Mahlemah Cekawk a Thupi

RVA a ngaitu duhdawtmi nu le pa, u le nau pawl, kan Bawipa Jesuh Khrih ih zangfahnak, Pa Pathian ih duhdawtnak le Thiangthlarau ih pawlkomnak cu nan zate hnenah um hram seh tiah, hmaisabik ah cibai ka run lo buk hai a si.

Tui ni kan siarmi Cathianghlim sungih Pathian tongkam thawngin ‘Mahlemah cekawk a thupi’ timi thulu thawn hlawmawknak ka run nei ding.

Pathian in milai in sersiam tikah pumsa le thlarau thawn kopih sersiam mi kan si. Cule, Pathian hmuihmel a kengtu taktak cu kan thlarau a si. Pumsa le thlarau thawn tuahmi kan si tikah kan sungah pumsa duhnak le thlarau duhnak ti’n duhnak pahnih a um. Cumi duhnak phun hnih cu tuini a voi khatnak ih kan siarmi Rom 7:18-25 sungah Paul in, kan sungih hna a tuantu daan pahnih ti’n a ko. Pumsa duhnak cu mirang tong cun ‘instinct’ kan ti ih tisa hiarnak ti’n khal kan ti thei. Thlarau duhnak sawn cu kan ruahnak hmangin kan thinlung sungah hna a tuan. Tisa hiarnak timi cu ramsa pawl khal in an nei nan, thlarau duhnak cu milai lawngih neih theih a si. Curuangah milai le ramsa kan bangawk lo nak a si.

Satanpa in milai siatsuah a rak duh tikah, tisa hiarnak hmangin sual a rak sawm. Ziangruangah tile Pathian hmuihmel kengtu kan thlarau duhnak lam zawngin a neh thei hrimhrim lo. Milai khal cun, thlarau duhnak hnakin tisa hiarnak a rak thlun tikah sualnak sungah a rak tla tariai. Milai sual sungih a tlak tikah, a sungah buainak a khat. Ningzahnak a ra lut ih phuhrungawknak thilrit in a nen. Pathian thawn siseh, mahlemah siseh, kiang le kap thawn siseh, zalen zet ih nun a theih nawn lo. Himi cu tuisun ni tiang thlarau duhnak thlun thei lo ih tisa hiarnak lawng kan thlun tikih milai pawl ih kan ton theu mi thil a si.

Tuini Bible voikhat siarnak sungih Paul ih buainak khal thlarau duhnak (thinlung muril duhnak) le pumsa duhnak lak ih tal rero mi buainak a si. Ka thinlung muril cun thiltha tuah a duh nan a thalo mi thil lawnglawng ka tuah ngah pang theu a ti. Hi tongkam te in milai kan nun khawsaknak ah kan thlarau duhnak hnakin kan tisa hiarnak in in hruai thei theu ti in zirh a si. Zalen zet ih nun khua sak thei ding cun, tisa hiarnak daan sungih sin kan luat a tul. Paul cun Jesuh Khrih thawn lawng in kan luat thei a ti.

Tuini Gospel thuthangtha kan siarmi Lk 12:54-59 sungah Jesuh Khrih in mipi pawl hnenah ‘Ni khua that ding le siat ding hmuah theithiam sirih, ziangruangah tui san thu umdaan nan theihthiam lo; ziangruangah so thil tha tuah dingih nan thinlung nan botcat thei lo?’ ti’n a rak mawhthluk. Kan Bawipa ih a ti duhmi taktak cu, rundamnak pe dingah a ra ko nan, acuih rundamnak co dingah cun, an mah le mah an cekawk ih an nun an thleng a tul tinak a si.

Paul khal amah le mah a cekawk lawngah a sunglam ih thlarau duhnak le tisa duhnak umtuzia a vun hmu fiang. Cumi lawng tawk lo in, tisa duhnak neh thei dingah kan Bawipa Jesuh Khrih a zum ih a rinsan a si. Ziangruangah tile, Jesuh Khrih lo cun, tisa hiarnak neh le nunthleng a theih lo timi a thei fiang.

“Thlengawk a cu zo! Thlengawk a cu zo!” timi tongkam te kan kiang le kan kap ih an au rero kan thei theu. Asinain, thlengawknak um taktak ding cun, kanmah le kanmah kan cekawk ta a tul. Khui tawk fang te ah thlengawk kan tul ti kan theih fiang lo cun, thatnak lam ih thlengawk hi a har. Curuangah mahlemah cekawk hi a hmaisabik ih kan tuah tul mi a si.

Duhdawtmi lu le pa u le nau pawl, ni khat hnu ni khat thatnak lam ih thlengaw thei dingah mah le mah kan cekawk ringring a tul. Cule, kan hngilh lo ding mi ah, Jesuh Krih tel lo cun, ziang tik hmanah thatnak lam kan pan thei lo ding.

A ngaitu nan zaten, ni khat hnu ni khat thatnak lamih thlengaw thei dingin Pathian in a thar in thluasuahnak lo pe hram seh! Amen.