Mi aa phun thum (sim tu - Rev. Fr. David Mangte)

“Mi-aa phun 3”

Thuthangtha sim tu - Rev. Fr. David Mangte

October 19, 2020 (Nikhat ni)

          RVA ihsin thuthangtha a rak ngaitu duhdawtmi nulepa ulenau pawl, nan zaten nan umnak hmun cio ah Bawipaih pekmi hnangam daihnak le pumsa thlarau thinlung harhdamnak in lo zeel hram seh tiah thlaza cam phah in cibai ka run lo buk hai a si.

          Tui tum cu tui ni October 19 ih Gospel kan siarmi Lk 12:13-21 sungih milian mi-aa pa ih thuhla sirhsan in “Mi-aa phun 3” timi thulu thawn hlawmawk nak run neih ka duh.

          Minung le minung “mi-aa” ti ih vun ti awk supso ding cu zo cio mawi kan ti lo ding. Mt. 5:22 sung kan zoh tik khal ah kan Bawipa in “mi-aa” ti ih ti awk ding a duh lo thu khal kan hmu thei. Ziangruangah tile, minung cun minung thinlung sung a hmu thei lo ih a mit ih a hmuh mi sirhsan men in thu a then mi a si tikah mi pakhat khat “mi-aa” ti ih va ko men ding a si lo. Asinain, ziang hmuahhmuah theitu, minung ih thinlung muril sung tiang a hmu depdep thluhtu, a ruahnak khal a thei ih a ka ihsin tongkam a suah hlan ihsin a thei cia tu le ziangruangah a tongsuak ti tiangih a thei thluh tu Pathian cun a sersiam mi minungpar ih thu a then tikah a pianzia zoh men ih then si lo in a sinak vek cekci in dik zet in a then sak ringring ih a duhduh in a ko thei. Cucu Pathian le minung ih kan bangawk lonak bik a si.

          Curuangah tui tum ah Pathian tongkam a simi Bible ih in sim mi mi-aa phun 3 thuhla sawn kan run tarlang ding mi a si.

          Hmaisabik kan hmuh mi mi-aa phun khat cu Saam 14 sungta a si ih an thinlung in Pathian a um lo titu pawl an si. Himi ih ti duh mi hi kan fiang a tul. Theihfiang lo ruangih biaknak dangdang ih um pawl a ti duh mi si lo in, an thinlung rori in Pathian a hnongtu pawl a ti duh mi a si. Curuangah khuahlan kan pipu pawl kan zoh tikah Sersiamtu Pathian an rak biak lo ruangah “mi-aa” an si kan ti thei lo; Sersiamtu an rak thei lo nan, anmah hnak ih huham nei mi pathian tete an um ti an rak pom ruangah khuavang pawl an rak biak nak sawn a si. Curuangah leitlun milai thuanthu kan zoh tikahmaih theih tawk ih Pathian hawl hlir deuh thaw kan si ih, Pathian a hnongtu mi-aa phun 1nak vek cu kan tam tuk lo. Asinain, mihrek cu mai fimnak rinsan in le mai saduhthah ih um duh men ih Pathian hnongtu tla an rak um ko. Cuvek pawl cu Pathian hmai ah mi-aa hlir an si.

