Khrih thawn kan pehzom awk tikah siam thar mi kan si (Rev. Fr. Joseph Ro Nei Thang) June 20, 2021

Khrih thawn kan pehzom awk tikah siam thar mi kan si

Thuthangtha sim tu Rev. Fr. Joseph Ro Nei Thang

June 20, 2021

Siarding: Job 38: 8-11; Saam 107: 23-26, 28-31; 2Kor 5: 14-17; Mk 4: 35-41.

            RVA Falam Chin service ah leitlun hmun tinkip ihsin thlarau rawl a zawh ringringtu Bawi Khrih ah duhdawt zetmi nu le pa, u le nau pawl, “kan Bawipa Jesuh Khrih ih zaangfah lainatnak, Pa Pathian duhdawtnak le Thlarau Thianghlim ih pumkhat sinak pawl cu nan zate thawn um hram seh” tiah cibai ka run lo buk hai. Tuihni cu 2021, June thla ni 20, kumkhat sungih caankeel Zarhpi voi 12 nak asi. Tuihni kan siar dingmi Pathian ih ttongkam pawl cu Job 38:1, 8-11; 2Cor 5:14-17; Mark 4:35-41 tiang pawl tla ansi. Kan ruah khawm tlang dingmi cu “Khrih thawn ton awknak cu siam thar sinak” timi asi pei. 

            Tuihni kan siarmi Bible a voihnihnak kha siar sal uhsi. 2Korin 5:14-17 ah Paul in “Mi pakhat cu mi hmuahhmuah ai ah a thi ih a cuih a thihnak sungah cun zozo khal kan telih kan ttawm aw ve asi, ti kan thei ngah hnu ahcun Khrih ih duh dawtnak in in uk asi. Khrih cu mi hmuahhmuah hrangah a thi ruangah zozo khal a mahih bul hrang lawngah nung ding an si nawnlo; an ai ah a thi ih a nungsaltu hrang lawngah nung ding an si sawn. A tu ahcun milai sinak zohin zo hmanih thu kan rel nawnlo. Caan khatkhat ah Khrih cu milai sinak zohin a thu rak rel hmang nungla a tu ahcun kan rel nawnlo. Zozo khal Khrih thawn an pehzom awk tikah cun siamthar asi; a nun hlun cu a cemih nun thar a thok zo asi” tiah asi. 

            U le nau pawl St Paul in “Zozo khal Khrih thawn pehzom awk tik ahcun siam tharmi ah an cang asi” tiah tuihni kan siarmi Bible a voihnihnak 2Kor 5: 17 ah in run sim. Siam tharnak, hrin tharnak, piang tharnak, nun tharnak tiah a phunphun in kawh thei asi. Peter cu Jesuh Khrih thawn an ton awk tikah a sualnak pawl a hmu ih Luka 5:8+10 ah ‘Simon in nga tampi a awk kha a hmu tikah Jesuh ih hmaika ah a khuk a bilih “Bawipa i fehsan hram aw; ziangahtile kei hi misual ka si” tiah ati. Jesuh in “Ttih hlah; a tu thokin minung kaitu na si ding” tiah ati. Simon Peter in Bawipa Jesuh a tong tikah siam thar mi ah a cang asi. Matthew in Bawipa Jesuh a tongih a nunnak a thleng rori asi. “Matthew, I ra thlun aw” tiah a ti. Matthew tla a hnattuan ttha le a thilri pawl tansan in Bawipa Jesuh a thlun asi. Amah vekin sual neitu tiah hnonmi siahkhawng pawl le hlawhhlang pawlin Bawipa ih thuzirhmi ngai dingah a hnenah an va panih rawl einak puai an tuah asi tiah Mt 9:10 ah in sim asi. Matthew timi siahkhongpa in a nuncan a thleng ruangah vancungram ah lungawinak a um ngaingai asi. Jesuh Khrih le Matthew an ton awknak cu a siamtharnak ah a cang asi.

            Luka 19:1-10 ah Zacheus cu miniamte asinain milian zet a siih siahkhongtu asi. Bawipa Jesuh kha a hmu caak tuk ruangah theipikung parah a kai asi. Theipikung tangah Jesuh Khrih a thlen tikah Jesuh in “Zacheus, zamrang in rungttum aw; ziangahtile tuih zaanah na inn ah kan riak ding” tiah ati. Zacheuh khal zamrang in a rungtum ih Jesuh kha a inn ah a ra tlungter. Cule a inn ah an thlen tikah Zacheus in Bawipa Jesuh hnenah “Bawipa, I ngai hnik! Ka neihmi hrekkhat cu mifarah pawl ka pe ding; cule ka bum ngahmi an um pang ahcun a letli in ka sam sal ding” tiah a ti. Jesuh in a hnenah “tuih sunah hi mipa inn ah rundamnak a ra thleng zo; ziangahtile hi pa khal hi Abraham ih tesinfa asi ve. Mifapa cu a hlomi pawl hawl dingah le rundam dingah a ra asi” tiah ati asi.

