Khrih ih tuurual kilkhawitu tuukhal (sim tu - Rev. Fr. Joseph Ro Nei Thang) May 21, 2021

Khrih ih tuurual kilkhawitu tuukhal

Thuthangtha sim tu - Rev. Fr. Joseph Ro Nei Thang

May 21, 2021, Pasca caan Zarh 7 nak (Friday)

          RVA Falam Chin service ihsin thlarau rawl Thianghlim a ei ringringtu Bawi Khrih ah duhdawt zetmi nu le pa, u le nau pawl “Thlarau Thianghlim in nan zate parah hnangamnak lo pe hram seh” tiah thla za kan run lo cam sak hai. Tuihni cu Pasca caan sungih Kaar 7 nak Tlawngkai ni 5 ni, 2021, May thla 21 ni asi. Tuihni kan siar dingmi Bible pawl tla cu Tirhthlah 24:27; 25:13-21, cun Thuthang ttha ahcun John 21:15-19 tiang pawl tla ansi pei. Tuihni ih kan ruah khawm tlang ding mi cu “Khrih ih tuurual kilkhawitu tuukhal” tiah asi pei.

          Tuihni ih kan siarmi Thuthang ttha kha voikhat in siar sal uhsi.

          John 21:15-19 ah

          Bawipa Jesuh in Simon Peter hnenah “Johan ih fapa Simon, hi midang pawlin in duhdawt hnakin nang in I duhdaw sawn maw?” tiah a sut. Simon in “Asi Bawipa, ka lo duhdawt cu na thei asi” tiah a sawn. Jesuh in a hnenah “ka tuunote pawl kilkhawi aw” tiah ati. A voihnihnnak ah Jesuh in Simon hnenah “Johan ih fapa Simon, I duhdaw maw?” tiah a sut sal. Simon in “Asi Bawipa, ka lo duhdawt cu na thei” tiah a sawn. Jesuh in “Ka tuu pawl kilkhawi aw” tiah a ti. Cun Jesuh in “Johan ih fapa Simon, I duhdaw maw?” tiah a sut lala. Cutin voi thum tiang Jesuh in “I duhdaw maw?” tiah a sut ruangah Peter cu a riah a sia ih Jesuh hnenah cun “Bawipa, Nang cun ziang hmuahhmuah na thei ttheh; ka lo duhdawt ti khal na thei ttheh ko asisi!” tiah asawn. Cule Jesuh in “Ka tuu pawl cawm aw. Thungai in ka lo sim: na no lai ahcun na tim na tuahih na duhnak hmun pohah a feh; asinain na tar tik ahcun na baan na pharh dingih midang in na tim an lo tuah sak dingih na duh lonak hmunah an lo hruai ding” tiah ati. Hi ti’n a ttong tikah Peter hi ziangbangtuk thihnak a tuar dingih ziangbang tukin Pathian hnenah sunlawinak a pe ding ti kha Jesuh in a langternak asi. Cule Jesuh in “I thlun aw” tiah ati.

          U le nau pawl, thosaltu kan Bawipa Jesuh Khrih hi Dungthluntu pawl hnenah a langih Simon Peter hnenah “I duhdaw maw?” tiah voithum tiang a sut hai asi. “Midang pawlih in duhdawt hnakin nang in i duhdawt sawn maw? tiah a sut asi. Peter in Bawipa a duhdawtnak cu midang hmuahhmuah hnakin a tam ttul. Maria Magdalena in Bawipa a duhdawt hnakin, John in Bawipa a duhdawtnak in, Thomas in Bawipa a duhdawt hnakin, Paul in Bawipa a duhdawt hnakin midang pawlin Bawipa an duhdawt hnakin Peter ih Bawipa a duhdawtnak cu a tam sawn le a thuk sawn a ttul. Thosaltu Bawipa Jesuh in Simon Peter hi sur khat ko in nga a awkter ih nga tumpipi 153 pawl hnakin Bawipa Jesuh kha a duhdawt sawn a ttul, ziangahtile Simon Peter hi Bawipa ih tuunote kilkhawitu, Bawipa ih tuurual kilkhawitu le cawmtu si dingah Bawipa in ttuanvo a pe ruangah asi. Bawipa in voithum tiang Simon hnenah I duhdaw maw? tiah a sut sannak cu amah Peter in Bawipa kha voithum tiang a el dah ruangah asi. Voithum tiang Bawipa kha dung a tun ruangah, voithum tiang Bawipa a hlon ruangah a tu ahcun voithum tiang a hmurka rori in Bawipa a duhdawtzia hi a langter duh asi. Bawipa a duhdawt tluk in Bawipa ih pumtthen asimi a Kohhran asilole a Tuurual pawl tla duhdawt ding, kilkhawi ding le cawm dingah Bawipa in ttuanvo tumpi pekin a hril.

