Kumkhua hmun mi hrang ah

 “Kumkhua hmun mi hrang ah”

(November 29, 2019 - Friday)

          RVA a ngai tu Bawi Khrih ah duhdawtmi u le nau pawl, nan zate hnen ah thinlung, thlarau le taksa damcahnak pawl Pathin in lo pe hai hram seh. Tuni November 29, 2019 (Tlawngkai ninga) ih kan siar ding mi cathianghlim pawl cu Daniel 7:2-14 tiang le Lk 21:29-33 tiang a si ih a tu ah thuthangṭha (Jesuh Khrih ih ṭongkam) ka siar ding ih kan ngai tlang ta hrih  pei tiah ka lo sawm duh.

Lk 21:29-33

²⁹Cule Jesuh in hi tahṭhimnak hi a sim: “Theipi kung siseh, thingkung dang khal siseh, ruathnik uh.

³⁰Hnah note a cerh tikah khuaṭhal caan a nai zo ti nan thei.

³¹Cu bangtuk in hi thil pawl a tlun ih a kim vivo tikah Pathian Uknak cu a thleng zik thlang a si, ti thei uh.

³²Atuih a nungmi pawl an thih ṭheh hlanah hi thil hmuahhmuah cu a thleng kim ṭheh ding ti kha ciing ṭha uh.

³³Van le lei cu a hloral leh ding na’n ka thu cu a hloral dah lo ding,” tiah a ti.

(Jesuh Khrih ih thuthangṭha a si.)

          Duhdawtzetmi zumtu u le nau pawl, tu ni ih kan siar mi Gospel siseh, a vei khat siar nak a si mi Daniel ih cauk sungah siseh, kumkhua a hmun lo mi le kumkhua a hmun mi thu pawl kan siar, kan thei a si. Bible a veikhatnak kan siar mi sungah cun Siangpahrang Belshazzar in Babilon ram ah Siangpahrang a ṭuan kum khatnak ah Prophet Daniel in langnak a hmuh mi thu kan hmu a si. Daniel in langnak a hmuh mi cu a tawi zong in kan sim ding a si le, ṭihnungza sahrang pali pawl a hmu ih, a pakhatnak sahrang cu kiosa a bang ih muvanlai vekin thla a nei ati, a pahnihnak sahrang cu savom a bang ati. A pathumnak sahrang cu tlavang a bang ih a zaang parah thla pali a nei ati. A palinka sahrang cu huham neizet, ṭihnungza le tuksunza ramsa a si a ti. A cuih ram sa in cu thir ha tum zetzet a nei ih sahrang dang thawn bang lo in ki khal pahra a nei ti a si. Hi sahrang pawl thu hi a tawi zawng in hi hmuah in rel hrih seh la a kim deuh in kan thei duh a si le Daniel bung 7 ah kan mah te cio in siar theih a si. Himi sahrang pawl a tlang pi in kan zoh a si le thazang cak zetzet, huham nei zetzet le ṭihnungza zetzet an si ih - hi mi pawl hi leitlun ram uktu siangpahrang pawl a khih hmuh a si. Daniel ih langnak a hmuh mi ah ne ta bik ih a hmuh mi pakhat cu ziang tin a sim ti si le - minung a bangmi pakhat ka hmu. Mero par in a ra ih kumkhua ih anungmi hnenah cun a feh ih a hnen ah a thleng. Cule phunkip, hnamkip le ṭongkip ih ṭongtu pawl in amah an rian theinak dingah a hnenah cun thuneihnak, hminthannak, upatnak le siangpahrang huham hmuahhmuan pek a si. A thuneihnak cu kumkhua in a hmun ding ih a uknak a cem dah lo ding a ti. A cu mi mero par in a ra ih thuneihnak, hminthannak, upatnak le siangpahrang huham hmuahhmuan pek a si a ti mi pa cu Bible thar kan zoh a si le Jesuh Khrih a khih hmuh ti kha kan thei thei.

Lk 21:27 ah – Cutikah Milai Fapa cu mero lakin sunlawinak le a nasa zetmi huham thawn a lang ding – a ti. Kan nih Catholic pawlpi in Jesuh Khrih cu singpahrang hmuahhmuah ih Singpahrang, bawi hmuahhmuah ih Bawi, kan Siangpahrang, in uktu a si lang ter nak ah kum tin ten le tu kum sungah cun kan dung zarhpini khal ah Jesuh Siangpahrang pui sunglawi zet in kan tuah. Singpahrang pawl ih uknak cu a cak zet mi le ṭihnungza zet a si mi sahrang pawl vek si hman seh la cem ni a nei, siatral ni a nei. Asinan kan Bawipa Jesuh Khrih ih uknak in a neh ṭheh ih a uknak khal cu kumkhua in a hmun ding asi.       

            Milai pawl ih uk nak ram le caan sung ah cun harsatnak, ninghan riahsia nak tam pi a um ringring ding. Tuni Gospel kan siar mi sungah - Cu bangtuk in hi thil pawl a tlun ih a kim vivo tikah Pathian Uknak cu a thleng zik thlang a si, ti thei uh – tiah kan Bawipa in in tiam a si. Jesuh in – hi thil pawl a tlun ih a kim vivo tikah – a ti mi cu ziang a si ti si le, hi a sim hlan ah Leilung tlun ah buainak le harsaknak a phunphun a thlennak ding thu, ṭihnungza thil phunkim a thlennak ding thu le a mah hmin hmang in a hman lo mi zirhnak pawl a um ding mi thu pawl in sim cia a si. Cu pawl kan hmu tikah kan nih in a tik cu a nai zo ti kan thei nak ding ah tu ni ah Bawipa in in thei ter sal a si. Cun “van le lei cu a hloral leh ding na’n ka thu cu a hloral dah lo ding,” ti khal in kan Bawipa in in cah ta a si.

            Bawi Khrih ah dundawt mi u le nau pawl, leitlun ah nuamnak siseh, harnak siseh, lungawinak siseh, riahsianak siseh, liannak siseh, farahna k siseh, duhnungza siseh, ṭihnungza siseh, uktu pawl siseh, mikut tang ih um mi pawl siseh ziangtinkim a cemral leh ding asi. Asinan zumtu kan nih hrang ah cun hihi a cemnet nak a si lo ih kumkhua a cemthei lo mi uknak, a thi thei lo mi nunnak le kumkhua a hmun mi nun nuamnak kan Bawipa hnenah a um ti ruah sannak nei in hmakhat te lawng kan umnak ding a si mi leilungtlun ah kan thin lung ret ta lo in kumkhua a hmun mi hnen sawn ah kan thinlung ret in nung cio uh si, zuam cio uh si, ruahsannak nei cio uh si ti kha ka lo sawn duh a si. A ngai tu nan zate par ah ka lungawi. A zate ih a thiam tu Pathin in thluasuah lo pe hai hram seh. Amen.

Fr. Peter Lal Zin Thang 

Hakha Diocese