"Jesuh Zum le Daan Thlunnak"

Jesuh zum le Daan thlunnak

Sim tu - Rev. Fr. Peter Zin

October 9, 2020

Bawi Khrih ah duhdawtmi nu le pa, u le nau pawl, Bawipa ih pek mi hnangam daihnak le thinlung, thlarau harhdamnak pawl cu nan zate hnenah um ringring hram seh. Tuni ah thukham kan thlun asilole daan kan thlun tikah Jesuh Khrih kan zum a ṭul tengteng nak thu mal lai kan ruat tlang ding ah ka lo sawm duh. Tuni October 9, 2020 (Tlawngkai ninga) ni ih kan siar dingmi Bible pawl cu veikhat siarnak ah Galati 3:7-14 tiang a si ih zumnak a tel lo in daan thlunnak, fiang deuh in kan sim ding asile Bawi Jesuh zumnak nei lo in daan pawl thlun men hi man a nei lo nak thu kan hmu thei a si. Curuangah Daan thlun a ṭul maw, thlun ṭul lo kan ti tikah khuimi daan pawl thlun a ṭul ih khui mi daan pawl thlun a ṭul lo ti kha zoh a ṭul ding. Cule ziangruangah thlun a ṭul ih zaingtin kan thlun ding ti vek khal ruat a ṭul ding a si. Saam kan siar dingmi cu Saam 111:1-6 tiang a si ih a sawnnak cu ‘Bawipa in a thukham a cing ringring’ ti a si. Bawipa in a thukham a cing ringring ruangah kan nih khal in Bawipa ih thukham kan cing ve a ṭul ih a ṭul daandaan in kan thlun ṭul mi khal cu a um ve ding a si. Gospel kan siar ding mi cu Luka 11:15-26 tiang a si ih Bawi Jesuh in mipa pakhat hnenih sin ramhuai a dawisuak nak thu a si. Cutiin ramhuai a dawi suak tikah mipi in Bawi Jesuh kha zum duhlo in hi ramhuai a dawi suak nak hi ramhuai uktu bawi Beelzebul in huham a pek ruangah a si tiah mawh an puh leh lam a si.

Jew miphun pawl hrangah daan thlun timi hi a thupi zet mi a si ih an thlunmi khal cu Moses ih pek mi daan kha a hram pi cu a si ih an mah te in an bet mi daan khal cu tampi a um ve. Cun Jew miphun pawl ih an hngah rero mi, an hngah bik mi cu Messiah a rat nak ding kha a si. Asinan Messiah a rat ngaingai tik ah an thei lo, an cohlang thei lo. Daan pawl cu thlun an tum rero nan a thupi bik mi kha an cohlang ngah lo a si. Curuangah Paul in zumnak a thupi daan zia kha a rak sim rero nak a si. ‘Abraham ih tefa ngaingai cu zumnak neimi hi an si,’ a ti. Curuangah thisa lam lawng ih pehtlaihnak hi a tawk lo, a thupi lo ih zumnak nei hi a thupi sawn ti kan hmu thei. Jew miphun pawl an mah le an mah an hmai hngal nak kan ti pei maw, an mah le mah an lungkim aw zet nak hi Abraham ih tefa kan si ti hi a si. Cutin lei tisa lam in Abraham ih tefa kan si tiin hngal zet in an um ruangah Bawi Jesuh nih Pathian in lungto pawl hman Abraham ih tefa pawl ah a cang ter thei a rak ti dah hai a si. Curuangah Bawi Jesuh ih simmi siseh, St. Paul ih simmi siseh kan zoh tikah zo ih fa kan si, zo ih tefa kan si ti hnak in zumnak nei tu si ding a thupi daan zia hi kan hmu thei a si.

Cun zumnak le daan thlunnak thawn pehpar in kan zoh sal ta hrih pei. Tuni kan siarmi Paul ih cakhuat kan siar tikah kan hmu daan, kan pom daan a bang lo nak tete a um ih mi hrek khat in zumnak lawng in a tawk ti lam ah a feh tu khal an um asi. Paul ih a simmi pawl kan zoh sal ta hrih pei. ‘Abraham in a zum ruangah thluasuahnak a co. Cubangtuk in zumtu hmuahhmuah cu thluasuah nak an co ve ding. Daan thlunnak a rinsantu cu camsiatnak hnuai ih a ummi an si.’ Cun, ‘Ca Thianghlim in ‘zumnak ruangih Pathian thiamcotermi lawng an nung ding’ a ti ruangah Daan thlunnak in zohman thiamcoter an si lo ti cu a fiang zo,’ a ti. Hitivek pawl kan siar tikah minung hrek khat in Daan thlun a ṭul lo, Daan thlunnak in thiamcoter kan si lo, zumnak in a tawk tivek in an ti ṭheu. Himi St. Paul ih a simmi kan zoh hlan ah ka sim duh mi pakhat te cu ziang a si tile, Bible kan siar tikah kan duhmi, kan duhnak pakhat lawng lak in a phi suah a thei lo ih hmun dang ah teh ziangtin a sim ti vek kha zoh kan ṭul ringring a si.  

Tuni kan siar mi khal ah kan zoh a si le zumnak lawng hi a thupi ih daan asilole tuahnak pawl hi ziang hman san a tlai lo vek in hmu ol te a si. ‘Daan thlunnak in zohman thiamcoter an si lo,’ a ti tik ah Daan thlun a ṭul lo ti ol te a si. Ziangruangah Paul in hitin a sim a si pei? Gospel kan siar mi thawn a kom in kan zoh a si le Jew miphun pawl in Bawi Jesuh kha zum lo in Moses ih pek mi Daan lawng kha thlun an tum ruangah tiah kan ti thei. Bawi Jesuh zum hi ziang tluk in a thupi ti kha Paul in a lang ter duh mi a si. Ṭha te in kan zoh a si le ziangtik hman ah Paul in Daan thlun a ṭul lo, tuahnak a ṭul lo tivek in a sim lo ding. Jesuh Khrih zum lo in daan lawng thlun in kan rundamnak hrangah a tawk lo tinak a si.  

Daan timi hi kan zoh tik ah ziangruangah a um ti kan zoh a si le, a phunphun a um dingih, thuṭhimnak ah tlunlam thuneitu pakhatkhat in tuah uh in ti ih kan tuah. Cumi kha kum reipi kan tuah vivo tikah daan ah a cang ṭheu. Curuangah Daan kan ti tikah ziangruangah kan tuah, khui tawk in a ra ti hi zoh hmaisa loin Daan thlun a ṭul lo ti loh li men hi sual a ol te si. Daan kan thlun mi pawl khal hi Kan Bawipa nih tuah uh a timi pawl, Bible ih in zirh mi pawl ah a hram bun mi a si ṭul a si. 

A tawi zawng in kan sim ding a si le, Daan thlun kan ti tikah Bawi Jesuh tel loin, Bawi Jesuh zum lo in kan thlun, kan tuah a si le kan thlarau hrang ah man nei lo ah a cang thei ih Bawi Jesuh hnen in a ra mi Daan le thukham pawl cu thlun kan ṭul a si. Bawipa in lo thluasuah ha ihram seh.

Fr. Peter Lal Zin Thang (Hakha Diocese)