lawngah Jesuh ih unau diktak na si ding.

• Cangantu Luke cun Mary cu "Pathian thu a ngai ih a thluntu" a si thu a ngan zo (LK 1:28). Curuangah a thar ih ngan ttul in a ruat nawn lo. Pathian thu ngai ih thlun ti thu ahcun Mary hnak ih famkim deuh kan thei ban lo. Curuangah Mary cu Jesuh ih rel mi a nu le unau ah hmaisabik ah a tel thotho.

•  

• Bawipa ih thu theih le thlun kan ti tikah ol-ai zet in kan ruat ttheu.

• Milian pa kha cun thukham pawl ka thlun thluh zo ti ah amah le amah a ruat aw (Lk 18:21-23). Pro. 21: 2 ahcun "Zokhal in amah ih nundan cio hi a dik in kan ruat" a ti vek a si. Milianpa cun Thukham ih ttongfang vek cekci in a rak thlun tla a si men ding.

• Sikhalsehla Bawipa cun kan thinlung a zoh. Curuangah milianpa kha "pakhat te na ttul lai," "na neihmi pawl va zuar aw la mi farah pawl va pe aw" a ti. Milianpa cun cui thukham ih muril cu a rak thei ngah lo, a rak thlun ngah lo, pakhat te a ttul lai. Cucu "zangfah zawnruahnak" a si.

• Bawipa ih daan kan thlun theinak dingah Saam hla ngantu thawn "na daan pawl ka thlun theinak dingah ii zirh aw, fimthiamnak ii pe aw (Ps. 119:27, 33-34)" ti uhsi. Prov. 21:1 ngantu ih "Bawipa, Ka thinlung cu na ta a si ih nang mai duh daan in lam hruai aw" a ti bangin kan ti thiam a ttul. Culawngah Bawipa ih duhdaan vek in a thu kan thei in kan thlun thei ding.

•  

• Kanmah le kanmah "ka thei bik, ka thiambik" kan ti awk kulh sungah midang i simmi cu kan ngai in kan pom thei lo. Cuticun Pathian ih thuzirhmi khal cu tumlo pi in kan el ngah ttheu. Tangdornak a um lo ahcun Pathian thu thlun hi a theih lo tluk a si.

• Kan pupa ttongfim bangih "mai thu thaw, mai voih thaw" kan ti sung cu midang thawn kan hla, Pathian thawn kan hla aw ringring ding. Curuangah Jesuh ih unau siding ah "tangdornak a ttul" tinak asi.

•  

• "Thlun" timi ih duhsan cu "cawng" timi "amah vek in nun" ti a si ve. Jesuh ih dung kan thun kan ti tikah Jesuh ih nun kan cawng tinak a si. Tu ah Jesuh ih dung ah feh in a kekar kan thlun thei lo, Jesuh cu van ah a kai zo, kannih leitlun ah kan um lai. Asinan, in simta le in cahta vek in "hi tin nung uh" in ti mi kha kan cawng ih cuticun Jesuh ih dung kan thlun a si.

•  

• Jesuh ih unau si na duh a si le a thu kha thei in na nun ah thlun in nuncilh aw.