''Kan Hrangah Naute A Suak Zo' (Thuthangtha sim tu Rev. Fr. Dominic Hnin), December 24, 2020.

''Kan Hrangah Naute A Suak Zo'

Thuthangtha sim tu Rev. Fr. Dominic Hnin

Hngah caan Zarh linak, tlawngkai nili ni (December 24, 2020)

Zing Missa hrang Siarding: 2 Samuel 7:1-5, 8- 12, 14, 16; Ps. 89:2-5, 27, 29; Lk. 1:67-79.

Timzan Missa hrang Siarding: Is 9:1-7; Ps. 95:1-3, 11-13; Titus 2:11-14; Lk. 2:1-14.

• Tuisun kan siarmi thuthangttha pawl Lk 1:67- 2:14 tiang pawl cu sirhsan in thlarau rawl hlawm aw tlang uhsi. Tuisun kan siarmi thuthangttha ahhin hmaisa lamah Zaccariah in Pathian a thangtthatnak hla kan hmu ii neta lamah Bawipa Jesu ih suahnak thu kan hmu.

• Zacchariah in Paathian a thangtthatnak hla cu John the Baptist ih suah hnu zarh khat kim, nau hmin an sak ih thil thleng a si.

• Zacchariah in himi thangtthatnak hla cu a sak ko nain amai aw le kam siloin Thianthlarau ih aw le kam a si sawn. Ziangah tile anih cu Thlarau Thianghlim thawn a rak khat.

• Himi hla hi tthate in kan zoh asile naute John thawn malte lawng pehtlaihnak a nei ii a tamsawn cu Runtupa ih thazang cahnak thu a si.

• Zacchariah cun a fapa John ih suahnak hi Pathian in David hnen ih a rak tuahmi thukam (2Sam 7:8-16) ih famkimnak a sit i in a hmu. Curuangah Jhn ih thu hnakin Runtupa ih thu a tamsawn nak a si.

• Hla hramthok ihsin, 'a maksak zetmi, a cakzet mi runtupa' a ti ih cui runtupa cu David ih tesinfa a si thu a relnak in Jew pawl ih an rak hngahhlap zetmi Messiah a si thu a phuang cih.

• Naute hmin n sak lai ih thil thleng ruangah mipi cun, 'hi naute cu ziangvek minung hawng cang taksawh pei maw?' ti in an khawruah harnak cu Zacchariah ih hla ah, ''Pathian ih prophet, lamzin sialtu le sual ngaithiamnak thawngin rundamnak thu phuangtu ding a si" ti in a sawn ih a sim fiang.

• Malachi 3:1 ah, ''Ka hrangih lamzn sialtu dingah ka palai ka thlah ding'' ti ih a rak sim cia micu tu ah John ah a famkim.

• A sangbik Pathian ih prophet ti ih kawhmi John cun Bawipa ih lamzin a rak sial ding. Cui Bawipa cu, 'a thukam thianghlim a famkimtertu Bawipa, a zangfah duhdawtnak ruangah sualnak pawl thiangfai tertu Bawipa, thimnak sungih vakvai pawl ni bangih tleunak a petu Bawipa" a si.

• Himi Zacchariah ih hla cu 'prophet simsungnak' ti khain an ti ttheu. asinan hmailam ih thil cang ding pawl rak simcia sung hnakin tu ih thil cangmi - John ih suahnak, a sullam le a hmuitinmi - pawl cu Thlarau Thianghlim ih theihternak thawn phuansuahnak a si sawn.

• Runnak thu a rel ahhin, hmaisa lamih a relmi cu ral ihsin humhimnak vekin a lang ih neta ahcun sual ngaidamnak ruangih himdamnak thu ah a feh.

• Acts 2:38 ahcun Peter cu Israel mipi in, 'ziang kan tuah ding?' ti ih an suh tikah, ''Nan zate in nan sual sir fingfing uhla, Jesuh Khrih hminin Baptisma lak uh, cuticun nan sualnak ngaidam nan si ding" a ti.

• Cuvek thotho in John cun, 'nan sual sir uhla Baptisma lakuh, cule Pathian in nan sualnak a lo ngaidam ding (Lk 3:3)' ti in sual sirnak thu a rawn aupi ih cuticun Pathian ih rundamnak thu cu mipi hnenah a thlenter.

