Let Zakhat ih Rah Nei Tu Bawinu Maria

Rev. Fr. Lucas Sum ih thuthangtha sim mi (July 18, 2020)

Let Zakhat ih Rah Nei Tu Bawinu Maria

Thuthangtha ngai tu nan zaten, Pathian in, thlawsuah lo pe hram she. Zarh te ni cu Bawinu Maria ih ni a si, kan ti theu bangin, tuittum khal, Bawinu Maria ih thu, taawi ten, ruat tlang hrih uh si. Let zakhat ih a rah tu cu Bawinu Maria a si timi ruat khawm uh si.aria a si timi ruat khawm uh si.

    Zumtu kan zaten, (Matthai 5: 48) ih “Van ih nan Pa a famkim vek in, nan nih khal famkim ve uh," tiih, Bawi Jesuh ih in ti bangin, nikhat hnu nikhat, thlarau lam ih famkimnak a hawl mi lawnglawng kan si. Curuangah biakinn ah kan khawm, thuthangtha kan ngai, khuk bil in thlakan cam, tthen hra tthen khat le a hlu kan pe, mifarah kan bawm, ih tthat nak a phunphun kan tuah a si.

Bawi Jesuh ih thaici vorh tu ih tah tthimnak thu in sim mi, tawi ten, ngai ta hrih uh si. Matthai 13: 23 “Leilung tha ih a tla mi thlaici pawl cu Vancung Uknak thu an hna in an thei ih, a cohlang cu tu pawl an si. An nih cu rah an nei ih a then cu a let zakhat, a then cu a let sawm ruk, a then cu a let sawm thum tiang an rah a si, tiah  Jesuh in a sim.

Zumtu u le nau, kan ruah dingih kan duh mi cu, hmaisa ih kan sim zo vek in thlarau lamih famkim sinsin dingih zuam rero tu kan si. Asilolen mi tui kan Baibal ih ih sim vek in a let zakhat, a let sawm ruk, a let sawm thum tiang rah nei dingih zuam rero tu kan si. 

Asinan, leitlun ah hin a let zakhat ih rah thei tu kan um pei maw, timi hi ruat cio uh si. Kei cu ka piangthar a si, vanram cu ka ta a si, nangteh the n apian thar zo maw?, tiih a au rero tu pawl khi teh let ziat rah nei tu a si pei? Let sawm thum maw, let sawm ruk maw, asiloen let zakhat rah tu an si pei? Cun kan nih teh let ziat rah tu kan si pei? Ruat ciau uh si. 

Duhdawtmi u le nau, leitlun ah a let zakhat rah nei tu pakhat a um. Zo si pei? Cumi let zakhat rah tu cu Bawinu Mary a si. Cu ti asilen ziangruahah Bawinu Maria in a let zakhat tiang a rah thei? Cathiamthlim in ziangruangah Bawinu Maria in a let zatkhat a rah a si timi in sim.

Luka 1: 38 ah Pathian ih vancungmi Gabriel cu Bawinu Maria hnen ah a feh ih Jesuh a hrin ding thu a sim tikah Bawinu Maria in a thei fiang thei lo. A mang a bang. A khua ruah a har. A awlok a song. Asinan hi tin vancung mi cu a sawn: “Kei cu Bawipai salnu ka si. Na sim vek cun ka parah si ko seh, tiah a ti."

Zumtu u le nau, Bawinu Maria in vancung mi ih sim mi lolen Pathian kawhnak hi a thei fiang thei riai lo. Asinan, ziangkhal a silen len kei cu “Bawipa ih salnu ka si. Na sim vek in ka parah si ko seh” a ti mi te hi a ttha tuk. Hmual a nei tuk. A thuk tuk. Bawinu   Maria ih zumnak, tangdornak, duhdawtnak le hnattuan nak ka hmu thei.

First, himi fang te ah hin ziang ti tluk in Bawinu Mary in Pathian a zum, timi fiangten kan hmu thei. Ziangruangah a sitilen vancungmi ih sim mi a thei fiang lonan, ziangkhal a silen Pathian ih khuakhan mi a si si, a ti ih, a zum mei a si. 

Second, cun ziangti tluk in dangdornak a nei  a si, timi khal kan hmu thei. Ziangruanah tilen a mah le a mah “sal” din hmun ah a re aw mei a si. Ka Pathian kei cu na sal ka si. Rem na ti mi pohpoh ka par ah thleng ko seh, a ti ih, lungawi sopar ten Pathian ih kawhnak cu a mah le a mah sal din hmun ah re aw ta hrat in a cohlang mei a si.

Third, ziang titluk in Pathian a duh dawt a si timi khal a fiang zet a lang ter a si. Pathian a duhdawt ih ruangah a thei fiang lo mi khal a zum, Pathian fial mi khal sal a mah le a mah sal dinhmun tiangah re aw in a cohlang mei a si.

Fourth, Vancungmi ih a sim vek in Bawinu Mary cu leiltun ih a nun sung hmuahhmuah in Pathian a zum, a duhdawt, tangdor in a um, Pathian hna a ttuan a si.

Curuangah Bawi Nu Maria cu a let zakhat ih rah nei tu a si.

Zumtu u le nau, nan zaten Bawinu Maria ih thlacam sak nak in Pathian in zumnak, tangdornak, duhdawtnak le a hnatuan thei nak tlawh suah lo pe hram she. 

Bawinu Maria ih thlacamsak nak in Pathian in a let sawm thum, a let sawmruk, a let zakhat tiangih rah thei dingin tlawh suah lo pe hram seh. Amen.