Lazarus le Milian pa (sim tu Rev. Fr. Dominic Hnin), March 4, 2021.

Lazarus le Milianpa - na neih hlawnthil a hman ttangkai tum aw

Thuthangtha sim tu Rev. Fr. Dominic Hnin

Ulh caan, Zarh hnihnak tlawngkai nili ni (March 04, 2021)

Siarding: Jer 17:5-10; Ps. 1:1-4, 6; Lk 16:19-31

• Tuisun kan siarmi Thuthangttha cu kan theih ringring mi a si ding tiah ka zum, mi farah pa Lazarus le Milianpa ih thuanthu a si.

• Cangantu Luke cun kan Bawipa Jesuh ih milian pawl le mi farah pawl parih a neihmi thinlung cu pholangh a duh. Cu lawng si loin milianpa le mi farah Lazarus ih dinhmun - leilung parih nunuamtu in sanleh ah harsat tongin, leilung parih harsat tongtu in sanleh ah nuamnak a ngah - ti ih an dinhmun linglet thluh tiang ih a thlengawkter nak in Bawipa ih thuzirhmi, "hmunrawn ih a thuzirh" ti ih theih tlangpimi, (Lk 6:20-21, 24-25) cu a fiangter. Cui hmunrawn thuzirhnak ahcun "mi farah pawl cu mi thluasuak nan si, Pathian uknak cu nan ta a si! a tu ih rilrawng pawl cu mi thluasuak nan si, nan khopkham leh ding; a tu lai ih mitthli a tla mi pawl cu mi thluasuak nan si, nan lungawi in nan hni leh ding; Atu ih milian pawl cu zangfakza nan si, nunnuam nan comi a cem zo! atu khopkham pawl cu mi zangfakza nan si, rilrawng in nan vakvai leh ding;atu ih hni rero pawl cu zangfakza nan si, nan ttap nan ai leh ding" ti in kan hmu.

• Himi ah Bawipa in milian le mifarah pawl mawhthluk ciamconak ti siloin kan hlawnthil neihmi le kan lennak pawl a hmandan kan thiam ding a duh ruangah a si sawn.

• Kan Bible sungah milianpa cu hmin tarlang a silo, mifarahpa lawng a hmin tarlang a si ih Lazarus ti a si. Lazarus ih farah dan langtertu ding ah "a pumpuluk ih hma in a khat" a ti ih hleiah cui a hman cu Uico in an ra liak ttheu ti a si. Cun, amah te hman feh thei lo a si ih ruangah milianpa ih rawl ttilfuan sar ding ah ''an rak hruai'' ti a si. Himi ttongfang pawl in Lazarus cu ziang tluk ih ngaihsak ttul a si ti an langter.

• Milianpa lehthung cu a lentuktaak ah a hnipuan khal "man khungbik hnipuan" a hruk, "a rawl ei khal a thaw bik a ei" ti a si.

• Milianpa in a sangka kiang ih a ra ringringtu mifarah Lazarus a rak ti siat ciamco nak hmuh ding a um lo. A ngaihsaklo top a si men.

• Kan Bawipa in "Thutthennak netabik" thu a rel lai ah, "mi nautabik parih nan tuahmi cu ka parah nan tuah a si ih, nan bawm duhlo kha keimah in bawm duhlo a si. (Mt 25:31-46)" a ti. Milianpa in Lazarus a rak ngaihsaklo kha amah Bawipa ngaihsaklo a rak si.

• Milai an sivek in an pahnih in thihnak lamzin cu an zawh veve. Asinan, Lazarus cu a thih tikah "vancungmi pawl in Abraham ih kiang ah an hruai" ii, milian pa cu "an phum, cule Hell sungah a tla" ti a si. Lazarus ih hrang ahcun "hramthoknak'' a si thlang nan, milianpa hrang ahcun 'a cem thluh' a si thlang.

