Minung Thinlung Umtudaan le Hmuhsaknak

Minung Thinlung Umtudaan le Hmuhsaknak

Sim tu - Rev. Fr. David Kap Cin Mang

RVA ihsin thuthangtha a rak ngaitu duhdawtmi nulepa ulenau pawl, nan umnak hmun cio ah Bawipa in lo umpi in amaih pekmi hnangam daihnak in lo zeel hram seh tiah hmaisabik ah cibai ka run lo buk hai a si.

Tui tum cu tuini October 12 ih Gospel kan siar mi Lk 11:29-32 sungih kan Bawipa ih tongkam hmangin hlawmawknak kan run nei hrih ding a si.

“Tuih san minung hi an va tha lo so! Hmuhsaknak tuahsak ding an dil, sikhalsehla Jonah hmuhsaknak siar lo hmuhsaknak dang zianghman tuahsak an si lo ding” tiah kan Bawipa in Lk 11:29 sungah a sim. Himi Jonah hmuhsaknak a timi in ziang a duhsan timi cu Mt 12:40 sung kan zoh tikah a fiang: Jonah cu ngapi pum sungah ni thum le zan thum a um vek in kan Bawipa khal leilung sungah ni thum le zan thum phum a si ding a ti duhsannak a si.

Minung cu thlarau lawng silo in tisa thawn tuam mi kan si tikah sense timi hmuh theih tham theih thil thawngin kan ruahnak le kan theihnak kau ter vivo duh hlir kan si. Curuangah tui ni kan siarmi Gospel sungih kan Bawipa a fuuntu mipi pawl in hmuhsaknak an dil tikah mawhthluk ding an si lemlo ti’n ruah ding awm a si. Sihmansehla, kan Bawipa cun mi zeilo, mi tha lo an si ti’n a mawhthluk thotho. Ziangruangah a mawhthluk ti kan zoh tikah hmuhsaknak an dil men lawng silo in an zum duh lo ruangah a si deuh sawn. Hmuhsaknak an dil rero hi, kan Bawipa ih mangbangza dangdang a tuahmi an mit rori ih an hmuh lo hman ah an hna in an thei keukeu ko nan an zum duh lo ruangih dil men an si.

Kan Bawipa ih mangbangza tuah mi pawl kan zoh tikah mipi lam ihsin hmuhsaknak dil ruangih a tuah mi silo in, minung lam ihsin zumnak a um ruangah le a zangfahnak liolio ruang ih a tuah mi hlir an si sawn. A ngaingai ahcun kan Bawipa amah rori hi leitlun mi pawl hrangah Pathian ih hmuhsaknak tumbik in pek mi a si timi misenpi ih an rak theih ngah lo hi a poi zet. Curuangah amaih ruangpum thotho hi an hmuh dingmi hmuhsaknak ah a rak hmang.

Duhdawtmi nulepa ulenau pawl, kan Bawipa Jesuh Khrih hi leilungmi kan zate hrangih hmuhsaknak tumbik Pathian ih in pek mi a si zia tuini ah a thar in ruah khawm ka run lo sawm duh. Pathian in a fapa neihsun leilung tlun ih a run thlah hi minung thinlung umtudaan a hmuhfiang tuk ruangah a si. Jesuh Khrih in minung sinak a lak hlan sung cu Pathian hi mit ih hmuh theihlo a si vek in a hmel ziangvek a si ti khal zo hman in an theifiang lo. Curuangah Pathian lam in cun milai parih a duhdawtnak a hmun ringring nan minung lam ih duhdawtnak cu tu le tu a uai cingcing. Sinai tlang parih Moses ni 40 sung rori caan a hman tikah, tlang tang ih um misenpi pawl cu mit hmuh theih hruaitu an nei nawn lo tikah, sui in cawlem an tuah ih “Egypt ram ihsin a lo hruai suak tu nan Pathian cu hihi a si” tiah an ti ih an biak ti’n Ex 32 sungah fiang zet in kan hmu. Sui cawlem in ziangti vek zawng khal in Pathian hmuihmel a keng thei hrimhrim lo. Ziangahtile Pathian cu zo hman in an rak hmu dah fawn lo. Curuangah Pathian in amah hmuihmel kengtu tiih milem tuah a rak khamnak khal a si.

