Kan Ruahsannak (sim tu Rev. Fr. Peter Zin), July 17, 2021.

Kan Ruahsannak

Thuthangtha sim tu Rev. Fr. Peter Zin

July 17, 2021.

Siarding: Suah. 12: 37-42; Saam 136: 1, 23-24; Mt. 12: 14-21.

“A parah mi hmuahhmuah in ruahsannak an nei ding”

            RVA Falam Service in Thuthangṭha a ngai tu Bawi Khrih ah duhdawtmi nu le pa, u le nau pawl, nan umnak cio ah kan Bawipa kan Pathian in lo um pi cio hai hram seh. Tu hrawng kan boruak hi ramuknak lam in siseh, harhdamnak lam in siseh, khuaruahharza, caan ṭha lo kan ti pei ih caan har zet lai fang a si ih minung tampi cu beidong in khal kan um men ding. Ziangziang a si khal le a ne ta bik ih kan ruahsannak hi cu a mah Pathian lawng hi a si ringring ko. Kan Pathain cu ṭhatlonak lak sung in khal thil ṭha a suak ter theitu a si vek in amah rinsan in beidong lo te in um thei ding in zuam uh si, thazaang lak tlang uh si. Tuni kan siar dingmi Gospel siarnak kan nei ta hrih pei.   

Matthai 12:14-21

            Farasi pawl cu an feh ih Jesuh that dingah thu an ruat khawm. Phiar an tum kha Jesuh in a theih tikah cutawk ihsin a suak. Cule miburpi in an thlun vivo. Mina hmuahhmuah a damter ih, amah ih thuhla kha midang zo hnen hmanih sim lo dingin thu a pek. Hitiih a tinak cu profet Isaiah kaa in Pathian in: “Ka hrilmi i riantu cu hinah a um; Ka duhdawtmi a si ih a parah ka lung a awi. A parah ka Thlarau ka re dingih, Ka thuṭhennak cu miphun hmuahhmuah hnenah a than ding. Mi thu eltu a si lo dingih a au ciamco fawn lo ding. Lamzin ah ring zet in thu a sim lo ding. A derdaimi hnenah a thinlung a nem dingih, Bawmtu nei lo hnenah zangfahnak a nei ding. Dingnak kha nehtu a siter lai hlan lo taimak a suah ding. Cule a parah mi hmuahhmuah in ruahsannak an nei ding,” tiih a timi kimternak dingah a si. (Bawipa ih Thuthangṭha a si.)

            “A parah mi hmuahhmuah in ruah sannak an nei ding,” a ti mi te tuni ah ruat tlang in thazaang lak tlang u si tiah ka lo sawm duh. Hiti vek in Bible sung ah a ṭhatnak lam in mi hmuahhmuah a ti tikah a thupi zet mi pakhat cu mi hmuahhmuah a timi sungah kan tel ve ding hi a thupi zet a si.  Thuṭhimnak ah: Saam 24:10 ah, “A sunglawimi siangpahrang cu zoso a si? Amah cu mi hmuahhmuah ih Bawipa, sunloihmi siangpahrang a si,” a ti. Mi hmuahhmuah ih Bawipa a si tiah Bible in a ti tikah kan mah ih Bawipa a si ding hi a thupi zet a si. Mi hmuahhmuah in Bawipa cu thangṭhat uh ati a si le cumi Bawipa a thangṭhat tu mi hmuahhmuah lak ah kan tel ve ding hi a tu pi a si. 

            Bible thar sungin thuṭhimnak mal lai kan zoh hrih bet pei. Lk 2:10 sungah vancungmi pawl in tuukhal pawl hnen ah ziang an ti tisile, “Ṭih hlah uh! Nan hrangah thuthangṭha ka run keng; cuih thuthangṭha cu mi hmuahhmuah hrangah lungawinak ngaingai a si,” a ti. Malte kan ruat tlang ta hrih pei: ‘mi hmuahhmuah hrangah lungawinak ngaingai a si’ a ti nan mihrek khat hrangah lungawinak a rak si lo. Herod siangpahrang pa siseh, cun Farasi pawl tivek hrangah Bawi Jesuh a rak suak hi an lungawinak a rak si thei lo. Curuangah ‘mi hmuahhmuah hrangah lungawinak ngaingai a si’ a ti tikah cumi mi hmuahhmuah a ti mi sungah kan tel ngah ding hi kan hrang ah a thupi a si. A dang pakhat kan zoh hrih pei: Lk 1:48 ah Thiang Thlarau thawn a khat ih a sung ah naute Jesuh a um mi Nu Mary in, “Atu thokin mi hmuahhmuah in mi thluasuak in ti ding,” a ti. Himi ṭongkam hi Nu Mary in Thiang Thlarau thawn khat in, a sung ah naute Jesuh um in a ṭongmi a si ruangah a dik mi a si. Cutiasi ruangah mi hmuahhmuah in mi thluasuak in ti ding a ti vekin, Thiang Thlarau thawn a khat ve mi Elizabeth in ring zet in, “Nang cu nunau hmuahhmuah lakah a thluasuak bikmi nunau na si,” a ti vek in, kan nih kal a ti thei ve tu kan si ding hi a thu pi zet asi.

            Tuni kan siar mi Gospel sungah cu Jesuh Khrih khih hmuh in, “A parah mi hmuahhmuah in ruahsannak an nei ding,” a ti. Cutikah ziang si a thupi mi? Mi hmuahhmuh in a parah ruahsannak a nei ding a timi mi hmuahhmuah sungah kan tel ve ding hi a thupi mi a si. Duhdawtmi nu le pa, u le nau pawl amah parah, kan Bawipa parah ruahsannak kan nei ko maw, kan nei lai maw? Kan ton mi harnak pawl ruangah ruahsannak nei lo in kan um pang maw? Kan Kawlram buainak ruangah siseh, lei tlun huap in natnak, harnak, a thleng ruangah siseh, ruahsannak nei nawn lo in kan um sual pang maw? “A parah mi hmuahhmuah in ruahsannak an nei ding,” a ti mi ah tel thei ringring tu si ding in zuam uh si. Beidong lo in Bawipa a rinsan ringring thei tu si ding in zuam uh si. Bawipa in, “A netnak ni tiang a ṭang theitu cu runsuak an si ding,” a ti asi. A net nak ni tiang a mah rinsan in ruahsannak a nei ringring thei tu si ding in zuam uh si. Kan ruahsannak cu Bawipa a mah lawng a si. Bawipa in kan ṭul sammi thazaang thluasuah in pek cio hram seh.

            Fr. Peter Lal Zin Thang (Hakha Diocese)