A Lak Ti Um Lo

Zarhkel Zarh (16) nak, Rev. Fr. Polycarp Thawngte ih thuthangtha sim mi (July 19, 2020)

Readings: Wis 12:13, 16-19; Ps 86:5-6,9-10, 15-26; Rom 8:26-27; Mt 13:24-43 

         Alak ti a um lo

          Tuikum cu Biaknak Kum Zarhpi-A kum a si bangin Thuthangtha Mate ih kum a si. Caantluang Zarhkar sungah cun a pehpeh in siar a si theu ruangah tuini zarh 16 nak Zarhpi ni khalah kan dung zarh kan siar mi thawn a peh in kan rel sal pei uh. Kan dung Zarhpi ah cun thlaici/ rawlci vorhmi cu Pathian tongkam a si thu tahthimnak thawn in sim nan tuini ah cun rawlci vorhmi cu minung, nang le kei kan si thu kan siar sal. 

          Kan dung zarhah ‘Alak si hlah seh’ timi thu tlangpi tar in kan hlawm aw ih tuini ah cun ‘Alak ti um lo’ timi thu tlangpi tar in ruah khawm tlang ka duh.  Thlaici vorhtu pa hnenah a hnenum pawl in  “‘Bawipa, na lo sungih na vorhmi cu thlaici ṭha an si lo maw? Khuiinso hrampi hi an rat? Hrampi cu kan va bawt pei maw?’ an ti tikah ‘Bawt hlah uh, ziangah tile hrampi nan bawt zawng ah rawl kung tla nan bawtcih pang ding.  Rawl laak a cut hlan lo rawl kung le hrampi cu ṭhang tlang ko haiseh. Cule rawl latu pawl kha hmaisa bikah hrampi bawt uhla nan tom hnuah ur uh; cuih hnuah rawl cu khawm uhla ka cuam sungah thun uh,’ ka ti hai ding,” tiah a sim. Hi tahthimnak sullam cu mitha le mithalo/misual pawl khihhmuh tu a si zia kha in sim sal.  Leipar kan umtudaan thlir tikah hin misual pawl ziangtin that kan zirh ding ti hnakin ziangtin cawh kuan kan pe ding ti sawn hi kan ruat tam theu.  Himi nundaan thleng dingin Tlawnglam fim zirnak ahcun saza pawl tlawngta nauhak thawilo ding, kawklo ding ti’n an ti.  Kei ka ti theu mi cu ‘thawi lo ding’ ti lawngin a tawk lo, thawilo kawklo in ziangtin nun kan sim ding, kan zirh ding ti tla in sim ci uh. Cuti silo ah cun hi daan khal saza mithawi hmang pawl cawhkuan pek dingnak men ah a cang lala tin ka hmu. 

          Kohhran sung khalah kan buai celcel.  Parish ih ka tuan pek ah Kumcem/General meeting kan tuah ih thu an suah micu ziang a si tile ‘a khawm dah lo pawl ziangtin kan tuah le a tha ding’ ti siih cawh kuan pek daan ding lawnglawng rel a si tikah ka um thei nawnlo ih thu suhnak ka tuah.  ‘A khawm dahlo pawl khawm theinak dingah tin teh kan tuah dahmi teh a um maw, ziang tal kan tuah theimi a um lo maw’ ka ti tikah mi-1 in ‘aw, si rori! Cawhkuah pek awk hnakin Novena thlacamnak kan tuah sak sawn le a tha ding’ a ti lohli. A dang 1, khawm pelh dah lo tu cun ‘hee, thlacamsak tivek cu thuphan men, tu tiang kan cam sak ringring ih thleng awk nak khal um cuang hlah’ a ti lala ih cawhkuan phunkhat khat tuah dingin thu kan rel leh sal thotho.  Cuticun khawm pelh dah lo pawl hnen thu ka sim tik le kan khawm leh kan thlacam nak hi kan nunah kan thathnem pi a tul tin ka sim ih ‘Duhdawtnak thlacamnak kan cam rero ih kan innhnen thawn hman kan biak awk theilo ah cun ziang a thahnem’ ka ti tikah nupi-1 in cuti a si le kan cam nawn lo men ding i ti cih. 

          Kan dungzarh ih ‘Alak si hlah seh’ tiih kan relmi ka ruah sal tikah cuti sile cu, ‘kan dang cuang lo e’ tiih thuthangtha ngai ding bang tum kan um ka phang.  Curuangah tuini vei-1nk kan siarmi Fimzirhtu kan ti ding maw Wisdom cabu sungah ‘Bawipa cu dingthluk lairel tu a si ruangah a minung pawl sualsir theinak ding caan a pek ih miding pawl mi zaangfah thiam ding a zirh’ ti’n kan hmu.  Curuangah famkim lo nak lakah kan theitawk in zuam ding hrimhrim cu kan si.  ‘Thlengawknak um cuang lo in zia’ tin baan san, colh san men ding kan si lo. 

          Tuini Thuthangtha a laifang ah thlaici hmuahhmuah lakah a fate bikmi a si nan a than tikah cun rawl kung lakih a tum bikmi ‘Antam ci’ le thilnu/colh malte in sang bawm khatpi a thawh ter thei zia pawl thawn Vancung Uknak cu tahthimnak in pek.  Kan fam kim lonak, kan palhnak pawl thei aw ih kan zuamnak a fate bik, malte te khal hi  Vancung Uknak hrangah a lak ti a um lo a si.  Kan thatnak le kan thiamnak parah si lo’n kan sirawknak le kan zuam sal nak parah Bawipa in dingthluk lairelnak in neih sak ding ti ruahsannak hlo ter lo in thazaang thar la sal cio uh si.