            Zacheus cu Bawipa Jesuh a ton tikah siamtharmi ah a cang asi. Cun John 4 ahhin Jacob tikhur kiangih Samaritan nunaunu le Bawipa Jesuh an ton awkih an biak awknak ruangah Samaritan nu ih nuncaan a thleng asi. Amah le amah misual a si kha a thei awk asi. Siam tharmi ah a cangih amah thawngin Samaritan khaw sungmi pawl tla in Jesuh Khrih an zum asi. Cuticun Samaritan miphun pawl le Judah miphun pawlih theihdan awknak hruangpi tla siatbal ttheh ah a cang asi. Bawipa Jesuh Khrih ah siamtharmi ah an cang asi.

            John 8:4-11 ah Jesuh hnenah Daanthiam saya pawl le Pharisee pawl an ra ih “Sayapa, hi nunaunu hi ttangttawm sualnak a tuah lai fang rori ih kaihmi asi. Kan dan sungah Moses in thupekmi vekin cubangtuk nunau cu lungto thawn denthat dingah thu in pek dah asi. Nang teh ziangtinso na ruat?” tiah an sut. Hitiih an suhnak cu Jesuh kha sual an puh theinak dingah thang an kami asi. Asinain anih cu a kun ih leitlung ah a kutzung in ca a ngan rero. Cutin thu an sut rero ruangah Jesuh cu ding tein a hung to ih an hnenah “Nanmah lakih sual a tuah dahlomi in hmaisabikah lungto in den uh” tiah a ti ih leilung ah kun in ca a ngan sal. Cumi an thei tikah an zate in pakhat hnu pakhat an tlan ttheh: Upa pawlin an tlan hmaisa. Cule Jesuh lawng a taangih a hmaika ah a cuih nunaunu lawng a ding. Jesuh cu dingtein a hung to salih a hnenah “Khui ahso ansi ttheh? Mawh a lo puhtu zohman an taang nawnlo maw?” tiah asut. Nunaunu in “Asi Bawipa, zohman an taang nawnlo” tiah a let. Cutikah Jesuh in “Cuti asile Kei khalin mawh ka lo phurhlo ding. Va feh awla sual sal nawn hlah” tiah ati ti thu kan hmu thei. Uiretnak sualnak a tuahtu nunaunu hi Jesuh thawn an ton awk tikah pumsa le thlarau rundamnak a ngah asi tiah kan ti thei asi.

            Paul tla Jesuh Khrih thawn an ton awk tikah siamtharnak a ngah asi. A hlan ahcun zumtu pawl hremtu a rak si dah nain Damascus ah a feh lai ih lamzin ih a tonmi Jesuh Khrih in a nunnak a siam thar sak asi. Maria Magdalena hi sual neitu ah hminthang zet a rak si dah nain Jesuh Khrih thawn an ton awk tikah a nuncan a thlengih siam tharmi ah a cannak thawngin thosaltu Jesuh Khrih kha hmaisabik ah a hmu thei asi.

            Duhdawtmi u le nau pawl, kannih tla Pathian zarah zumtu ah kan cangih baptism kan ngahnak thawngin Jesuh Khrih thawn kan ton awk ringring, a thi le sa kan sannak thawngin le Sacrament dang pawl kan sannak thawngin Jesuh Khrih thawn kan ton aw ringring. Duhdawtnak hnattuan ttha pawl kan ttuannak thawngin Jesuh Khrih thawn kan ton aw ringring. Mi pathum, pali kan khawmih amahih hminin thla kan cam tikah Jesuh Khrih thawn kan ton awk ringring. Hmuh khop tlakin siamtharmi kan si zo maw? Peter hi Jesuh Khrih thawn an ton awk, Thomas hi Jesuh Khrih thawn an ton awkih siamtharmi ah an rak cang dah nain Peter in a Bawipa kha “Ka theilo” tiah voithum tiang a el. Thomas tla siamtharmi a rak si hnu ah a Bawipa kha a zumlo asi; a Bawipa hi a phatsan. A Bawipa in a zumlonak thinlung kha a kuh sak sal asi. Siamtharmi kan si nak kha kilkhawi ringring uhsi; sual hnawihnihnak ihsin luat thei dingah zuam cio uhsi.

            A ngaitu nan zate ih parah Pa Pathian in thluasuah malsawm lo pe ringring hram seh.