Kan dil mi le in pek mi thil pahnih (sim tu - Rev. Fr. Pius Cung)

Kan dil mi le in pek mi thil (2)

Sim tu - Rev. Fr. Pius Cung (September 23, 2020)

Siarding: Thu 30:5-9/   Saam 119/ Lk 9:1-6

RVA Falam Service insin, thuthangtha rak ngai tu u le nau pawl Bawi kri hmin in cibai ka lo buk hai. Damcahnak, hnangamdaihnak le nan tumtahmi pawl, famkim tlamtling tein Bawipa in thluasuah lo pe hram seh. Sep 23, ih kan siar mi Bible bung cang pawl cu Thu 30:5-9/   Saam 119/ Lk 9:1-6 tla an si. Kan siarmi cathiang pawl khaikhawm in “kan dilmi le in pekmi thil pa (2)” thu kan hlawmawk tlang ding ka duh.                                       

Pathian hnenih kan dil theu mi thluasuah a phunphun pawl hi thil tampi an siih Amah ih in pek mi laksawng khal siar cawk loin a tam zet a si ti cu kan cinken ringring ding ah a thupi. Hmailam kan nunnak hrang khal ah kan dil bet rero lai dingih Pathian khal in kan dil mi thawn dil lo mithawn in pe bet rero lai ding ti khal fek ten zum u si. Cu mi thiltampi lakin, kan dil dingmi thil pa2 le Amai in pekmi thil pa 2 hi fiangzet in kan bibile in tuni ah in zirh. 

Kan dil dingmi pa (2)                                       

1. Thu 30:8, Thuphan pertu si lo ding in i kil aw. Thuphanpercu Satan hna tuan a si. Jn 8:44, ah “Nannih cu nanpa Satan ih fa nan si…. Anih cu thuphan pertu a si ih, thu phan hmuahhmuah ih pa a si” tiah fiang keukeu in in sim. Satan cun Eve le Adam sual a sawm lai khal ah thuphan perin a thok. Pathiannih nan ei le nan thi ding timi rori, “nan ei khal le nan thi hrimhrim lo ding, nan mit a vang ding, Pathian vek in a tha le a sia nan thei thiam ding,” tiin thuphan tombawr hmangin sualthim sungah a rak luhpi a si. Midang iksiknak le tlaaksiatnak phiarih thuphan per cu Satan pai duhzawng rori a si. Thukham pahra khalah ‘thuphan na rel lo pei’ ti a si. Tirh 5:3 ih kan hmuhmi cu  “Piter in “Ananias, ziangah so Satan in a lo neh ih na thilzuarnak ih na ngahmi tangka a hrek cu sup tahrat in Thlarau Thianghlim na bum” a ti. Maihlawknak ruatih mibum khal thuphanper a si ih Pathian thin heng zawng hna tuan a si. Caponak le thunuam rel can ih porhluanzet ih thurel thiam tla cu ngai a nuamih fimnak phunkhat khal a si. Sual a si lo. Midang thlaaksiatnak, ningzah mualpho ternak le mai hlawknak lawng zoh ih thuphan per cu sual a siih kan thin lung, kan tongkam le kan nunnak ah hrial u si. Sup u si. Bang u si.   Titas 1:2 ah “Thuphan a per dah lomi Pathian” a ti. Kol 3:9 pakhat le pakhat bumaw hlah uh in ti. Heb 6:18 ah “Pathian cu thuphan a per lo” ti kan hmu. Thudik thuhman duhtu Pathian naih in ‘thuphan pertu si lo dingin i kilkhawi hram aw’ tiah thlacam in dil u si.                    

2. Thu  30: 8, Farah tuk le lian tuk in i tuah aw hlah, ka khop tawkfang lawng rawl i pe aw. I farah ter aw tiih thlacam cu kan um lo ding nain, i lian ter aw tiih thlacam cu kan um ding ka zum. Bible ih mifim a ti mi si kan duh ah cun Thufim ih in zirhmi hi kan thlacamnak sive hram seh Kawlpawl in “ Laimi pawl cu farah hmual nan tuar thei nain len hmual nan tuar thei lo” in ti. Ka pom lem lo nain, kan lai pupa tongfim ih “Misia len le tite len” an ti mi ka ruah sal ah cun a hman phah ko ding ka tisal. Kan tikcu le santiluan kan zoh tikah sumpai leilawnnak a tha vivo ih kan kan nuam deuh vivo ko. A sinain, kan neihnung deuhnak ruangih Pathian thawi kan hlat awk vivo lam tampi hmuh le theih a si ih riahsia za zet a si. Khawmcan khalih telephone thamih lek rero tivek, khawm paih loih mortor cycle thawi shuhkhinta le pinic feh kan tamsawn tivek, TV sung ih bawhlung puai le zatlan zoh ruangah zaan khawm minung kan mal vivo tivek pawl hi hmuh le ton rero mi a si ko.

