Mah Hnatuan Tuan (sim tu Rev. Fr. Peter Zin) May 22, 2021

“Mah Hnaṭuan Ṭuan”

Thuthangtha sim tu Rev. Fr. Peter Lal Zin Thang

May 22, 2021

Siarding: Tirh. 28: 16-20, 30-31; Saam 11: 4, 5, 7(7); Jn 21: 20-25.

          RVA Falam Service in Thuthangṭha ngai in thlarau thazaang a laktu Bawi Khrih ah duhdawtmi nu le pa, u le nau pawl, nan um nak cio ah Bawipa in a lo um pi ringring cio hai hram seh. Harsatnak a tong rero tu pawl Bawipa in tuar theinak thazaang siseh, a rei hlan ah nan harsatnak in lo luatnak siseh a lo pek hram sehla ning hang riahsia in a um mi pawl Bawipa in a lo hnem hai hram seh. Tuni ah midang kha va zoh tuk ruang ih mah hi hnaṭuan pelh tu siloin mah hnaṭuan cio kha ṭha deuh in a ṭuan thei tu kan si theinak dingin mal lai kan ruat tlang dingin ka lo sawm duh. A hmaisa ah tuni kan siar ding mi Gospel siarnak kan nei ta hrih pei.   

Johan 21:20-25

          Piter cu a her ih a dunglam ah Jesuh ih a duhdawtmi dungthluntu kha a hmu. Hi dungthluntu pa cu rawl an ei lai ah Jesuh a hei naih ih, “Bawipa, a lo zuartu ding cu zoso a si?” tiih a suttu kha a si. Piter in cupa kha a hmuh tikah, “Bawipa, hi pa hi teh ziangti in so a si ding?” tiah Jesuh cu a sut. Jesuh in, “Ka rat tiang nung dingih ka duhmi a si ahcun na hrangah ziangso a poinak a um? I thlun sawn aw!” tiah a ti. Curuangah hi dungthluntu cu a thi lo ding tiah Jesuh ih dungthluntu pawl lakah thu a thang. Sikhalsehla Jesuh in a thi lo ding, a timi a si lo: “Ka rat tiang nung dingih ka duhmi a si ahcun na hrangah ziangso a poinak a um?” a timi a si. Hi dungthluntu cu hi thu pawl a simtu le a ngantu khal a si; cule a simmi cu a dik a si, ti kan thei. Jesuh ih a tuahmi thil dang tampi a um hrih. Pakhat hnu pakhat ngan vivo sehla nganmi cabu pawl cu leilung pumpi hmanah hin a tlem cawk lo ding tiah ka ruat. (Bawipa ih Thuthangṭha a si.)

          A tu kan siar mi Gospel hi Johan nganmi Gospel ih a cem netnak a si ih himi sung in Bawipa in Piter hnen ih “I thlun sawn aw!” a timi ṭongkam te thawn pehpar in thu ruat tlang uh si. Mani kan siar mi Gospel Johan 21:15-19 sungah Bawi Jesuh in Piter hnen ah, “Johan fapa Simon, hi midang pawl ih in duhdawt hnakin  nang in i duhdaw sawn maw?” tiah veithum  tiang a sutnak kan hmu thei. Piter khal in “ka lo duhdawt, ka lo duhdawt cu na thei ko,” tiah a let. Bawi Jesuh khal in a tuu pawl kilkhawi dingin le cawm dingin ṭuanvo a pek ih cuhnuah Piter in ziang tivek harsatnak le thihnak a tuar ding ti thu khal a rak sim cia. Cuhnuah Piter cu a her ih a dunglam ah Jesuh ih a duhdawtmi dungthluntu kha a hmu a ti. A duhdawtmi a dungthluntu a timi cu Johan hi a si. Bawi Jesuh in Piter kha hnaṭuan a pek ih a tuarnak ding le a thihnak ding thu a sim tikah Piter in Johan kha khihhmuh in, “Bawipa, hi pa hi teh ziangti in so a si ding?” tiah Jesuh cu a sut. Bawi Jesuh in, “Ka rat tiang nung dingih ka duhmi a si ahcun na hrangah ziangso a poinak a um? I thlun sawn aw!” tiah a ti. 

          Bawi Jesuh in ‘I thlun sawn aw’ a timi hi fiang deuh in kan sim ding a si le: midang ziang an tuah ding, ziang an cang ding ti kha nang mah thawn a saing lo na tuah ding mi kha tuah sawn aw, na tuah ding mi cu keimah i thlun ding hi a si tiin a ti. Hitawkah kan hmu thei mi cu midang ziang an cang ding, ziang an tuah ṭul tikvek hnak in keimah in ziang ka tuah ding ti kha thupi deuh in kan ruat ding ah kan Bawipa in a duh ti kan hmu thei. Midang kha ruahnak ṭha pek ih tuah ding va sim tivek le ziangtin an cang pei aw tivek ruat hi thil ṭha zet a si ko. Asinan mah hnaṭuan ṭuan dingmi, mahtuah dingmi kha a pakhatnak ah kan ret ding cu a thupi zet a si. Thuṭhimnak ah Bawi Jesuh a thei lo tu pawl hell ah an tlak ṭheh pei maw? Pawl dang pawl vanram an kai pei maw? asilole khawm a zaangzel deuh mi, Pathian lam ah kan mah hnak in a zuam thei lo mi pawl vanram ah an kai ve pei maw? tivek pawl ah hi buai tuk ding kan siloih kan Bawipa in ziang tuah dingah in duh, khui tin ka nung seh la a duh timi sawn hi thupi sawn ah ret ding kan si. An nih in cu mi, kha mi tuah ding ansinan an tuah lo tivek hnak in keimah tuah ding mi ka tuah maw, ka tuah thei mi ka tuah maw, ziang si ka tuah thei ding timi lam sawn hi a pakhatnak ah ruat in tuah le ṭuan ding sawn kan si.

          Cun Pathian in khal cu mah hnaṭuan kha mah ti thei tawk in a ṭhabik in a ṭuan tu pawl kha thluasuah a pek ih a hmang duh sawn a si tihi kan zaten ka thei le kan hmu ṭheu cio ko ding. Duhdawt mi nu le pa, u le nau pawl, Bawipa ih thluasuah pek mi le hman mi kan si cio theinak dingin mah ih hnaṭuan, mah ih tuah thei mi te kha a ṭha bik in a tuah thei tu kan si ringring thei nak ding in Pathian hnen  thazaang dil in zuam cio uh si.

Fr. Peter Lal Zin Thang (Hakha Diocese)