Lungawi Thiam Nun” (Sim tu - Rev. Fr. Lucas Sum)

Lungawi Thiam Nun”

Sim tu - Rev. Fr. Lucas Sum

October 3, 2020

Zumtu u le nau,

Pathian in thlawsuah lo pe hram she, tiah nan hrangah thla ca ka cam. Tui ttum ah, Sawm Sarih le Pahnih Lungawi in Jesuh hnenah an Kir, timi thu tawi ten kan ruat tlang pei uh.

Hmai sa ah Baibal kan ngai hrih pei. Luka: Bung 10; cang 17 in 20 tiang: Sawm sarih le pahnih thlah mi pawl cu lungawi zetin an ra kir sal ih, “Bawipa, na hmin in ramhuai pawl kan dawi tikah kan thu an ngai a si,” tiah an ti.

    Cu tik ah Jesuh in, “Nimthlakau bangin vancung ihsin Satan a tlak kha ka hmu. Ngai uh. Huham neihnak ka lo pek hai; rul le tur nei varngen pawl parah nan feh thei ding; ral neh theinak huham khal ka lo pe ih zianghman in a lo tuah mawh thei lo ding. Sikhalsehla thlarau thalo in, nan thu an ngai ruangah nan lungawi hlah uh; nan hmin vancung ih ngan cia a si ruangah nan lungawi sawn uh,” tiah a ti.

    Zumtu u le nau, mi tui kan ngai mi baibal sung ihsin kan hrangih a thupi mi, pahnih in ruat khawm tlang uh si. A Pakhatnak ah: Sawm sarih le pahnih thlah mi pawl cu lungawi zetin an ra kir sal ih, “Bawipa, na hmin in ramhuai pawl kan dawi tikah kan thu an ngai a si,” tiah an ti, timi te hi kan ruat tlang pei. Bawi Jesuh in a thuthangttha sim dingin le khuavang dawi dingin, a mah tlun tu, milai sawm sarih le pahnih a thlah si. Hi zumtu sawm sarih le pahnih cu Jesuh ih hmin in thuthangttha an sim ih khuavang khal tampi an dawi. Jesuh-ih hmin ih khuavang an dawi thei tik ah an mang a bang. Cu tikah, ee, hitivek ih khuavang kan dawi thei hi Jesuh ih thlawsuah in pek ruangah a si, ti an thei tik ah a lung a awi tuk. Curuangah an zaten an kir sal ih Jesuh hnen ah lungawi thu a va sim a si.

    Zum tu u le nau, dungthlun tu pawl ih Jesuh hnenah kir ta hrat ih, “Bawipa, nah min in khuavang kan dawi thei a si,” tiih lungawi thu an va sim mi te hi a ttha tuk, kan cawn hirmhrim ding mi pakhat a si. Kan nunnak ttha tei kan ruah rero a si len nitin rori in Pathian in thluasuah in pe a si. Thluasuah kan ngah mi bang aw lo hman sehla Pathian hnen ihsin laksawng kan ngah lo “ni” a um dah lo. Thlawsuah ngah lo in nikhat te hman a liam dah kel lo. Tahtthimnak ah tui thuthngttha kan ngai thei rero khal hi Pathian ih thlawsuah sunglawi pakhat a si. Zumtu u le nau, dungthlun tu sawm sarih le pahnih ih Jesuh hnenih thlawsuah an co mi parih lungawi thu an va sim vek in kan nih khal Pathian hnen ihsin thlawsuah tampi kan co ve ih ruangah kan nih khal Pathian ih hnenah nitin in lungawi thu sim ve cio uh si.

    Cun a pa hnih nak ah; a dung thlun tu sawm sarih le pahnih pawl hnen ah hi tin Jesuh in a sim bet, “khuavang pawl in, nan thu an ngai ruangah nan lungawi hlah uh; vancung ih nan hmin ngan cia a si ruangah nan lungawi sawn uh,” tiah a ti. Himi kan ruah tikah ziangmi kan hmu thei? Hi leitlun ih fimnak, thiamnak, tthatnak  kan neih mi le thil ti theinak thlawsuah kan ngah mi pawl hnak ih a thupi sawn mi thil a um lai tinak a si. Cumi cu ziang a si? “Vancungih nan hmin ngan cia a si ruangah nan lungawi sawn uh, tiah Jesuh ih a ti mi te khi a si. A tawi zawngih kan sim a silen hi leitlun ih kan nunnak hnak in kan thlarau nunnak a thu pi sawn, tinak a si.

• Zumtu u le nau, Pathian in nan zaten mah vek nan umnak ciar ah van thlawsuah le lei thlawsuah lo pe hram seh. 

• Pathian hnenih lungawi thu a sim thei ringring tu, si thei dingin Pathian in nan zaten  thlawsuah lo pe hram she. Amen.