          Bawipa Jesuh in Simon Peter hnenah “in duhdawt ngaingai ahcun ka tuurual pawl hrangah le ka tuunote pawl hrangah na nunnak na pe a ttul asi” tiah a ti duhnak asi. Duhdawt nak sungah ttuanvo timi hi a tel ringring. Cumi ttuanvo sungah peksannak tla a tel cih ringring asi. Kannih tla Bawipa Jesuh kan duhdawt taktak ahcun amah kan rian dingih amah vekin midang hrangah a ttul caan ah a ttul vekin peksannak kan nei a ttul asi, kan nunnak tiang hmanah. Duhdawtnak taktak cu rian awknak le peksan nak asi ti kha Bawi Jesuh nih in zirh asi. Bawipa Jesuh kan duhdawt timi hi milai pawl kan duhdawtnak thawngin langter ding kan si asi. Hi leitlun ah duhdawtnak cu kan hrangah a khuinh-htu pakhat asi. Asinain cumi a khuinh-htu in ttuanvo tumbik ah in hruai asi ti kha kan thei a ttul ngaingai asi. Simon hi Bawipa Jesuh ih a khuinh-htu a co ih a tuurual pawl le a tuunote pawl kilkhawi dingah le tuamhlawm dingah le cawm dingah ttuanvo a nei. Tuurual pawl le tuunote pawl hi Simon Peter kut sungah a um thlangih cumi pawl hrangah Peter in a nunnak pek tiangin a duhdawt a ttul. Bawipa Jesuh in John 10:11 “Kei cu tuukhal ttha, tuu hrangih a nunnak pe siangtu ka si” tiah a zirh cia. Peter tla tuukhal ttuanvo a co nak thawngin Jesuh Khrih ih aapmi a tuurual pawl hrangah thinglamtah parah thihnak tuarin a nunnak a pek asi. Curuangah Jesuh in Peter hnenah “Thungai in ka lo sim: na no lai ahcun na tim na tuahih na duhnak hmun pohah a feh; asinain na tar tik ahcun na baan na pharh dingih midang in na tim an lo tuah sak dingih na duh lonak hmunah an lo hruai ding” tiah ati. Hi ti’n a ttong tikah Peter hi ziangbangtuk thihnak a tuar dingih ziangbang tukin Pathian hnenah sunlawinak a pe ding ti kha Jesuh in a langternak asi” tiin a sim cia asi tiah tuihni kan siarmi John 21:18-19 ah kan hmu thei.

            Peter in Jesuh Khrih ih tuurual khaaltu a cang tikah amah a roltu tuukhal pawl hmuahhmuah hnenah 1Peter 5:2-4 “Pathian in a lo pekmi tuurual khaaltu si uh; nuar phahih a khaaltu siloin Pathian ih duhnak bang tukin thinglung tho tein a khaaltu rak si uh. Hna nan ttuan tikah tangka duh ruangah si lo in duhnak ngaingai thawn ttuan sawn uh. Nanmah ih kilkhawi dingih retmi tuurual kha a uk in uk tum hlah uh; an zohtthim dingin nung sawn uh. Cule tuukhal Bawibik Khrih a rat tikah a tleunak a dal thei dahlomi bawi lukhuh sunglawi nan ngah ding” tiah a cah ta asi.

          Tuukhal pawlin tuurual pawl hi thudik zirhnak thawn siseh, thudik phuan nak thawn siseh, Missa sum saknak le a dang Sacrament pawl peknak thawn siseh, thlacam saknak thawn siseh, nun simnak thawn siseh, nuncan ziaza ttha hmuhnak thawn siseh, mina pawl vehin thlacam saknak thawn siseh, lung retheimi pawl hnemnak thawn siseh, ngaktthah pawl, pahmei le nuhmei pawl, miharsa le mifarah pawl bawmnak thawn siseh, zumnak derhdaimi le thanaumi tuurual pawl thazaang peknak thawn siseh, fimthiamnak lamah khaisannak thawn siseh khaal ding asi. A tuukhalnak ah tuurual pawlin tla telpi uhsi, bawm uhsi, a thusimmi ngai uhsi, thlacam sak uhsi, cang thei tawk in bawm uhsi, thazaang pe cio uhsi.

          A ngaitu nan zate parah Pa le Fapa le Thlarau Thianghlim in hnangamnak thluasuah lo pe hram seh. Amen.