Kan Nunnak Thawn (sim tu - Rev. Fr. Lucas Tha Ling Sum) December 1, 2022)

Kan Nunnak Thawn

December 1, 2022
Matthew 7:21,24-27

         Zumtu u le nau, Adventu thlawsuah nan parah thleng hram seh, tiah hmaisa ah thlaza ka cam. Bawipa, Bawipa tiih i ko tu hmuahhmuah in vancung ram an thleng thluh lo ding; vancung ih a um mi ka Pai duhnak a tuah tu lawnglawng an thleng ding a si. Curuangah hi ka ttong mi a thei ih a thluntu cu lungpi parih inn saktu mifim pa bangtuk a si. Ruah napi in a sur, ti a lian ih thlipi in a nuai ciamco na in lungpi parih sak mi inn a si ruangah a sawn lo. Sikhalsehla hi ka ttong mi a thei na in a thlun lo tu cu vunnel parih inn saktu mi-aa bangtuk a si.
         Ruah napi in a sur, ti a lian ih thlipi in a nuai tikah a sawn mai; a tlu i kiak thluh a si, tiah a ti. Himi cu Pathian ih ttongkam a si. Khrih Bawipaih hnenah thangtthatnak um seh law. Zumtu u le nau, tikcu le caan a liam rero vek in Kawhhran ih Pathian kan biaknak tik cu le caan khal a thleng aw rero. Tthimnak ah kanram ih tthalcan, furcan, thlatangcan kan neih bangin Pawlpi khal in Adventu can, Christmas can, Vua can, Easter can, Can menmen tin kan nei ih tu cu kan thei ciau vekin tu cu Adventu a zarhkhatnak sungah kan um. Christmas can a nai rero thlang. Runtupa ih rat nak a nai rero thlang. Ralring ten um can a si tinak a si.
         Cuti a silen ziangtin ralring ten kan um pei. Ziang kan tuah pei. Mitui kan siar mi Baibal in phunhnih in sim a si. Phunkhatnak cu: Bawipa, Bawipa tiih i ko tu hmuahhmuah in vancung ram an thleng thluh lo ding; vancung ih a um mi ka Pai duhnak a tuah tu lawnglawng an thleng ding a si.” Aw kam lawngih Pathian thangtthat le biak cu a famkim lo, a tawk hrih lo tinak a si. Ziangmi a ttul lai a si tilen duhdawtnak nun le justice nun nei a ttul hrimhrim a si, tiah Baibal cathiam pawl in in sim a si.
         Cun phunhnihnak Bawi Jesuh in mifim pa le miaa pa ih tahtthimnak thawn in sim. “ka ttong mi a thei ih a thluntu cu lungpi parih inn saktu mifim pa bangtuk a si. Ruah napi in a sur, ti a lian ih thlipi in a nuai ciamco na in lungpi parih sak mi inn a si ruangah a sawn lo. Sikhalsehla hi ka ttong mi a thei na in a thlun lo tu cu vunnel parih inn saktu mi-aa bangtuk a si. Ruah napi in a sur, ti a lian ih thlipi in a nuai tikah a sawn mai; a tlu i kiak thluh a si, tiah a ti.”Pathian thu cu kan hna lawngih thei men lawng a tawk lo. Kan hna ih kan thei mi kan tuah tengteng a ttul. Kan thlun tengteng a ttul. Kan nunpi a ttul hrimhrim, tinak a si.
       Vun nel parih inn sak tu vek si lo dingin zuam ciau uh si. Lungpi parih inn sak tu vek si dingin zuam ciau uh si.
Thuthangttha ngai tu nan zaten Pathian in a thar in Adventu thlawsuah lo pe hram seh. Amen.

Only by words, but by life of love and justice
Hearing and doing
Hearing and not doing

Add new comment

5 + 1 =