Khua cuan nak tlang in Kum hlun thlah aw

"Khua cuan nak tlang in Kum hlun thlah aw"

Christmas caan, tlawngkai nihnih ni (Dec. 31, 2019)

Siarding: 1Jn 2:18-21; Ps. 95:1-2, 11-13; Jn. 1:1-18.

• Tuisun kan siarmi thuthangttha cu "Pathian ih phuan awknak" thu a si.
• Himi Bible catlang cu Pathian le minung pehtlaih awknak thu a si. Ziang tivek in an pehtlaih aw ti khal kan zoh ding ih cumi ah Pathian cu kan hnen ah ziang tivek in a phuangaw ti kan hmu vivo ding.
• Hmaisa ah kan siarmi Bible cu zohfel tlang uhsi.
• Kan siarmi Bible (Jn 1:1-18) hi khatlam zim le khatlam zim kai khawm sehla a laifang ah "Pathian ih fa minung" ti in kan hmu ding.
• Cang 1-2 ahcun Pathian thawi a um tlangmi "Thu" kan hmuh vekin caang 18 ahcun "Pa ih ttang sung ih a um mi Fapa" kan hmu.
• Cang 3 le cang 17 ahcun "Thu" thawngih "sersiamnak" Jesuh thawngih "sersiamsalnak" kan hmu.
• Cang 4-5 le 16 ahcun "minung hnen ih pekmi laksawng" kan hmu.
• Cang 6-8 le 15 ahcun "John ih theihpinak" kan hmu.
• Cang 9-11 ah "Thu cu leilung ih a rat thu" kan hmuh vekin Cang 14 ahcun "Thu ih minung cannak" kan hmu lala.
• Cang 13-14 ahcun "Thu thawng in Pathian ih fa ah kan cang" ti a si.
• John ih in fehpi daan "thuken" kan zoh a si le Nazareth khua mi Jesuh cu Pathian ih langawknak sangbik, Pathian in hmutertu, Pathian in thei tertu a si. Culawng si lo, Pathian thawi in pehtlaih awkter vek in amah rori kan lak ih a rawng umnak thawng in amah le amah khal a phuang aw. Anih cu Pathian thawi kan biakawknak ttongkam a si. Amah thawngin "Pathian ih fa" kan si.
• Ttongkam, "Thu" cu a hramthok ihsin a rak um cia vek in sersiamnak ah a rak tel. Cui ttongkam cu minung ah a cang ih kan lakah a um zo" ti a si. Kan lakih naute dinhmun, mi derdawm dinhmun ih a rawng suaktu Jesuh cu a rak umcia mi a si thu, a langter. Sersiamnak ih rak tel zo a si. 
• Kan lakih a um mi Pathian, Emmanuel, a si ruangah, "Leilung semsuah a si hlanih a neihmi sunlawinak, Pa ih a pekmi sunlawinak (Jn 17:5, 24)" pawl khal kan hmu.
• Hihi Jesuh thawng in Pathian kan hmuhnak pawl hrekkhat an si.
• Tuisun cu kumpi kumkhat ih ni netabik a si vek in kan thlarau lam tluan ah voikhat te cawl lawk in khua cuan tlang uh si. Kumkhat sungih kan mai "thuanthu zuknung" kha zoh sal in thazang la uhsi.
• Cangantu John cun "zaangfahnak le thutak cu Jesuh hrih hnen ihsin a ra" a ti vek in cui zangfahnak pawl cu siar uhsi.
• Hmaisabik ah "kan nunnak" hi ruat uhsi. Kan mahte "ka nung ding, ka thi ding" ti aw thei kan si lo. Thaw kan thawt mi hi Pathian ih pekmi a si (Gen 2:7). Kan samphang phangkhat hman "dum seh, rang seh" kan ti thei lo (Mt 5:36). Asinan, tuini tiang himdam te ih kan um hi Pathian ih thluasuah a si. Kan nunnak hrangah "Bawipa ka lung a awi" ti ding hrimhrim kan si.
• '' Kan neih kan siah" hi kan ruat ding.  Kan mahte thil kan ti thei hmang ti ih kan ruah lai ah, fimthiaam san a si ih Pathian a ttul lo hmang kan ti laiah "ziang hmuahhmuah cu "Pathian hnen in a ra (Jn 1:3)" tiah kan Bible cun in sim. Cuti a si le kan neih kan siah hi Pathian thawi pial aw thei pakhat hman an um lo, Pathian hnen ihsin kan ngahmi lawnglawng an si. Curuangah, kan neih kan siah hrangah "Bawipa ka lung a awi" ti ding hrimhrim kan si.
• Kan "nupa, unau pawl, rual le pi pawl" hi ruat khal sehla Pathian ih in pekmi thotho an sit i kan hmu ding. "Minung hi amah lawng a um ding cu a rem lo; amah bawmtu dingah rualpi ka tuah sak ding (Gen. 2:18)" a ti. "Fa tampi nei in pungzai uh (Gen. 1:28)" a ti. Pathian ih thluasuah kan don mi hlir an si. "Bawipa ka lung a awi" ti ding hrimhrim kan si.
• Kan ei kan in mi pawl khal hi Bawipa ih thluasuah thotho an si.
• Tui kan thlah liam dingmi kumpi sung ih kan "thuanthu zuknung" von zohsal sehla kan parih thil thleng hmuahhmuah cu Pathian hnen ihsin an si thu kan hmu ding.
• Kan nun ah Pathian ih thluasuah siarding tamzet kan nei. Harsatnak kan tong hmang kan ti caan khalah suahnak "ong" kan hmusal thotho ih cui harsatnak cu pahtlang theinak thazaang kan nei. Cu khal cu Pathian ih thluasuah a si. "Ka zaangfahnak cu na hrangah a tawk a si (2Cor 12:9)" ti in kan hmu.
• Jesuh cun a Pa cu kan hnen ah a phunphun in in theiter. Amah le amah khal in theiter. Kan nun ih kan hmuhmi thluasuahnak pawl hi cui "theihternak" pawl an si. John cun, "a ram sungah a ra na in a minung pawl in an rak sang lo" a ti. Kan parih thil thleng le thluasuah pawl a siar kan thiam lo a si le Bawipa cohlanglo ah kan cang ding. Cuti a si le kan hrangah ttih a nung ding.
• Himi pawl parih lungawi hna kan thiam lo a si le "mi aa pit tawp" kan si ding.
• Kan Pathian cu sui lukhum khum in a ra lemlo ding, Mawttaw tthattha to in a ra lemlo ding, thluasuahnak kuang tiah keng in a ra lemlo ding. Asinan, kan parih thil thleng hmuahhmuah zoh in Bawipa kha a hmuh thiam tum uhsi, a thluasuah siar thiam tum uhsi.