Mi Lungawi Mari le Mi Lungawi Zumtu

Mi Lungawi Mari le Mi Lungawi Zumtu

Hmaisa ah Baibal catlang ngai hmai sa uh si. Luka 11; 27 - 28 tiang,

         “Jesuh in hi thu a sim ttheh tikah misenpi lakih nunau nu pakhat in Jesuh cu “a lo hring tu le a lo tuamhlawmtu nunau cu mi lungawi a va si so” tiah a hun ti. Jesuh cun “Pathian thu a thei ih a thluntu pawl cu mi lungawi an si sawn, tiah a ti.”

         Zumtu u le nau, hmaisa ah mitu ih kan ngai mi thu thawn peh par ah in “Bawinu Mari cu mi lungawi a si, timi thawi ten kan ruat pei. Bawinu Mari hi Baibal sungih lom a si nak thu pahnih in zoh hnik uh si. 

A pakhat nak ah: Bawi Jesuh hi leitlun ih a um lai ah mangbangza tampi a tuah; mina pawl a dam ter; khuavang a dawi; thuthangttha a sim. Cutikah mipi an mang a bang; an lung a awi. Cutik ah a hring tu a nu the ziangvek milai a si pei, timi hi theih an duh zet. I, mitui Baibal kan siar mi sungih kan thei vek in, miburpi lak ihsin nu nau nu pakhat cun Jesuh hnen ah, hi tin ring zet in Bawi Jesuh cu a sim, “a lo hring tu le a lo tuamhlawmtu nunau cu mi lungawi a va si so” tiah a ti. Zumtu u le nau, , kan zatei kan thei zo vek in, Jesuh hring tu le tuamhlawm tu cu, Bawi Nu Mari a si! Curuangah Bawi Nu Mari cu Jesuh hringtu le tuamhlawm tu a si ruangah mi lungawi a si, tinak a si. 

         Cun a pahnih nak ah: Himi nu nau nu ih Bawinu Mari a lom vek hin Elizabeth khal in Bawinu Mari a lawm ve. Cumi cu Luka 1; 41 - 42 sungah hitin kan hmu: “Mari ih ttongkam cu Elizabeth in a theih veten a pumsungih nau te cu a caang. Elizabeth cu Thlarau Thianghlim in a khat ih ringzet in, “Nang cu nunau hmuahhmuah lak ah thluasuak bik mi nunau na si,” a ti.

         Zumtu u le nau, Bawinu Mari hi lom tlak le thangtthat tlak hrimhrim a si, timi kan Baibal in fiangten in sim, tinak a si.

Cun Mi Lungawi Zumtu, timi thawi ten von zoh bet hrih uh si. 

Nu nau nu ih Jesuh hnen ih “a lo hring tu le a lo tuamhlawmtu nunau cu mi lungawi a va si so” a ti tikah Jesuh in hitin a sawn, “Pathian thu a thei ih a thluntu pawl cu mi lungawi an si sawn”, tiah Jesuh in a sawn. Leitlun ah hin Pathian thu thei tu tampi kan um. Asinan, Pathian thu kan theih men lawng hi a tawk maw? Thlawsuah conak a tlak maw? Asilolen, vancungram kainak a tlak maw? Timi pawl hi kan ruah ringring a ttul.

         Mi tu ih kan thei vek in, kan cathianghlim in hitin fiangten in sim: “Pathian thu a thei ih a thluntu pawl cu mi lungawi an si” a ti. Pathian thutheih lawng a tawk hrih lo. Kan theih vek in kan tuah le kan tlun a ttul tinak a si. Zumtu tampi ih kan hmabak bik mi cu mi tui kan sim mi, kan thei vek in tlun ding, timi te hi a si. Kan theih mi, kan tlun thei a si ah cun zumtu famkim kan si ding a si. Cuti asilen kan theih mi cu ziangtin kan tlun pei?

Mathai bung 25: cang 35-36 sungih Jesuh ih in sim bangin Mi rilrawng pawl rawl pek ding; tihal pawl, in ding tidai pek ding; thlen inn nei lo, mi khual pawl tlen nak pek ding, hnipuan ruak ding nei lo pawl hnipuan pek ding, mi naa le thawng tla pawl veh ding. A tawizawng ih kan sim a silen mi tla sam pawl bom ding, tinak a si. Hitivek ih mi tlasam pawl kan bom asilen Bawi Jesuh ih “Pathian thu a thei ih a thluntu pawl cu mi lungawi an si sawn, a timi ah kan cang thei ding a si.

Zumtu u le nau, Bawinu Mari ih thlacam saknak in, bom ttul mi tlasam pawl bawm thei tu si dingin Pathian in nan zaten thlawsuah lo pe hram seh. Amen.