Khui Mi Na Hril Sawn Ding

Thu thang tha a ngai tu u le nau pawl ruangpum, thinlung le thlarau ih dam cah nak nan zate par ah a thar in thleng hram seh tiah thlaza ka cam.Thu thang tha hlawm aw thei ding ih dam nak le caan tha in pe tu kan Pathian a hmin ka thang that.Tui sun ih kan siar mi Bible sung in thlarau tirawl hil tlang ding in ka lo sawm. Kan thu lu dingah “khui mi na hril sawn ding”tin ka hmang.

     A pakhat nak ah thu khaam kuang maw, thu khaam lungpheng khui mi na hril sawn ding. 2Sm 7:4-17 sungah siangpahrang David in thu khaam kuang ret nak ding biak inn tha zet, mawi zet sak a rak tum. Pathian in a lung kim pi lo ih, na fapa in a sak ding a rak ti. Thu khaam kuang cu a thu pi ko, thu khaam kuang ret nak ding biak inn pi khal a thu pi zet ko. Asinan cu pahnih hnak ih a thu pi sawn tucu biak inn sung ih um, thu khaam kuang sung ih um, lung pheng pahnih par ih ngan mi Pathian ih tong nung a si. David ih sak a duh zet mi biak inn pi cu, a fapa Solomon in tha zet, mawi zet in a ron sak suak. 1siang 6 sung ah kan hmu. Kum zali tluk a rong rei hnu ah Balilon siangpahrang Nebukhanazar le a ral kap pawl in Jerusalam le biak inn pi cu an duh tawk in an siat suah thluh i, mei in an ur kang thluh. Ral hmuahhmuah neh vivo thei tu David le mi fim bik Solomon tum tah mi le tuan suak mi pawl cu kum 400 lawng a daih. A siat bal thluh, vut caam ah a cang thluh. Thu pi tuk lo hi thu pi bik ah kan re pang kei, ral ring uh si. Cung nung bik Pathian cun David le Solomon hmang in biak inn hnak ih tha sawn, thu pi sawn hna a tuan. Cucu biak inn sung le thu khaam kuang sung ih um kum khua ih siat thei lo, san khuk ih a hmun mi Pathian tong nung ngan hi asi. David ih ngan mi Saam hla pawl le Solomon ih ngan mi hla le thu fim pawl cu kan ca thiang hlim Bible sung ah kum 2000 leng lo a hmun zo ih, zum tu Khritfa tam pi ih thinlung le nunnak ah fek zet le mawi zet in, hmun a la ngah zo a si. Biak inn tha le mawi zetzet neih thei hi a thu pi zet ko nan, Pathian ih thu nung tong kam thianghlim Khristfa pawl ih thinlung le thlarau ih hngek khoh zet ih hram a bun ding hi kan thu pi ter sawn kei uh. A hlun vivo ding mi biak inn hnak in a thar vivo ding mi minung thinlung le thlarau hrangah, na pi in hna tuan sawn uhsi. Biak inn khat zet ih kan khawm caan ahcun, tha a tho, lung a awi. Thin lung le thla rau ih Pathian thu thang tha khat zet ih, a um thei ah cun, thil tha sawn le lung awi za sawn asi. Lei tlun kan nun nak a cem tikah biak inn pi cu lei tlun ah kan taan ta ding. Pathian thu nung cu vancung tiang kan kai pi ding. Thu khaam ret nak kuang le inn maw na hril sawn ding. Cu mi sung ih um Bawipa ih thu pek le tongkam nung so na hril sawn ding.

    A pahnih nak lei ram tha maw, thlai ci tha khui mi na hril sawn ding. Thingkung le thlaici kan ciin tikah lei ram tha te le thlaici tha te kan hril theu. Thingkung ih duhphun lei ram hril thiam khal a thu pi ih, lei ram ih duh phun thing kung le thlaici hril thiam khal a thu pi zet. Tui sun ih kan siar mi thu thang tha Mk 4:1-20 sungah thlai ci vorh tu tah thim nak thu kan hmu. Tah thim nak ih sul lam le a sim duh mi khal Jesuh in fiang zet in in sim bet thluh. Lei ram phunli a um ih thlai ci cu phun khat lawng asi. Thlaici cu Pathian tongkam asi ti fiang tak in in sim. Jesuh ih in sim mi khal nolh bet in tha zang kan ngah bet thei nak ding ruah san nak thawn, mai ruah nak te khal hlawm awk ve ka duh. A pakhat nak lam zin kap ih tla pawl cu Pathian thu an thei nan Setan in a lak sak ti a si. Pathian ih tong kam nung le Jesuh Khrih ih thu hla hi kan sungah um lo dingin, setan in hna a tuan rero. Setan ih lak sak thei ding tiangin ziangah so setan cu lut thul suak thul ding in sangka kan on sak thiam. Pathian thu nung ih kan nun nak hmunhma a lak lo pang ahcun, setan kikawng le meisau in bu a sam dingi,colh hmun a la ding. Thlarau mit bengvar in fim khur tum thlang uhsi. Lung sia dap lak ih thlai ci cu Pathian thu lungawi ten an pom nan, thuk pi a pil loih, rei a daih lo ti asi. Har nak le buai nak tampi lak ah Khrihfa pawl hi thinlungfek zet le hnangam hawl thiam taan la thei tu ding sawn kan si. Ol te i bei dong mai le aihram phunzai mai hi ziangkim tithei Jesuh kan rinsan lo tuk ti a lang sawn. Dam lo le ni khua sia le remcan lo nak a phun phun puh mawh kan hawl theu. Ti toh tammi thlai ci cu a than zutzo vek in khawm nak le Pathian thu hla ngai naa in, tha zang kan la asile zum nak hram cu a fek vivo ding. Hling bur ih tla mi cu len duh nak le a dang duh nak in a khuh i, a rah thei lo in ti. Rah rah lo i, a kung pi lawng tum ciamco hi, Bawipai duh mi a si lo i, kan uar ding mi khal asi lo. Inn tha le lo tha le sumsaw ah kan thangso vivo ko nan, thu thang tha i thanso cuanglo ahcun, fim thiam nak a sang sin vivo nain Pathian thu theih nak ih kan fim sin lo ah cun,im.. a va poi zik em. Pathian tongkam ah fim uhsi, lian uhsi, thangso uhsi. Thu pi ih kan ret mimi a thangso ding. Lei ram that nak ahcun let zakhat tiangin a rah. Pathian tongkam nung hi kan nun ah siseh, kiangkap midang hrang ah siseh, karh zai pung zai ter sin uhsi. Leiram a tha sinsin in ti lo i, thlai rah a karh a tam sinsin in ti. Lei lung ih sersiam mi kan tisa hnak in a thu nung ah hram hngek la cio uh si. Fim nak le  neih mi hnak in thlarau ih thanso le tam sin aur sawn uhsi. Tum sawn uhsi. Pathian thu le lei tlun thu, thlarau thu le tisa thu, ni tin hril ding kan nei. Kum khua a hmun mi Pathian tongkam nung hril thiam, hril thei dingin, Bawipa in thluasuah in pe cio hram seh. Amen.