A lam tangtu maw dodaltu na si? (sim tu - Rev. Fr. David Kap Cin Mang) February 23, 2022

A lam tangtu maw dodaltu na si?

Thuthangtha sim tu - Rev. Fr. David Kap Cin Mang

February 23, 2022

“In dodal lotu cu kanmah lam tang a si.”

            RVA ihsin thuthangtha a rak ngaitu nan zate parah Bawipa’n hnangam daihnak lo pe in nan tuahtuannak kipah lo umpi cio hram seh ti’n thlaza cam phah in cibai ka run lo buk hrih hai a si.

Ahmaisa bikah tuini ih Gospel kan vun siar ta pei:

Marka 9:38-40

            Johan in, “Sayapa, na hmin in khawsia a dawisuaktu mi pakhat kan hmu ih kan lakih tel vemi a si lo ruangah kan khamta,” tiah a ti. Jesuh in, “Kham hlah uh! Ziangahtile ka hmin in mangbangza a tuahtu cun i simsia lo ding. Ziangahtile in dodal lotu cu kanmah lam tang a si” tiah a ti.

            Duhdawtmi u le nau pawl, mitu ih ka run siarmi thuhla theifiang ding cun, himi hlan ah ziangvek thuhla a rak um timi kan vun zoh bet a tul ding ti’n ka ruat. Mk 9 a thoknak lam kan zoh a sile, kan Bawipa in Peter, James le Johan thawn tabaw tlang par an feh ih a hmuihmel thlengnak thuhla kan hmu. Cule Mk 9:14 ihsin kan siar a sile, tlang tang ih a ummi Tirhthlah dang pawl in ramhuai dawisuak thei loin an buai kengkengnak pawl kan thei. Cumi theh Mk 9:33 ihsin kan siar bet a sile, Kapernaum khua an feh lai ah, lamzin tluan ah an lak ihsin zoso a tum bik timi thu ih an buainak thu pawl kan thei lala.

            Kan Bawipa in, nan lakah mi tumbik si a duhtu cun nautabik si hmaisa seh ti’n tangdor nun ih thupitnak pawl a zirh ciamco hai hnu ah, tuini ih kan siarmi thuhla kan theihmi hi a si.

            Himi thil umdaan kan zoh tikah, Tirhthlah pawl ih kan Bawipa an thlunmi hi thlarau lam thu ah zumnak taktak thawn thlunmi hnakin lei tisa daan lam zawngih hlawknak duh ih thlunmi an sinak a lang tuk. Himi ruangih mawhthluk ding ciamco khal cu an si cuang lo. Ziangah tile, kan Bawipai leipar a rat sannak an theihthiam hrihlo ruangah khal a si.

            Tuini kan siarmi sungih “Sayapa, na hmin in khawsia a dawisuaktu mi pakhat kan hmu ih kan lakih tel vemi a si lo ruangah kan khamta,” tiih Johan ih tongmi kan zoh tikah, kan Bawipa thawn umtlang rero tu anmah Tirhthlah pawl hmanin ramhuai an dawi theilo ruangih an buai rero lai ah, an lakih tello tu in Jesuh hmin in khawsia a dawisuak timi an hmuh tikah an ei thei lo bik ruangih kham tla an si thei. Cuihleiah, anmah lak hmanah zo a tumbik ih zo in huham a neibik ding tiih an buai rero lai ah an lak ih tello tu in hitivek thil maksak a tuah ve mi an hmuh tikah, an thin cu a nuam hrimhrim lo ding. Cule kan Bawipa ih huham khal anmah lawngih tawm thei dingmi ah an ruat tla a si thei.

            Ziangvek si khal sehla, kan Bawipai tongkam sawn kha kannih cun kan ngaihsak dingmi a si sawn. Kan Bawipa cun, “Kham hlah uh! Ziangahtile ka hmin in mangbangza a tuahtu cun i simsia lo ding. Ziangahtile in dodal lotu cu kanmah lam tang a si” ti’n a rak ti top a si cu.

            Himi kan Bawipai tongkam kan zoh tikah, Amaih hrilmi Tirhthlah pawl ih pawlkom sungtel (anmah thawn pehtlaihnak neimi) si ding a thupi lo a tinak siloin, zo pawl hi an lam tangtu an si ih, zo pawl hi anmah dodal tu an si timi sawn thupi ih ret dingah a zirh duhmi a si sawn.

            Hi tawk zawn ih kan Bawipai tongmi hi, Mt 12:30 sungih “Ka hnenih a tang lotu cu i dodaltu an si; i finkhawmpi lotu cu a thekdarhtu an si” a timi thawn vun khaikhuah a sile, a sim duhsan mi fiang deuh in kan thei thei.

            Curuangah Amah a finkhawmpi tu le Amaih lam tangtu kan si ding hi kan Bawipai hrangih thupi bik a si. A finkhawmpi lotu cu thenthektu le Amah dodaltu an si tinak khal a si mai.

            Tulai san Christian zumtu pawl ih umdaan kan vun thlir khal a sile, Kohhran tampi kan um ih, maih Kohhran sungtel silo pawl ih Jesuh hmin in, thil maksak an tuahmi pohpoh hi acknowledgement pek duh loin, tuini kan siarmi sungih Tirhthlah pawl vekin a va kham tla kan duh theu. Cuti vek thinlung kan nei hrih pang a si ahcun, tha teih kan ruahsal a cu. Kanmah in dodal lo sung cu, ziangso a poi lem? Thentheknak a tuahtu an silo ding hi a poimawh bikmi a si sawn. Mihrekkhat cu, mipi an hip theinak hmangin thentheknak suahpi deuhdeuh tu tla an tam hnuaihni ruangah cuvek pawl cu kan ralrin nasa an  tul ko. Cuti a silo ahcun, dodaltu an si lo sung cu Jesuh hmin ih thil tha an tuahmi pawl cu kan lungkimpi ding a si.

            Ahleicein, Tirhthlah pawl thawn direct a pehzom awmi kannih Catholic pawl hin, kan sungtel a silo mi zumtu unau dang pawl ih cangvaihnak le hnatha an tuanmi pawl siseh, thil maksak an tuahmi pawl siseh, va theihpisak ding kan nuar theu.

            Tirhthlah pawl thawn direct kan pehzomnak lawng tawk ti men in, kan zumnak thang sinsin ter ding le thlacam nun ih teimaknak kan neih cuanglo a si ahcun, cuih kan pehzom awknak men cun, in rundam thei lo ding timi kan fiang a tul.

            Kan zumnak hi a nungmi zumnak a si ding hi a thupi tuk. Tirhthlah pawl in, ziangruangah ramhuai an dawisuak theilo ti a sile, anmah lakah iksiknak le tohkham cuhawknak a tam ruangah le zumnak thawn thlacam nun an neih lo ruangah a si bik. Zumnak a mal tuknak hmun ah iksiknak le thatlonak dangdang thawn buainak a tam ih, Bawipai kutcak khal a lang thei lo.

            A netnak ih kan ralrin tulmi ah, Jesuh hmin ih thil maksak tuahtu zaten rundam an si cuanglo ding timi a si. Thuthen Ni ah, cuvek pawl kha “Ka lo thei lo, ka hnen ihsin tlan uh, nannih mitha lo pawl” ti’n ka ti ding tiih kan Bawipai tongmi tla theih hngilh hlah uh si (Mt 7:22-23).

            A thenthektu si loin, a finkhawmpi tu kan sinak thawn Bawipai lam tangtu si dingah kan zuam tlang cio pei!