Mi Khaisangtu Tangdornak (sim tu Rev. Fr. Dominic Hnin)

Mi Khaisangtu Tangdornak

Thuthangtha sim tu Rev. Fr. Dominic Hnin

Caantluang (31) nak, tlawngkai nihnih ni (November 03, 2020)

Siarding: Phili 2:5-11; Ps. 22:25-31; Lk 14:15-24

• Tuisun ih kan siarmi Bible hmaisabik Philipian 2:5-11 kan zoh a si le Bawipa Jesuh ih sinak cu hla thawn an saknak kan hmu. Sanbik ihsin niambik ah, cuisine sangbik ah ti a si. Tuahtu (Subject dinhmun) ih umtu hi hmaisa ah Khrih a si ih neta ah Pathian a si. 
• Kan Bible cun "Pathian sinak a rak nei nan" a ti. Khrih Jesuh cu hlan khan ihsin a rak umciami Pathian a si ti kan hmu. Minung ttongkam hmandaan ah "a rak si nan" ti vawn ruah ahcun Jesuh cu tu-ahcun Pathian si nawnlo vek a bang. Bible ih rel duhmi sawn cu "Jesuh in minung hrangih amah le amah a pum pekawknak le a sinak sunsak tuklo ih minung sinak a laknak langter dignah a si. A sangbik ihsin a niambik "sal" ah a ttum.
• "Hnenum, Sal sinak a la" timi ah Bible hlun sungah "Pathian ih siahhlawh cun harsatnak a tuar ih cuihnu ah nehnak a co, sunlawinak a co (Is 52:13-53:12)" ti kan hmu. Himi Siahhlawh cu sualnak neilo a si ko na-in a mipi pawl ih sualnak ruangah amah le amah sual ngaidamnak hrang thawinak ah pe-aw-in, a mipi pawl cu lungkhen cawhnak, hremnak ihsin a run ti a si. Himi thu cu kan Bawipa Jesuh ah a rawng famkim.
•  
• Adam le Khrih cu sinak bangaw vek in an lang nan, neta ahcun kahralaw in kan hmu. Khrih cu Pathian vek a si ih Adam khal cu Pathian ih hmuihmel cuang ih sersiammi a si: "Pathian in amai hmuihmel vekin milai cu a sersiam (Gen 1:26-27)" a ti.
• Wisdom 2:23-24 ahcun "For God formed man to be imperishable; the image of his own nature he made him. But by the envy of the devil, death entered the world and they who are in his possession experience it. - Pathian in milai cu siatral theilo dingin a mai hmuihmel in a tuah. Asinan khuavang ih nahsiknak ruangah thihnak cu leitlun ah a lut ih a maita pawl in an tong a si." a ti.
• Bawipa Jesuh cu Pathian vek a sinak ruangah thihnak in a nehlo. Milai khal cu thihnak ih nehlo ding a rak sinan milai hmaisabik Adam cun Satan ih bun a rak lun ruangah thih thiam mi ah a tla sia. Setan cun "Nan ei a si le nan ei ni-ah nan mit a vang dingih amah Pathian vek in a ttha le a sia theihthiamnak nan nei ding" (Gen 3:5) a ti. Adam cun a zum ih a rak ei ruangah Eden hmuan ihsin dawisuak an rak si.
• Cutiih Adam ih tlaksiatnak ihsin minung pawl rundamnak pesal dingah Bawipa Jesuh cu asinak diktak, Pathian a sinak, cu tanta in leilungmi ah a rawng cang.
• Adam cu Eden hmuan sungah hnangam zet in a rak um lawk nan, rulpi ih bunnak cu a rak lun ruangah sualnak ih sal ah a rawng cang. Pathian in, amai hmuihmel cuang ih a tuahmi minung cu a zang a fah tuk tikah run kir sal a duh ii cuticun a sangbik, a sunglawibik sinak cu tanta in a ziam le a ttawt theimi dinhmun, sal dinhmun a simi milai sinak la in a ttum. Thihnak tiang tuar in Pa Pathian ih thu ngai in a um. Midang hrang zawnruahnak le tangdornak ruangah a si.
• Hi ti ih Pathian rori kanmah minung hrangih "a thil tuahmi" cu Paul in Philipian pawl hnen ih a theihter duh bik mi a si.
• Paul cun "thinglamtah par ih thihnak tiang in" ti ah a ti. Hlan laiah 'thinglamtah' ticu an sal duhlo mi a si. Ziangah tile 'thinglamtah' cu ningzahnak le sualnak ih hmuihmel kengtu a si. Asinan Paul ih hrang ahcun thinglamtah cu hmuihmel tthalo keng lo in 'Pathian ih sunlawinak hmuihmel' a keng: "rundam lai rero mi kannih hrang ahcun Pathian ih cahnak hmual a si (1Cor 1:18)" a ti.
• Himi tiangah "tuahtu - subject" dinhmun ah Jesuh kan hmu. Amah le amah tangdornak thinlung thawi a um thu a si, amai pa lung ih 'tangdornak" a neih thu a si. Cui tangdornak cu kanmah minung hrangah a si.
•  
• Jesuh in amai palung ih 'tangdornak le zawnruahnak' a neih mi cu Pa Pathian in a co hlang ih ruangah a khai sang.
• Himi thil cang hi Philipian pawl ih hrangah cawn tlak a si thu le tthathnemnak tampi a neih ruangah Paul in fumfe zet ih a sim sawngnak a si: ''tangdornak thinlung nei pawl cu khaisang an si ding."
• 1Thesse 4:13-18 ahcun "Bawipa a zum ii a thi tu pawl cu an thosal ding" ti a si vekin Philipian pawl khal Bawipa ii ratsal caan ah an thosal ve ding tiah ruahsannak an neih theinak dingah Paul in Philipian pawl cu "Pathian hman simaw minung ah cang ih tang a dor" tiah, "tangdornak thinlung nei dingin," a sawm hai.
•  
• Himi ruangah Pa Pathian cun Jesuh cu hmin hmuahhmuah lakih hmin sunglawibik a pek. Mi hmuahhmuah in "Jesuh" timi hmin an theih cun ''khukbilnak" thawn upatnak an pe ding. Himi 'khuk bilnak' hi "Jesuh cu Bawi a si" ti an pomnak ih langnak a si. Hlan lai ihsin Prophet Isaiah ih a rak sim ciami pawl cu Jesuh ah a famkim ti a lang. Prophet Isaiah cun (Is 45:23) "Mi hmuahhmuah an ra ding ih ka hmai ah khuk an bil ding." a ti.
• Tuisun kan siarmi kan Bible cun, "vancung, leitlun le leihnuai" ti in a hmang. Himi ttongfang in boruak hmuahhmuah, tikcu le caan, khur le ram a huap tluh. "Bawipa Jesuh Khrih" timi hmin ih sunlawizia le ropitzia a langter sin.
•  
• Tuisun ah Jesuh ih Pathian sinak, a tangdornak le zawnruahnak pawl siseh, cuimi ruangah Pa Pathian ih a cawisannak pawl kan thei. Zianghman tuah theinak nei nawnlo "sal" dinhmun ih umhnu ah Pathian ih cangvaihnak thawngin "a sangbik" tiang khaisang a si.
•  
• Tu-ah Paul in Philipian pawl simphah in nang le kei hrang khalah in sim "Pathian ih khaisanmi si na duh asile nangmah le nangmah tangdor hmaisa aw."