Leilung Ṭha Bang Thinlung

“Leilung Ṭha Bang Thinlung” (sim tu - Rev. Fr. Peter Zin) July 24, 2020 (Ninga ni)

“Leilung Ṭha Bang Thinlung” (sim tu - Rev. Fr. Peter Zin) July 24, 2020 (Ninga ni)

Bawi Khrih ah duhdawtmi nu le pa, u le nau pawl, Bawipa ih pek mi hnangam daihnak cu nan zate hnenah um hram seh. Tuni 2020 July 24 (Tlawngkai ninga) ni ih kan siar ding mi Gospel thawn pehpar in “Leilung Ṭha Bang Thinlung” timi thulu thawn thlarau thazaang kan lak tlang cio ding in ka lo sawm duh. Kan siar ding mi Thuthangṭha cu:-

Matthai 13:18-23  

18. Curuangah hi thlaici vorh tahṭhimnak ih tican hi ngai uhla thei uh. 

19. Lamzin tluan ih a tlami thlaici pawl cu vancung Uknak thu a thei nain a tican a thei thei lotu pawl an si. An thinlung sungih tuhmi kha Miṭha lo pa in a laksaksal a si. 

20. Lungsedaap lakih a tlami thlaici cu vancung Uknak thu an theih ve tein lungawi zet in a pomtu an si. 

21. Lungawi zet in an pom nain an sungah thukpi a pil lo ih rei an daih lo. An pommi thu ruangah harsatnak le hremnak a ra thlen tikah an letsal lohli. 

22. Hlingbur lakih a tlami thlaici pawl cu vancung Uknak thu a thei nain hi leilungtlun nunnak thuhla ah donhar ih a ummi pawl an si. Sum le saw an duhnak in cuih thu cu a tuam ih rah an nei thei lo. 

23. Leilung ṭha ih a tlami thlaici pawl cu vancung Uknak thu a hna in a thei ih a tican tla a theithiamtu pawl an si. Annih cun rah an nei ih a ṭhen cu a let zakhat, a ṭhen cu a let sawmruk, a ṭhen cu a let sawmthum tiang an rah a si,” tiah a sim.

 

        Himi  Bawi Jesuh in Vancung Uknak thawn pehpar in a sim mi tahṭhimnak ah thlaici vorhtu pa ih a vorh mi cu a bang aw ṭheh mi thlaici a si. Asinan rah ṭha an rah le rah le rah lo cu khui tawk hmun ah an tlak timi thawn a saing mi a si. Cuvek thotho in Pathian ih ṭongkan tla cu kan zate par ah a bang aw in a tla ih rah ṭha a rah le rah lo cu kan thinlung thawn a saing ve a si. Tuni kan thei mi tahṭhimnak kan zoh a si le a tlangpi in kan thinlung hi phunli in kan ṭhen thei ih, cumi phunli sungah kan nih teh khui mi vek bik kan si pei timi khal cu a tharin ruat tlang sal uh si. 

A pakhatnak thinlung cu ziangthawn a bang ti si le lamzin tluan thawn a bang a ti. Lamzin cu kan thei vek in mi ih fehnak miih pal ringring mi a si tikah a leilung cu a hak zet ih thlaici cu a sungah a lut thei lo. Lamzin vek thinlung cu mi lungruh zet, mi puarthau zet pawl ih thinlung vek hi a si. Milungruh pawl cun Pathian ih ṭongkam cu an thei nan an thinlung sangka an ong duh lo ruang ah Pathian ih ṭongkam a si mi thlaici cu an sungah a lut thei lo a si. 

A pahnihnak thinlung cu lungto a tamzet mi lei ram thawn a bang ih Leilung mal lai a tel ruangah thlaici cu a kheu thei ko. Asinan lungto a tamtam tuk ruang ah a hram a thuk thei lo ih ni a sa tik ah a ro cih, a thi cih lala. Himi pawl hi zo vek an si pei kan tile Jesuh na zum le cu rumdamnak na ngah ding, na harh dam ding, na lian ding, na hlawh tling ding ti vek in Jesuh zum le cu leitlun ah mah duh mi pohpoh a kim ṭheh dingin an ruat ih lungawi zet in Jesuh Khrih an cohlang, an cohlang hnu ah an ruah nak vek in an sinpi sal lo tikah zumnak an neih mi a hlo sal ṭheu. Cuvek pawl ih thinlung hi lei hnak in lungto a tam sawn mi lo ram vek a si.

A pathumnak thinlung cu hlingbur thawn a khat mi hmuan thawn a bang. Leilung khal cu a daih in a um ko ih thlaici khal cu ṭha te in a nung thei ko. Asinan hlingkung pawl in a huap tuk tik ah rah an rah thei ve lo. Zumlo tu pawl cu um hrih se la, Himi pathum sungah kan nih zumtu pawl hi a pathumnak ah tam pi kan tang ding tin ka ruat. Pathian ṭongkam a zum lo lawlaw le kan si lo, zum cu kan zum na in leitlun thilri duhnak ah siseh, leithlun hrangah lawng ruatin khuaruah harin kan umnak siseh, lei tisa duh nak nih in neh tuk ṭheu tik ah kan zumnak cu a nung rero ko na in rah a rah thei lo mi ah kan cang ṭheu a si.

A pali nak thinlung cu leilung, leiram ṭhavek asi. Thlaici cin nak ding ih leilung ṭha kan timi hi kan zoh tikah a leilung hi a nem ih a sungah thlici ṭha ten a lut thei. Cun thlaici a keuh tik ah a kung a hnaihnok thei tu ding pawl hi vat ṭheh, sial ṭheh a si. Kan thinlung khal cu leilung ṭhavek in, thlaici a lut thei dingin a nemmi si a ṭul a si. Thlaici a kheu tikah a hnaihnok thei tu ding pawl kha kan sial ringring ding khal a ṭul ding asi. Bawi Jesuh in ‘kei cu nun nem mi le tangdornak thinlung a nei mi ka si, ka hnen ihsin zir uh in ti. Bawi Jesuh hnen ihsin kan zir a si le thinlung nemnak, thinlung tangdornak kan nei thei ding. Cutik ah thlaici ṭha a simi Pathian ih ṭongkam cu kan thinlung sungah a lut thei ding ih, a let sawm thum, a let sawm ruk, a let zakhat tin rah a rah thei tu kan si ding a si.

Fr. Peter Lal Zin Thang (Hakha Diocese) 

Add new comment

6 + 8 =