June 27, 2020 Zohtthim Tlak Ral Bawipa ih Nun

 fr_lucas_26.6.2020.png
fr_lucas_26.6.2020.png

June 27, 2020

 

Zohtthim Tlak Ral Bawipa ih Nun

Thuthangtha ngai tu nan zaten Pathian in thluasuah lo pe hram she tiah, hmaisa ah thla za ka cam.

    Zumtu u le nau, tui ttum ah Jesuh ih Rome ralbawi pakhat ih hnen um a damter nak thu tawiten kan ruat tlang pei. Mathai bung 8: 5 – 13 sung ta a si. Hlanlai ah Rome ralbawi pakhat a rak um. Cumi ralbawipa cun a kut thuai ah ralkap le hnen um tampi a nei. Vei khat cu a hnen um pakhat cu besia zet in a naa. Cutikah Ralbawipa cu mangbang le thin khua ruah har in a um. Asinan ralbawipa cun Jesuh an timi in damlo besia ih a um mi a hnen um cu a damter thei ko ding ti zumnak a neih ih ruangah Jesuh hnen ah zamrang ten a feh ih hitin Jesuh cu a sim; 

“Bawipa, ka hnen um pa cu besia zet in a naa ih caang thei lo in inn ah a it ringring a si,” tiah a ti. Cutikah Jesuh in “Ka ra dingih ka dam ter ding” tiah a let. Jesuh ih tong a theih veten ralbawipa cu a lung a lawizet. Asinan, khat lam ah a thin a nuam lo. Curangah ralbawipa cun Jesuh cu hitin a sawn: “Bawipa cu ticun si hlah she, nang ka inn sungih lut dingah ka tlak lo. Damnak thu pe aw la ka hnen um pa cu a dam ko ding.” Nangmah rori ka inn tiang na rat a tul lo. Kei khal ka kut tangah ralkap tampi an um. “Pakhat khat cu ‘feh aw’ ka ti le a feh; ‘ra aw’ ka ti le a ra’. Cun ‘ ka hnen um khal himi tuah aw ka ti le a tuah a si, tiah a ti.”

    Himi tong a theih ve ten Jesuh cu a mang a bang. A lung khal a awi. Curuangah mipi pawl hnen ah hi tin a sim: “Israel mi lak hman ah hi pa ih zumnak bangtuk ka hmuh hrih lo a si” tiah a ti.

Zumtu u le nau, himi ralbawipa ih nun le thinlung kan zoh tik ah kan hrangah cawn ding tampi a um a si. Cumi sung in pa 3 kan zoh pei. 

(1) Pa 1 nak ah rawlbawipa cu zangfahnak thinlung nei mi a si, timi a si. Hi ralbawi pa in zangfahnak thinlung a neih ih ruangah damlo besia a hnen um ih damnak ding hrangah a mah rori Jesuh hnen ah feh in damnak thluasuah a dil sak a si. Ngaingai ih kan sim a silen, ka hnen um a si men pam, keimah tengteng Jesuh hnen ih va feh a tul lo, ka ralkap pakhat khat a silo len ka hnen um pakhat khat Jesuh-ih hnen ah ka thlah men ding, tiseh la a ngah mi a si. Asinan, a hnen um cu santlai lo te sikhal sehla a duhdawt le a zangfah tuk ih ruangah a mah rori Jesuh hnen ah a feh a si. 

Zumtu u le nau kan nih teh, damlo le bom tul vansangih um mi kan nupi, kan pasal, kan nupa, kan fate, kan u nau, veng le hnen pawl ziangvek in kan zoh, kan tuamhlawm a si, kan zangfah maw, timi thateih kan ruah sal dinghi a thupi zet a si.

(2) Cun a pa 2 nak ih kan ruah dingmi cu, ralbawipa ih Jesuh a rinsannak le a zumnak thu a si. Hi Ralbawipa hin, Jesuh ih hnen ih feh tengteng a tul lo, mi dam ter thei tu tampi an um, sibawi tla tampi an um, sii tla a phunphun an um; tiah a ti lo. Jesuh in a dam ter thei a si tiah zumnak nei in a hnen um ih damnak ding hrangah a mah rori Jesuh hnenah a feh a si.

Zumtu u le nau, kan dam lo le harsat bangmang vansan kan ton tik ah mi hrek khat cu Jesuh hnenah rinsannak le zumnak thawn feh sawn lo in setan thawn hna a ttuan tu hnen ah kan feh sawn pang theu a si. Hihi kan hrial hrimhrim ding mi pakhat a si.

(3) Cun a pa 3 nak ih kan hmuh mi cu ralbawipa ih tangdornak thinlung a neih mi te hi a si. Ziangtin hi ralbawipa in tangdornak thinlung a nei a si ti kan thei thei? Bawi Jesuh in, “ka ra dingih na hnen um cu ka dam ter ding a si” a ti tikah ralbawipa cun, Ee “Bawipa cu ticun si hlah she, nang kan inn sungih luh dingah  kei ka tlak lo pi” “Damnak thu pe aw la ka hnen um pa cu a dam ko ding” a si si, a timi te hi a si. 

Zumtu u le nau, hi ralbawipa ih tongkam ah hin Bawi Jesuh ziangtluk in a rinsan, ziangtluk in a upat, ziang tluk in tangdornak a nei a si, timi fiangten kan hmu a si. Himi ralbawipa ih tangdornak tongkam te hi a that tuk ih ruangah Bawi Jesuh ih Thi le Sa kan san hlan te ih kan cam ve nak a si.

Online ih sin thuthangtha ngai ih Jesuh hawltu nan zaten tui kan rel rero mi:

  • Rome ralbawipa ih a hnen um a duhdawt le a zangfah vek in mi duhdawt le mi zangfah thiam tu si thei dingin zuam sin uh sih; 

  • Rome ralbawipa ih Jesuh a rinsan le a zum vek in har sat kan ton caan ah Jesuh a rinsan le a zum tu si thei dingin zuam sin uh sih;

  • Rome ralbawipa ih tangdornak thinlung a neih vek in tangdornak thinlung nei thei dingih zuam sin uh si. 

Thuthangtha ngai tu nan zaten Pathian in nan umnak ciar ah thluhsuah lo pe hram seh.

https://www.youtube.com/watch?v=GJ_DbWlBFY0

 

Add new comment

3 + 2 =

Please wait while the page is loading