• Hiti-ih John ih a rak sim rero nak cu kannih zocio khal in a rawng suak ding mi Naute kan rak hmuah ngah ii kan rak co hlan ding a duh ruangah a si.

• Thuthangttha kan siarmi ih neta lamah Naute Jesuh ih suahnak kan hmu. Naute cu Caesar Augustus ih sannah a rawng suak ti in kan hmu. Caesar Augustun hi Pax Augusta timi remdaihnak hram thoktu a rak si ih amai sanah Rome siangpahrang uknak cu remdaihnak a rak ngah. Curuangah amah cu a mipi pawlin 'remdaihnak bawipa' ti in an hmu, 'runtupa le khawzing pathian' ti in an rak ruat.

• Is 44:28-45:1 sungah Persian siangpahrang Cyrus cu Pathian ih khawkhannak famkimtertu a rak si vek in Cawsar Augustus khal cu Pathian ih hmanrua a rak si. Mipum siar ding ih thu a rak peknak thawngin Joseph le Mary khal cu Bethlehem an rak thleng ih cumi caan ah Runtupa diktak, Remdaihnak Bawipa ngaingai cu a rawng suak.

• Himi Pathian Fapa ih suahnak Christmas cu Pathian ih farah-siatthatnak le tangdor nunnemnak a si thu kan hmu. Pathian Fapa cu cawrawlkuang sungah an rak hlum. Cuhman hmunhma umsun a rak si.

• Mipum siar ding ruangah mai hrinhnam suahkehnak khua ah an kir cio. David ih tesinfa pawl cu an ungzai ruangah le Bethlehem cu khua fate a rak si ruangah mikhual thawn an khat. Curuangah Joseph le Mary khal cu tlun inn tha an rak co ve nawn lo. Cui caan ah Mary in neuter a hrin tikah harsaatnak tampi an tong.

• Kan Bible in, 'a fatir ah fapa a hring' a ti. Himi 'fatir" timi ttongfang cu la in mi tampi in "Mary in fate dang khal a nei ding, Jesuh in suahpi unau dang a nei ding" ana ti.

• Asinan, "fatir" tiimi ttongfang thawn kan Bible ih a sim duhmi cu "fatir ih covo hleice a neihmi"a si sawn, unau dang neih le neihlo thu a si lo.

• Deut 21:15-17 sungah, ''A fapatir cu midang ih comi let hnih in a ro thil sungin a pek pei. Ziangah tile a cithlah hmaisabik fapa a si hrangah fapatir covo cu amai ta a si" a ti.

• (Fapatir ih covo cu Gen 27; Ex 13:2; Num 3:12-13, 18:15-16 sung khalah kan hmu thei.)

• Cun Christian zumnak khlah Jesuh cu kan upabik in kan hmu thei. Rom 8"29 ahcun Bawipa Jesuh thawn pehparin, ''unau tampi lakah upabik'' a rak ti.

• Mary in  hrinmi a fatir cu cwrawl einak kuang sungah a hlum. Hi naute ih suahnak ding thu ah Prophet Isaiah cun "Kan hrangah naute a suak zo (Is 9:1-7)" a ti. Cui naute cu a nu ih tuamhlawm ttul dinhmun ah a rawng um. Lawng fangkheh ii a suah tikah puan hlumte thawi rak don a ttul, maanraang ih a rak tuam thluh tikah thianfai sak a rak ttul.

• Asinan cui Naute derdawmzet cu, Zacchariah ih a rak simcia bangin, a cakzet mi Pathian a si. Leilungpi cu tleunak a pe ii, nautat zomtaihnak kawn cu a bohkiak thluntu Pathian a si.

• Bible ngantu Titus cun cui naute cu ''Pathian ih zangfahnak" a ti. ''Mi hmuahhmuah rundamnak a phurhtu Pathian ih zangfahnak cu a lang zo (Titus 2:11-14)" a ti.

• Hi naute ih suahnak Christmas cun kan nun hi tham in nun hahdamnak, dingnak le Pathian tihzahnak nun ah in hruai hram seh.