Lamzin sialtu

Lamzin sialtu

Hngah caan Zarh linak, tlawngkai nihnih ni (Dec. 24, 2019)

Siarding: 2Samuel 7:1-5, 8- 12; Ps. 89:2-5, 27, 29; Lk. 1:67-79.

Tuisun kan siarmi thuthangttha cu Zachariah ih "Thangtthatnak hla a si.

  • Advent caan, hngahnak caan, ih ni netabik kan thleng thlang, Tui zaan lam cun Christmas ih boruak kan hmang thlang ding. Himi caan ahhin Messiah a rat ding thu ih hmaitlan thuthantu John ih thu le a pa Zachariah ih Pathian a thangtthatnak thu kan siar.
  • Messiah a ra suahnak ding hrangih lamin sialtu le tim a rak tuahtu ih suahnak kan siarnak thawngin tui kan neihmi caan tawite ah sualsirnak thawn kan thinlung lamzin rem ding ah in sawm.

 

  • Zachariah cu zumnak a rak neih lo ruangah a nupi Elizabeth ih fa a hrin tiangah ttong thei lo in a um, a aw laksak a rak si. Zumnak kan neihlo tikah kan thil ti theinak cu ramri a nei, hna kan ttuan thei lo, 
  • Pathian vancungmi ih simmi a rak zum lo ruangah a aw cu laksak a rak si nan tuahcun cui vancungmi ih simciami hmin, "John," timi a nemhnget sal ruangah a aw a ngah sal, a ttong thei sal. Kan zumnak ihsin a rah suakmi "thil ti theinak" a rawng lang. Cuticun Pathian thangtthatnak hla a sak.
  • Zachariah ih Pathian a thangtthatnak hla kan siar hlan te ah Mary ih Pathian a thangtthatnak hla kan hmu. Zacharia siseh Mary siseh, an pahnih in "Thiang Thlarau thawn an khat" ti a si.
  • Cuti a si ruangah himi "Thangtthatnak hla cu a mai sinak menmen ih sakmi si loin Thiangthlarau ih au-aw ti a lang ruangah "prophet ttongkam - prophecy" ti in an rel ttheu.
  • Prophet ttongkam kan ti tikah a tlangpi thu cun "a ra canglai ding mi rak simsungnak" ti in kan pom cio. Asinan a diktak ahcun "thil a thleng mi parah a sullam ziang a si ti kha Pathian ih tleunak thawn simnak" a si sawn. Tu ah John ih suahsemnak ah Zachariah cun Pathian ih hnattuan a hmu: "Pathian in a thukam a hngilh lo," ti le, "mi hmuahhmuah ih rundamnak thu" a hmu.

 

  • Himi "Thangtthatnak hla" hi tthenhnih in kan then thei.
  • A hmaisa sawn ahcun Zachariah in Pathian a thangtthatnak a si. Pathian ih tthatnak, a hleice in David hnen ih a thukam (2Sam 7:8-16), a minung pawl hrang ih a tuahmi thukam cu a hngilh sianglo ih rundamnak a pek nak ruangah, Pathian cu thangtthat a si.
  • Mipi ih an ruahsannak ahcun Israel ih ral hmuahhmuah cu a neh thluh ding ih Israel ram cu a dinsal ding ti in an ruat.
  • Cumi cu thei in Zachariah khal cun mipi thinlung a thoter ih "runtupa" in rat ding thu, David tesinfa ihsin Messiah a ra suah ding thu khal a phuang cih. Cumi pawl cun Pathian in a miphun a hngilh lo, a thukam a hngilh lo ti a langter.
  • Zachariah ih dinhmun in kan zoh a si le, an nupa in an tar hnu ih fa an neih tikah an ningzahnak le nautat tuarnak pawl cu Pathian in a theihpi ih a hlihsak thluh. Cucu Pathian ih thluasuah laksawng a si ti a theih ruangah Pathian a thangtthat a si.

 

  • A tthen hnihnak ahcun Zachariah cu Pathian a thangtthatnak ihsin a fapa John lam ah a her ih Pathian ih rundamnak khuakhan ah John in ziangvek dinhmun in a um ding ti in sim fiang. 
  • Zachariah ih fapa cu a mai bulpak fapa si nawn loin mi zapi hrangih "ralrinnak aw-au," "lamzin khihhmuhtu" ah a cang. "Man lo ih nan ngah mi kha man lo in va pe uh. (Mt. 10:8)" Pathian ih pekmi laksawng cu Pathian hnenih pekmi laksawng ah a cang.
  • A fapa John cu Messiah ih ratnak hrangih timtuahtu, lam sialtu Prophet ti in kan hmu. A suahthlak ihsin a nun in Pathian a rian ringring.
  • Messiah a rat hlanah prophet Elias a ra hmaisa ding ti cu Israel mipi ih ruah dan a si. Tu ah Mal 3:1 ih a rak simcia vekin lamzin sialtu a si ding thu cu a phuang. Cuticun prophet pawl ih simsungmi famkimtertu a si vek in Israel pawl ih ruahsannak khal a famkimter. Amah lawngte Israel pawl in John ah Prophet Elias a lang timi cu an rak ruat ban lo, an rak hmu ban lo (Mt. 17:12).

 

  • Prophet dinhmun ih a rel rero mi John cu lamsialtu dinhmun ah a thleng ih, lamsialtu dinhmun ihsin minung pawl an sual an sir ih an lung an thleng nak ding ah "sualsirnak" a rak au pi ding. Kan sualnak cu sendup in senrang khal sehla sualsir ih kan kir a si ahcun Pathian in ngaidamnak in pe ding, ziangah ti le Pathian cu mi zangfah thiamtu a si ruangah a si. Cui ngaidamnak cu kan rundamnak a si.
  • Lamzin a sial lai ih a hmuitin pakhat cu "remdaihnak" a si. Remdaihnak kan ti tikah "ral" a cem tinak a si cuang lo. Cui remdaihnak cu tthansonak, himnak, hnangamnak tivek phunkim thawn a khat mi a si.
  • Kan Bawipa Jesuh cu thihnak ihsin a thawhsal hnu ah hmaisabik ih a ttong mi cu "remdaihnak" a si (Lk. 24:36). John ih lamzin a sial mi cu Pathian le minung lakih remdaihnak siseh, minung le minung lakih remdaihnak siseh a kop cih thluh. Sualsirnak in remdaihnak ah in hruai ih "thawhsal nun," "rundamnak nun" ah in thlengter a si.
  • Kannih Christian pawl khal cu John vekin Prophet kan si thluh a ttul. Pathian hmai ah dingfel ih kan nunnak thawngin kan nunnak cu "Thuthangttha a phuangmi nun" kan siter ding ih thimnak sungih a ummi pawl cu tleunak, nunnak le remdaihnak a simi Jesuh hnenah kan hruai thei ding a si.

 

  • Pathian ih hrangah lamzin sialtu si zuam aw.

 

Add new comment

6 + 7 =