• Milianpa cu a neihnak le a lennak in Abraham ih hnen thleng dingah a dawnkham a silo, a neihnak le a lennak kha dikte ih a rak hman ttangkailo ruangah a si sawn. Cangantu Luke cun "Leilungtlun ih sumsaw hmangin rualpi tuah uh, ziangah tile leilung thilri a cem tikah kumkhua a hmunmi inn ah luhter nan si ding (Lk 16:9)" tiah ralrinnak a rak pe zo. Cumi cu milianpa in hnaset a rak tun.

• Milianpa cu a thlennak hmun ah harsat a tuar tikah mangbang vansang in tlunlam a hawn zoh tikah Abraham kiang ah Lazarus a to a hmu. Cutikah Abraham ih hnenah "Lazarus in ka dangah tidai forkhat te in ii rawn forh seh" tiah bawnak a hawn dil. A rak bawm dahlo mi Lazarus cu tidai forkhat forh dingah a dil. Milianpa in mifarah pa ih hmin tla a rak thei ti a lang. A hnaset a rak tun, Lazarus ih um le umlo khal a theilo sihmang kan ti mi kha tu ahcun "a thei ko nan ziangah a rak siarlo'' ti a lang.

• Lazarus in tidai forkhat khal a hei pek theilo thu cu Abraham in a simfiang tikah milianpa cun a unau pawl ralrinnak va pe dingin a dil. Himi ah milianpa in "midang kha poi a rak salo hmang" timi cunt u ahcun amai unau le sungkhat hrang ahcun hraphriatnak ''thinlung a nei,'' ti a lang.

• Milianpa in Abraham cu "ka pa" ti ah a ko. Asinan, lei tisa dan in Abraham ih tesinfa a si men thei, hmanseh, a thlarau nun ahcun Abraham ih tesinfa a si banlo. Aw le kam lawngih "ka pa" ti cu san a tlailo. Thlarau lamah Abraham ih tesinfa rak si sehla cu nunnuamnak a co ve ding.

•  

• Abraham cun milianpa ih dilnak cu Lazarus ih ai-ah a el sak thluh. Pehtlaihnak um theilo daan thu khal a sim. Milianpa cun a inn lam, a sungkhat unau pawl cu a seherh lai thotho. Curuangah Lazarus kha thihnak ihsin a tho ih a va sim ahcun a thu an lung ding ti ah a ti. Asinan, a caan a tlai tuk zo. Moses le Prophet pawl an um a ti.

• Kan Bible in ''Moses le Prophet pawl'' a ti tikah anmah minung Moses le Prophet pawl a rel duhmi hnakin "Thukham hlun, Bible hlun" a rel duhmi a si sawn ttheu.

• Bawipa cun, ''Moses ih daan le prophet ih canganmi pawl cu baptisma petu John san tiang hrang lawngah a si. Cuih hnu cun Pathian uknak Thuthangttha cu phuan a si. (Lk 16:16) a ti. Curuangah himi Bible hlun cu Bawipa Jesuh ih ratnak ding, Vancung uknak hrangih timtuahnak a rak si vek in, "Bible hlun a ngailotu, daan thu le prophet thu a thlunlotu"  pawl hrang ahcun "thawhsalnak" khalin an thinlung a thlengter cuang lo ding.

• Himi thu le hla a thei nacing ih a ngailotu pawl hrang khal ahcun ''thawhsalnak'' hi a ttangkai lo ding.

• Prophet Jeremiah (Jer 17:5, 7) cun "Bawipa in, milai a rinsantu, milai cahnak men a rinsantu cu Keimah in ka hnong ding; Keimah i rinsantu cu tluasuah ka pe ding." a ti.

• Curuangah Bawipa rinsan awla, na neih na hlawnthil le na lennak pawl cu, kumkhua nunnak na ngahnak ding hrangah dawnkhamtu siloin a lo bawmtu si theinak dingah hman ttangkai thiam tum aw.