Messiah rahtu thingkung (sim tu Rev. Fr. Dominic Hnin), December 17, 2020.

Messiah rahtu thingkung

Thuthangtha sim tu Rev. Fr. Dominic Hnin

Hngah caan Zarh thumnak, tlawngkai nili ni (December 17, 2020)

Siarding: Gen 49:2, 8- 10; Ps. 72:1-4, 7-8, 17; Mt. 1:1-17.

• Hmaisa kan siarmi Bible, Semtirnak sungah Jacob in a fa le pawl Ro a cahnak thu kan hmu ih cumi sung ihsin Judah cu thlawsuah a peknak kan hmu. Judah hi Jacob ih fapa upabik asilo na'n Judah ih u le pawl cu an nuncan le lungput ruangah an pa Jacob ih thlawsuah an dong lo. (Gen. 34-35). Thlawsuah dontu a fa le pawl lakih upabik Judah cun a pa Jacob ih tohkham a rawn co lan ih cuticun Jacob ih tesinfa khal cu Judah hrinhnam in a fehlan vivo.

• Tuisun kan siarmi ah Judah cu a unau pawl ih lawmh a si ding thu kan hmu. Cun Judah cu Kiosa thawn a tahtthim ih Judah ih huham le cahnak cu a rak pholang cia. Mipum siarnak ahcun "Israel miphun cu a cakzetmi Kiosa vek a si (Num 23:24; 24:9) " a ti. Cui cahnak cu Israel asimi Jacob ihsin a fapa Judah ah a luang suk. Judah ih cahnak le huham neihnak cu David Siangpahrang ah a rawng langsar bik. Curuangah Judah hrinhnam ihsin Siangpahrang le Bawi a rawng suak ding a ti. Cule David ah a cawl men lo ih a feh hrih.

• San thuanthu kan zoh thlun vivo a si le, cui Siangpahrang cu David ih tesinfa sung ihsin, Bethlehem ih a rawng suaktu Jesuh asi ti-in kan hmu ding. Jesuh cu minung taktak a si ih Pathian ih thianhlimnak cu kannih minung pawl hnenah in rawn phurh Pathian ih fale sinak in coter a si.

•  

• Jesuh ih rawng suahnak thu cu a tawi zawng in tuisun ih Thuthangttha ah kan siar. Tuisun kan siarmi Thuthangttha ah Jesuh ih ra suahkehnak hrinhram thu kan hmu ih siarhar e ngaihar kan ti caan a tam zet men thei. Asinan himi hrinhram thu in Jesuh cu zo a si ti felfai te in a sim fiang.

• A hramthok ihsin "Amah cu Abraham ih cithlah David ih tesinfa ihsin a si" tiah David ih hrinhnam a si thu a nemhnget cih lohli. Cuisin San cu a von siar vivo ih hleili voithum in a siar.

• (1) Hmaisabik hleili cu Ruth 4:18-22 le 1Chronicle 1:34 - 2:15 pawl cu sirhsan in Abraham ihsin David tiangah san hleili a rel.

• (2) Cun a voihnihnak ah 1Chronicle 3:1-16 cu a sirhsan ih David ih fapa Solomon ihsin Jehoiakhin tiangah san hleili a rel. Asinan, minung hleili si dingah mi hrek khat cu a ngan tello, a kan men.

• (3) A voithumnak ah Jehoiakhin ih fapa Shealtiel ihsin Jesuh tiangah san hleili in a rel. Hi minung hleili pawl cu sirhsan fumfe a um lo. A hmaisabik pathum pawl cu Bible ah an hmin a lang nan a dang pawl cu aw le kam ih thucah awkmi thuanthu sungih sin a ngan bet. Cui tlunah minung hleithum lawng an bang ih a hleilinak cu amah Jesuh a si ti-in a ra lang.

