Lukaitu Nu le Pai Tuanvo (sim tu - Rev. Fr. Polycarp Thawngte)

Lukaitu Nu le Pai Tuanvo

Sim tu - Rev. Fr. Polycarp Thawngte (Zarhkel (25) nak, Zarhpi ni)

          Kan dungzarh ah Baptism dil thu ah upa cun amah rori, naute hrangah cun nu le pa in tuanvo la ih dil a si thu le cuih Baptism dil tikah thukam kan pekmi thu pawl kan rel zo.  Himi hnu ahcun nu le pa in hi thukamnak an famkim ter theinak dingah lukaitu ih bom a tulzia thusuhnak thawn kan zoh sal ding.  Upa Baptism tuahih thusuhnak cu:

1.     “Lukaitu, hinu/pa hi tuini ah Baptism ngah ding a tlak ti’n Pathian hmaiah na hmu maw?” “Atlak tin ka hmu.” 

2.     “Nangmai na tohkhan mi hinu/pa kha Khrih dung atlunnak/ariannak ah ka in si seh, ziaza in siseh bawm vivo dingin na timtuah aw maw?” “Aw” ti’n tuanvo lak a si.

Cuhnu ah Puithiam in Baptism ngahtu ding hrangah hitin thla a cam sak: “Zangfah-lainat nak neitu Bawipa Pathian, hi na siahhlawh ruangah lungawithu kan lo sim. Ahnen ih aphunphun in na phuanawknak kha hawlhmusuak in tuini ah na kawhnak Pawlpi hmaiah a sang zo.  Curuangah na duhdawtnak thawn khua na khan vekin anetnak tiang lungawisopar te’n a feh suak theinak dingah na zaangfah-lainatnak thawn kilkhawi ringring hram aw.” Cutheh in

3.     “Pathian tongkamthianghlim upatnakah kanlakah telve dingin Biakinn sungah ra lut aw” ti’n Puithiam in a hruai lut ih Cathianghlim siarnak peh a si.

          Cun, naute Baptism tuahih lukaitu thusuhnak cu: “Hi naute parih nu le pa in tuanvo an neihmi tuan bawm dingah timtuah aw in na um maw?” ti a si.  Cule lukaitu in “ka um a si” tiah kan dung zarh ih kan relzo mi nu le pai tuanvo pawl kha naute parih famkim theinak dingin bom ding a si. Naute lukai cu himi pakhat lawng suhnak a um. Himi theh cun Puithiam in “Duhdawtmi fanu/pa, hi pawlpi sungtel pawlin lungawisopar ten an lo hmuak zo a si.  Anmai hmin in thinglamtah ahmat tuah tahrat in Rundamtu Jesuh Khrih neitu a siahhlawh fanu/pa na si zo ti’n thu ka than a si.” Himi zawnih ka ruah theu mi cu Pawlpi sungtel mipi hin Puithiam cannak puai ih Bishop in ‘hi candidate cu Puithiam si dingah kan hril zo a si’ a ti tikah mi zapi in lungawi zet in za kan beng tlang vekin hi naute hrangah tuahve tlak a si lo maw?  Cutikah Pawlpi zapi hmai-ah naute Baptism pek ding timi hin sullam a nei sinsin in ka hmu.  Puithiam in himi thuthan/a au theh in naute ih cal parah thinglamtah a hmat tuah sak a si (a remcanle nu le pa le lukaitu pawl khal tuah theih).  Cumi thehin Cathianghlim ngai dingah nu le pa le lukaitu pawl sawm in caan hmanpeh a si.

          Himi thinglamtah a hmat tuah thu thawn pehpar aw in zir ding ka duhmi thuanthu tawi ka ron lo hlawm bet ding.  Veikhat lai ah Siangbawi-1 cu a Parish sung khawdang lamhla khawte lam ah khual a tlawngih naute Baptism a pe ti si.  Cule naute cal ah cun thinglamtah ahmat cu a von tuah tikah ‘ziahsaw naute cal cu a va nem lawmmam ve’ ti-ah mangbang in fiang te’n a zoh ih a nui hnawi/pawhte a rak si aw.  Hmaisong nikzak phah cun ‘sorry’ a von ti.  Cukhal naute nu cun Latin thlacamnak si hmang a ti-ih a rak ‘Amen’ ti si. Siangbawi thlen dah lemlonak ti cu daan tla an thei lemlo hleiah thlacamnak pawl khal an ttong hman a silo thawn thil silolo a cang theimi a si.  Hi thuanthu in thil tampi i zirh.

          1/ Siangbawi pawl hi a caancaan ah thlacamnak cauk zoh ngernger in ziang ka tuah ih ziang thla ka cam ti hman theih lo khop ih um kan si pang maw ka ti.  Hrekkhat cu zoh keukeu siri ah a silo zawngin kan siar ngah bet tivek hi a poi lawlaw. Thlacamnak le kan siar dingmi pawl aluat byheart ih kan ngah theilo hman ah thate-ih timtuah awk kan tul hrimhrim timi ralrin pekawknak thazang ka ngah. 

          2/ Naute nu le pawl Biakinn sung le Baptism caan ih nau kilkhawi thiam ding in zirh.  Ahrekkhat nu pawl hi nau zun in maw Baptism kan pek ti ding khop in Baptism pek laiah tla naute pawl zun kan thlau ter theu; cun pawhte/hnawi khal kan fawp ter theu.  Ziang, nau an tap hnuhnu cu lem a tul si, sim theih le an si fawnlo tla kan ti men thei.  Lumbang Parish ih nupi-1 ih nau kilkhawi daan zir tlang ka duhmi ka ron lo hlawm hrih ding.  Nau unau-3 kan nei thlangih vei-1 hman khawm in hnaihnok ih leng kan suak ti a um dahlo in ti.  Ka mang a bang lam ih ziangtin a tap tla tap lo maw; nau ngam tuk nan nei maw, ziangtin na zohkhen tin ka sut.  Pathian thluasuah, mi hnakih nau duhnung an nei ciamco khal si cuanglo ding.  A nu ih i sim daan ah cu zing thawh ihsin hnawi pe lo in Biakinn a fehpi ih Biakinn ah hnawi a pek tikah khawm sungah zianghman hnaihnok lo in a it-that men in ti.  Kan khawm caan hi a tlangpi thu in nazi 1-2 karlak a si mai ih a cang thei tukmi a si.  Sinan, zing tlaipi pi ih khawmnak hmun hrangah cun hivek cekci ih tuah ding cu a si thiamlo ding, Lumbang Parish cu Zarhpi ni khal thaithawh ei hlanah an khawm theu ih a tha zet.  Rel duhmi cu Lumbang Parish sungah khal nu le dang hrekkhat pawl cu khawm hnaihnok zet tu kan um thotho. Curuangah kanmah lam in ruah thiamnak thawn timtuah awk a tul timi sawn a si.  Baptism lak siseh, khawm siseh, in hnaihnok tuk lo dingin naute ziang tin kan kil ding? 

          Cun, himi thinglamtah ahmat tuah/tacik khen hi upa Baptism ah cun a tel lo; ziangruangahtile Confirmation pek cih theih a si ruangah Confirmation hi cal parah Thianghlimsahriak thawn thinglamtah tacik khen a si. 

          A reltu le a ngaitu kan zate parah kan tuahmi le kan thlacammi ziang a si tihi theih duhnak le theih zuamnak thlasuah a thar in thleng hram seh!