Kaa lawng ih riantu si lo ding a thupi (sim tu Rev. Fr. David Mangte)

Kaa lawng ih riantu si lo ding a thupi

Thuthangtha sim tu Rev. Fr. David Mangte

December 15, 2020, Nihnih ni.

          Pa le Fapa le Thiang Thlarau hmin in, Amen.

          RVA ihsin thuthangtha a rak ngaitu hmuntin ih um mi duhdawtmi nulepa ulenau pawl nan umnak cio ah Bawipai pek mi daihnak in lo zel hram seh tiah hmaisabik ah cibai ka run lo buk hrih a si.

          Tucun Adventu a zarh thumnak kan thleng zo vek in Christmas rimhmui khal kan hawp ve rero phah thlang a si. A rim men hawp ih lungsi men tu si lo in, Christmas ih a thawtnak taktak tep ngah tu nan si thei cio ding khal ah beiseinak tumpi thawn thlaza ka run lo cam sak bet a si.

           Tuini a voikhat Bible siarnak ih kan siar mi cu Zef 3:1-2, 9-13 sung tha a si ih, Bawipai Ni a thlen tikah Jerusalem cu tundin sal a si ding thu le mi lungnem le tangdor pawl in  Bawipai pekmi runnak ih rah a tep ngah ding thu a si. 

           Saam ih kan siar mi cu Ps 34:2-3, 6-7, 18-19, 23 sungta a si. Gospel ih kan siarmi cu Mt 21:28-32 sungta a si ih kan Bawipa in puithiam upa pawl le hotu pawl hnen ih fapa pahnih tahthimnak a simmi thuhla a si. Tuini ah himi Gospel kan siarmi hmang in thazang lak khawm ka duh mi a si.

          Kan Bawipa ih tahthimnak a simmi sungih fapa pahnih te ih nun in kanmaih nundaan khal in khihhmuh na sa a si ti’n ka hmu. Upa sawn tu hnen ah a pa in sabit hmuan ih feh a fial tikah ka paih lo ti’n a el lawk nan nehhnu ah sir aw sal in a feh sal a ti. Nauta sawn tu cun, “aw ka feh ding, ka Pa” a ti nain, a feh lo ti a si. Hite unau hnih kan zoh tikah upa sawn tu cun a tuahnak in a Pa ih thu a ngai ih nauta sawn cun a kaa lawngin a Pa ih thu a ngai kan ti thei. An pahnih te’n sabit hmuan feh cu an paih lo veve ti cu a fiang; upa tu cun a paihlonak kha a Pa hnen ah a rak lang ter lawk nan neh hnu ah a siraw sal ih hmuan ah cun a feh. Nauta sawn cun hmakhat te a Pa ih lungawinak dingah “aw ka feh ko ding” a ti nan a feh cuang lo. 

          An pahnih te’n an Pa riahsiat ding sianglo veve an si. Nauta tu cun a kaa lawngin a lang ter ih upa tu cun a tuahnak in lang ter. Hi lungput pahnih lak ah khui mi na hril sawn ding in ti seh la upa tu ih lungput hi kan hril cio ding ka zum. A si ko – an Pa an duhdawtnak le a riahsiat ding an sianlonak hi upa tu vek ih tuahnak ih lang ter hi cu a tha sawn tuk lawlaw a si. Sihmansehla, kaa thawn siseh, tuahnak thawn siseh, thungai tu si hi a tha bik kan ti cio ko lo ding maw? A kaa thawn a el lawk ruangah a Pa ih thinlung a na ter, curuangah sirawk a tulnak san cu a si. Kaa thawn rak el lo ta sehla cu sirawk khal a tul lo ding nan. Asinain, minung kan zaten mi famkim kan um thei lo ih ruangah hi upatu vek ih sualsir nun neih a tul ringring nak a si.

          Hite unau tahthimnak a pekmi hin biaknak lam ih hruaitu upa pawl le ziangih siarlo ih hnon a tongtu pawl ih nun a sawhkhih thu Bawipa in Mt 21:31-32 ah fiang zet in a sim. Nauta tu ih nun in biaknak lam hruaitu pawl a sawhkhih ih upatu ih nun in hlawghlang le siahkhongtu pawl a sawhkhih. Kan Bawipa leitlun a tlanlen lai ah Farasi le Daanthiam pawl le puithiam upa pawl thawn hmaiton ih an buai theu kha kan thei theh. Tuini ih kan siarmi sungih unau hnih te ih thuhla tahthimnak a pek mi khal mani ih kan siarmi Mt 21:23-27 sungih a thuneihnak khui tawk in a ngah timi an suh ruangih a sim mi a si. A thuneihnak khui tawk in a ra timi a sim hlan ah Johan ih baptisma a pek mi hi Pathian thu in maw minung thu in a pek mi a si timi a sut hmaisa hai. Kan Bible ih in sim mi ah annih in Pathian thu in ti an thei keukeu ko nan, cuti ih kan ti le “ziangah nan zum duh lo?” in ti ding ih minung thu in kan ti le mi hmuahhmuah in Johan cu Prophet a si tin an pom ruangah in tuahmawh pangding ti an phang ih ‘kan thei lo’ an ti ti’n in sim. Curuangah Johan ih sualsirnak baptisma a pek mi hi Pathian hnen ih a ra mi a si ti cu an thei ko nan anmah an zeih lo ih ruangih zum duh lo men an si ti cu a fiang. 

           Curuangah kan Bawipa in cu pawl hnen ah siahkhongtu le hlawhhlang pawl hi nan hlan ah Pathian Uknak sung an thleng ding, ziangahtile, annih cun Pathian thu ngai in sualsirnak thawn an nun an thleng, nannih cu nan zum lo ih nan nun khal nan thleng tum lo ti’n a rak mawhthluk mi a si. 

           Hi biaknak lam ih hruaitu pawl hi biakinn cu tuletu an feh ko, thla khal an cam ringring ko nan mizangfah nun an neih lo ruangah le mi tlasam pawl ziangih an rel lo ruangah siseh, ka si bik timi puarthaunak thinlung ruangih sualsirnak an neih thei lo ruangah fapa nauta vek in kaa lawngih Pathian a biaktu le riantu an si. 

           Kan Bawipa in amah zumtu kan sinak hi biakinn feh ih thlacam men fang lawngih langter ding ah a duh mi a si lo. Tangdornak thinlung, sualsirnak thinlung thawn kan nun ih langter ding a duh sawn mi a si. Hi khawvel nun ah cun, ka upa pawl le kan boss pawl hi kaa lawngih rian a ol zet men thei; a hleice in mi lem thiam le mi porh thiam pawl cun an boss pawl an phaa thiam ih an hnen ihsin an duh mi khal ol ten an ngah theu ko. Sihmansehla, kan biak Pathian cu phaa theih mi a si lo; kaa lawng ih rian a duh hrimhrim lo.