          Mi-aa phun 2nak cu Thufim 14 sungah kan hmu thei ih hi pawl cu sualnak ziangih rel lo pawl le sualsir tum lo ih mi puarthau tong sup nei lo pawl an si. Hivek mi-aa cu Khrihfa zumtu lak khal ah kan tam vio ding zum a um. Ahleice in, tulai san minung pawl ih dinhmun kan zoh tikah sualnak ziangih rel lo kan tam vivo ih sualsir duhnak thinlung nei nawn lo mi kan karh sinsin. Maih duh zawng hlir ih nuntu khawsak duh kan tam vivo. Himi ruangah minung tampi in democracy ukawknak hman maih tisa duh zawngih fehpi lawnglawng kan tum. Hivek nuntu khawsak nak hi Pope St. John Paul cun thihnak lam ih in hruaitu “Culture of Death” ti’n a ko. Tahthimnak vun tarlang sehla: leitlun ih huham nei zet mi US ram ihsin thok in ram hrek khat ah democracy democracy kan ti ih zalennak zuan in Pathian ih duhlo mi pumsung fate thah thei nak le mipa le mipa, nunau le nunau thit awk theinak ding cozah daan tuah sak ding tiangin mipi in an aupi rero mi kan hmu thei. Maih duh zawng hlir ih um a duhtu pawl in “hi cu tuah lo ding, thil tha lo, sualnak a si” ti ih simtu pawl huat rero caan a thleng zo. Hivek lak khal ah Pawlpi cun raltha zet in sualnak cu sualnak a si vek in le thil thalo cu a thatlo vek ih a aupi rero tikah mipi duhnak zulh a duhtu leitlun media tampi khal in Pawlpi cu an hua ih a thatlonak tarlang ding hlir an bawh rero nak khal a si.Raltu khal a nei tam. Kanmah Catholic zumtu lak hman ah thil thalo sualnak hrial dingih Pawlpi ih in zirh mi thlun thei lo ruangah hi Kohhran cu daan a uar tuk ti’n Pawlpi lehlam a mawhthluk duh tu tla kan rak um theu. Aw rualduh, nang le kei teh sualnak ziang siar lo in kan um pang lai maw? Hi vek cu sualnak a si tuah lo ding ti ih in sim tu pawl teh kan hua pang lai maw? Cuvek kan si pang ahcun mi-aa phun 2nak ah kan tel ve ding si mai.

          Mi-aa phun 3nak pawl cu tui ni kan siarmi Gospel sungih milian pa vek thihnak hrangih zianghman timtuahnak nei lo’n leitlun pumsa hrang lawng ruat ih sumsaw thilri khawltu pawl an si. Zumtu Khrihfa pawl ih nun ah hi mi-aa phun 3nak lak ih tel hi a ol bik mi pakhat a si ti’n ka ruat. Mahlemah vun cek aw cio sehla tu rori ah ka nunnak lak si sehla khui tawk ka thleng ding timi thlarau hrang ruat ih cangvai tu kan mal ding zum a um nasa.

          Minung ticu thlarau lawng si lo in, pumsa thawn um mi kan si tik ah pumsa hrangah hnatuan le sumhawl cu kan tul ringring ko. Asinain, thlarau nei lo vek ih thlarau hrang ruat man lo tiangih lei tisa hrang hlir ih kan buai pang ahcun mi-aa kan si pang ding phan a um tuk. Ka sim theu mi tu ah ka run nolh sal dingih, kan tesinfa pawl nulepa in ro kan tan ding tikah thlarau hrang tiang ruat ih ro tan thulhna thiam lo’n lei tisa hrang lawng kan khawl sak ngah pang a si ahcun kan fale pawl hrangah buainak lawng a suak ter thei timi kan hngilh lo ding a thupi tuk. Tuini kan siarmi Gospel sungih milian mi-aa pa tahthimnak kan Bawipa in ziangruangah a sim timi kan vun zoh tik khal ah mi pakhat in a pa ih tanta mi rothil a upa thawn thensak dingih a dil ruangih a sim mi a si ti kan hmu fiang. “Nan rothil thensak ding ah zoso thu i pe?” ti’n kan Bawipa cun a rak ti men. Lei tisa hrang lawng buai kengkeng tu pawl kan Bawipa in a ngaihsak ve lo; anih ih in buaipi bik mi cu kan thlarau a si. Ziangtluk milian kan si hman ah kan nunnak taktak cu kan neihmi hlawnthil ah a um lo ti khal kan Bawipa in in zirh bet. Cui hlei ah, anmaih hrangah a lian zet nain Pathian mithmuh ih lian lo pawl cu hi milian mi-aa pa vek an si in ti bet.

          Curuangah thuthangtha a rak ngaitu duhdawtmi nulepa ulenau pawl, nitin kan nun ah Pathian mithmuh ih milian le mifim kan si ringring theinak dingin amah Pathian hnen ah thazang dil in zuam cio uh si!

Nan zaten Pathian in lo thluasuah hram seh! Amen.