•  

• A voihnihnak hleili sungah Abijah ih fa cu Asa a si, kan Lai Bible khalah Asa a si ve. Asinan, Bible hrekkhat ahcun Asa siloin Asaph ti in hmuh a si. Cun Manasseh ih fa cu Amon a si nan Bible hrekkhat ahcun Amos ti ih ngan a si. Kan Lai Bible ahcun Amon ti in a um.

• Asaph cu Psalm hlasak thiam a si ih Amos cu Prohet a si. Psalm hlasakthiam le Prophet an sinak cun Bible hlun cu a huap thluh ruangah Jesuh cu Bible hlun ih famkimnak timi a langter.

• Himi pawl kan zoh tikah mihrek cu siar tel lo-in a kan men ih, mihrek cu hmundang ah hmuh ding a um lo leh thung. Cun netabik nak cu Mary a tel lawngah hleili a kim in kan hmu ding. Cangantu in a hrelh pang le a theihsual silo-in a nganhrim mi an si.

•  

• Jesuh ih pupa le pawl a sansan ih a ngannak thawngin Jesuh ih hrinhnam thuanthu fumfe a ngan ti theih a si ko na-in, cangantu ih duhdaan vek in "hleili'' hlir in voithum ih tthen a duhnak ah le cuti-ih hleili kim dingih kanmi le betmi a neihnak kan zoh tikah thuanthu diktak hnakin Jesuh ih sinak langter ding kha thupi in a ruat sawn ti in kan hmu thei.

• Hitivek ih san hleili hlir ih tthenthum in a siarnak hi Bible thiam pawl ih ruah daan ah duhsan a nei bet. Cumi cu David cu thupibik ih a ret ruangah a si an ti.

• David ih hmin cu Hebrew cafangkom ih ngan a si tikah DWD ti ih ngan a si. Cule Hebrew cafang pawl cu nambat le man an neih tikah D cu 4 a si ih W cu paruk a si. Curuangah D+W+D cu 4+6+4 ti a si ih 14 a ngah. Tiduhsan cu himi hrinhnam pawl a ngan tikah David thawn lo-theih-lo in pehtlaihnak a nei ter. Cucu Jesuh cu David ih tesinfa a si ti langter duh ruangah a si.

•  

• Gen 18:18, sungah "Amah (Abraham) ah miphun hmuahhmuah cu thluasuah an si ding" ti ih thu kam a um bang in Gen 22:18 khalah, "na tesinfa hnenah mi hmuahmuah in thluasuah an hawl ding." ti a si. Cumi ruangah cangantu in ''David ih fapa, Abraham ih fapa'' ti in a hramthok ihsin a ti tikah Jesuh cu Siangpahrang hrin sungin a suak ti a langter ih hleiah thluasuahnak ih cerhtiput a si thu a langter.

•  

• Jesuh cu David ih fapa a si ruangah Siangahrang hrinhnam a si ih Abraham ih fapa a si ruangah thluasuahnak ih cirhtiput a si. Bible ih famkimnak Messiah a si.

• Nang le kei cu tu-ah Messiah ih rat ding hngakhlap in kan um ih tiim kan tuah aw rero. Na hngahhlapnak le na ruahsannak pawl famkim tertu ding cu midang a si lo. San thuanthu ih theihpimi, Bible famkim tertu, Bawipa a si.

• Judah miphun pawl in Messiah an rak hngak rero na-in a rat tikah an rak thei thiam lo, an rak hngak ngah lo. Ziangah ti le an mai duhzawng le an mai ruahdaan ih rat ter an duh ii an rak hngak. Cuvek silo dingin ral rin a ttul.

• Kawl pawl in "အသီးလုိခ်င္ရင္ အပင္ဆီသြားပါ" - "a rah na duh le a kung umnak ah feh aw" an ti.

• Messiah na hngah rero laiah hngak sual lo dingin le hngah man nei ding in, na hngahmi ih suahkehnak thei aw, na zummi hi thei tum aw.

• "Messiah a hmuak ngahtu si hram aw" ti ah duhsaknak ka lo hlan.