Kan neihdeuh kan nuam deuh ti can ah hin Pathian thawn kan hla aw vivo pang theu. Kan harcan ah Pathian rinsan in biakinn kan pan sawn. Thufim ih in zirh mi cu “thil tampi ka neih le Bawipa ka lo tul lo ka ti pang ding; ka farah tukah cun ruk ka ru pang ding ih, Pathian hmin ka thangsiat pang ding” a ti. Farah tuk lo lentuk lo thlacamnak cu Pathian hminthiang sunlawih nak a si. Kan duhbik mi hi lennak si lo in Pathian hmin sunlawinak ding si thei hramseh. Kan tihbik dingmi khal farahnak siloin Pathian hmin thangsiat ter pang ding hi sisawn hramseh. A tawk zawn te nei ding hin thlacam thiam thlang u si.

Pathian ih in pekmi pa (2)                                   

1. khawsia dawi theinak. Lk 9: 1, ah Jesuh in a dungthluntu 12 pawl cu khawsia dawi thei nak huham a pek ti kan hmu. Hna pakhatkhat kan tuan tikah tuannak thilri le hriamhrei kan tul. Jesuh khal in a dungthlun tu pawl hnatuan a fial ih kutlawng men in a thlah lo. An hnatuannak ih a tulmi a ken. Cucu huham, thuneihnak a si. Krifa tampi ih kan tulsam zetmi pakhat cu Jesuh ih dungthluntu kan silam lawnglawng kan hmu ih Jesuh ih thlahmi, tirhthlah kan silam hmu lo kan tam tin ka ruat. Jesuh nih a dungthluntu 12 cu a ko, thawm huham a pek hnuah tirhtlah ah a hmang. Baptism tipilnak kan ngah in Jesuh dung htluntu kan si ih, a thu le hla kan hmuhmi, kan neihmi cu midanghnenih hlawm ding in in fial, in thlah. Thlahmi kan sinak hi a thar in theisal u si.       

Jesuh kri leitlunih a len lai ah, Pathian pakhat bia tu an um ih pathian tampi zumtu khal a tam zet ve. Khuavang, khawsia, ramhuai tivek le dawi le hnam khal a rak tam zet. Pathian uknak a ra thleng a si ruangah khawsia pawl ih hnatuannak pawl cu Jesuh hminih siatsuah le dawitlan thluhnak can a kim. Hrekkhat cun khawsia dawitheinak huham cu a dungtlun tu pawl lawng a pek kan ti men thei. Pathian hnatuan hrekkhat pawl hrang lawng a si  tintla kan ruat men thei. Huham tum zet pek kan sinan neilo vek ih kan ruah awk tikah khawsia cu kan tih ih a nih in inngam sinsin. Raltha le ngam zet in hmai kan nor le khawsia cu dung a sip vivo. Jesuh kri hmin le amai in pekmi huham thawn Kan thinlung, kan pumsa le kan thlarau ih Satan sualthim hna tuannak neh thlang u si. Midang parih Satan cahnak khal thiannak le luatnak pe cio u si.       

2. mina damter theinak; Lk 9: 1 ah Jesuh in a dungthluntu 12 pawl cu mina damter theinak huham a pek ti kan hmu. Taksa, thin lung le thlarau ti in, phun 3 in kan naa thei. Jesuh ih  a dam ter mi hrekkhat cu na sualnak ngaidam na si a ti. Tisa dam nak lawng si lo in an thlarau thianhlimnak khal a pek cih. Misual pawl le mi nauta harsa pawl a co hlang, a kom tikah, an thinlung bangnak le thanaunak pawl a dam ter. Himi damnak pa 3 hi Jesuh hmin in a co ngahtu kan siih, midang khal va pe thei tu kan si. Damnak pa 3 lak ih pa 1 te a dam khal le dam thotho a si. Thlacamnak, thapeknak awkam le kan umpi awknak men khal in midang damnak pakhatkhat cu a pe thei tuk ko so khaw. Jesuh thinglamtah par ih thlai a si lai ah a mah nautat hmuhsuam tu pawl cun “midang a run thei nan, a mah le a mah cu a run aw thei lo an ti.” Zumlo tu pawl ih tong a si. Kei ih thlacam saknak men cun a dam lo ding tiih ringhlel, zumhnak dawrdawm kan neih cu Satan duh zawng a si. Thlacam kan ko ih, in ra camsak nan kan dam thei cuang lo ti ding khal kan si lo. Mai thlacamnak khal zumfek a tul ih midang thlacamsaknak khal ngainat sunlawih le rinsan ding kan si.

Damter theinak Jesuh in in pe zo. Taksa, thin lung le thlarau a pa3 ih dam khal an um ding ih, cumi lak ih pakhat te lawng dam khal an um ding. Damnak famkim co dingin Jesuh in in koih damnak pe ding in Jesuh in in thlah. Kan tulmi huham khal in pet u, kan dildingmi khal in zirhtu Bawipa a hmin sunglawi sin ko seh, Amen.