Menmen Caan hi “Menmen” Asi Lo (Rev. Fr. Polycarp Thawngte), January 19, 2021.

Menmen Caan hi “Menmen” Asi Lo
Thuthangtha sim tu Rev. Fr. :Polycarp Thawngte

Caankel Zarh-2, Ni-2nk, January 18, 2021.

Siarding: Heb 6:20-20; Mk 2:23-28                

           Fr. Mangte in mani-tihni Zarhpini-ah, “Menmen Caan, Zarhpi voi-2nk a si” tin in sim thei zo.  Cucun kan dung Zarhpini-ih Christmas Tikcu-caan a cemnak le Menmen Caan hram thawhnak a simi Bawipai Baptism ni sunglawi kan hman zo nak hi in von mang ter cio ding.  Ordinary Time timi hi kawltong ih an leh tik khalah (...) tui kan ti vek ‘Menmen Caan/ Menmen Zarh’ ti-ih kan leh ding hi a awm zet. Asinan, tuini ah himi ruahnak in rak thleng saktu Fr. Dominic Thawm ih “Caankel, Zarhkel (lole) Caantluang, Zarhtluang” ti-ih Nitin Saamhla Cabu sungih in lehsak mi te hmang thei sehla; RVA hin khuiti deuh in kan hmang tluan ding tihi in nemhnget sehla tihi saduh ka that.  Ziangruangah tile kan dung Zarhpi ih Bawipai Baptism laknak thu kan siarhnu, tlawngkai ni-1 ihsin thokin nitin kan siarmi Thuthangtha hi Bawipan mipi lakih rundamnak hnatuan a tuannak thu lawnglawng asi; Thuthangtha a phuannak, Dungthluntu pawl a kawhnak le mangbangza phunphun a tuahnak tivekpawl an si-ih kan siar peh vivo lai ding.  Tuini kan siarmi Thuthangtha sungah Zarhpini hmanah cawl huahhi men lo in sangvut lo sungin an feh ih an rilrawn tuk ah a dungthluntu pawl in sanvut vui an zuut phah thu kan thei asi. 

            Kan dung lai Zarhpi vei-1 kan khawm theh tikah ka ril a rawng nawn fawn ih a khawmmi pawl tla nan ril rawng awm tuk, rawl ei hlan khawm le kan ti-ih kan khawm tiak a tlai tuk fawn ka rak ti. A khawmtu lak sungin in rak lehnak pakhat te in keimah riangri i ning zak ter.  Ziang in ti tile, “Fr. Kei cu Zarhpi-ni hi rawl ka ulh ni a si sawn e” ti asi.  Ahrekkhat hrangah cun, kan senlai bangin sungkua kimteih rawl ei tlang caan, rawl thawthaw ei caan hi Zarhpini a rak si theu.  Cukhal cu Bawipai hnenih kan lungawinak kan langter thei ahcun a tha zet ko. Siangbawi ka si hnu khalah rawlei ruangih khawm tlai tum caan a rak um phah lai thiam theu ka von mang bet. Zarhpini hi Siangbawi le Saya pawl hrangah hnatuan pi bik ih ruah tlak a si ve ti khal cu hmun hrekkhat (mipi tamnak hmun) ah cun fiang ten kan hmu thei. Curuangah Siangbawi pawl hrangah Tlawngkai ni-1 hi colhni ah an rak hmang sawn asi. Tulai kan boruak ah cun hmutin ah Siangbawi pawl hin teimak ih Zarhpini hna kan tuan ding caan a ra thleng tin ka ruat. Minung letek ih khawm a si tikah, nazi tem te in khawm rero thei ding ruah tlak ve a si.

           Tulai boruak/natsia ruangah Biakinn lamih kan khawm thiamlo, khawm theihlo tivek pawl hi kan nunnak ih Menmen Caan/ Caankel ah von ruat hnik uh si. Biakinn lamih kan khawm le puai kan tuah pawl hi cu Pathian thawn kan naihdeuh awknak Caan Sunglawi ti’n kan ruat thei ko. Biaknak Tikcu-caan ih Caan-cuangce (Advantu, Christmas, Lent, Pascha) kan hman vek an si kan ti hnik pei.  Cumi lakah Menmen Caan/Caankel hi menmen a rak si lo ti hi kan von mang kei uh.  Hi Caankel sungah Bawipa in rundamnak hnatuan picang zetzet, mipi lakih a rak tuannak thu pawl kan theih bangin kannih khal in mipi lakih rundamnak hnatuan kan tuan caan, caan sunglawi a si tin ruat thiam ve uh si. Biakinn lamih khawm le kan thlacam caan pawlhi caan sunglawi, caan cuangce, Pathian thawn kan biakawk caan an si-ih cumi cun Caan menmen ih a minung pawl thawi kan biakawknak ding thazaang in ngah tertu ding asi a thupi.  Tulai kan san hin a tul tuk cuang ruangah kan dung 2000 kum hrawngin Pope St. Jn Paul II in, Bawipai Baptism ihsi thok in rundamnak hnatuan picang zetzet pawl kha Tleunak Thuthuk pa-5 tin in ron tuah sak cu lungawi za a si. Himi thuthuk hin Biaknak Caankel kan hman daan a sunglawi ter in ka hmu.

          Tuini vei-1 Cathianghlim siarnak Heb 6:10-20 sungta thawn netabik ih thazaang lak tlaang ka duh. ‘10Pathian in mi a thleidang lo. Nan hnaṭuanmi siseh, Pathian nan duhdawtnak langter tahratin nan Khristian rualpi pawl nan rak bomnak le atu khalah nan bom reronak pawl hi siseh, Pathian in a ciing ringring ding. 11Nan beiseimi cu a kim suak theinak dingah a net tiangin taimak suah fingfing uh, tihi kan saduhthah tum bik a si. 12Mi zaangzel nan si ding cu kan duh lo; sikhalsehla Pathian ih in kam ciami a cotu si dingah zumnak a neitu le thinsaunak neitu pawl bangtuk ih cang dingah kan lo duhsak a si.

           Biaknak Caankel, Menmen-caan bangih ruah theih, ‘Stay at Home le Quarantine’ innum le kharhkhum-awknak hin kan rundamnak hnatuan lamah in zaangzel ter lo dingin kan zate parah ralrin-nak thluasuah Bawipa’n in pe hram seh. Pa le, Fapa le, Thiang Thlarau hmin in. Amen.