Pathian in Moses le Prophet pawl hmangin Israel mi pawl hrangah mangbangza tampi thawn hmuhsaknak a rak tuah sak ringring ko nan tuletu an dungtun ih milem tuah ih biak sawn an tum ringring thotho. Ziangah tile miphun dang pawl ih anmah te’n an tuahmi milem Pathian an biak kha an va dawh cu maw. Minung ticu maih biakmi Pathian khal mit hmuh theih a si ding le kan duh cio fawn.

Cumi a hmuh ruangah Pathian in amaih hmuihmel kengtu taktak a simi a Fapa neihsun leilung parah in run thlah sak ih amah thawngin a duhdawtnak a lang ter. Curuangah Paul in Khrih cu hmuh theih lomi Pathian ih hmuihmel langnak a si tiah Col 1:15 sungah fiang zet ih in sim.Minung thinlung umtuzia a theih tuk ruangah hmuh theih lo Pathian cu Khrih ah amah le amah lang tahrat in minung ih thinlung lak a duh. Asinain, cu khalah mi hrek khat cun rak cohlang duh lo in hmuhsaknak dang an rak dil lai thotho. Minung thinlung hi a va mak em.

Jesuh Khrih leipar a rat hnu cu Pathian a hmu duh tu in Khrih zoh ding a si mai; Pathian ih duhdawtnak a hmufiang duh tu in Khrih ah hawl ding si mai. A duhdawtnak cu Khrih ah famkim te’n a lang ter zo. Curuangah Jesuh Khrih leipar a rat hnu cun leilung mi pawl in Pathian hmuihmel kan hmuh ngah zo ruangah Jesuh Khrih ih zuk le lem tuah hi a thiang zo. Jesuh Khrih hmuihmel cuangmi zuk le lem pawl cu Khrihfa pawl hrangah cun a sunglawi tuk zo. Curuangah Catholic, Orthodox, Anglican le adang Christian zumtu tampi in kan biakinn ah Jesuh Khrih le amah thawn a pehtlaih awmi Nu Mary le Mithianghlim pawl ih zuk le lem pawl upat sunloih zet ih kan ret nak a si. Himi a theithiam lo tu Christian hrek khat pawl in Jesuh Khrih ih lem le Mithianghlim dangdang pawl ih lem upat sunloihnak kan pek tikah milem biak an si ti’n in rak soisel theu. Himi thianghlim zuk le lem pawl hnonnak hi Iconoclasm ti’n kan ko ih hlanlai ihsin a rak um zo mi a si. Curuangah AD. 787 kum ih Niciae khua ih a voi 2nak Council tuahmi ah hi thianghlim zuk le lem pawl hnon hi zumnak peng a si tiah an rak hrial zo. A ngaingai ahcun, Jesuh Khrih ih zuk le lem kan hmuh tikah Pathian ih duhdawtnak kan mitthlam ah a rung cuang a si. Cutivek thiamthiam in Nu Mary le Mithianghlim pawl ih zuk le lem kan hmuh tik khal ah Jesuh Khrih thawn an pehtlaihawknak thawngin an nun ih Pathian ih kutcak a langmi kha kan mitthlam ah a rung cuang ve. Cumi duhsannak ruangih an zuk le lem pawl hmuh ol dingih kan retnak san khal a si.

Sacrament kan timi pawl ih umtudaan khal sign timi hmuhsaknak thotho an si. Sacrament pawl cu mit ih hmuh theih le tham theih, a silole, hna ih theih theih mi thilri le tongkam pawl hmangin hmuh theihlo mi Pathian ih huham langnak an si. Kan Bawipa in minung ih thinlung umtudaan a theih tuk ruangah hmuh theih mi thil hmangin hmuh theih lo mi Thlarau Thianghlim ih hnatuannak a zumtu pawl hnen ih thleng ter dingah Sacrament pawl in rak tuahsak nak a si. Hi sacrament pawl thawngin Pathian in milai pawl ih nun ah mangbangza tampi a lang ter ringring. Sihmansehla, Pathian ih hmuhsaknak tumbik a simi Jesuh Khrih in a ruangpum thawn lei par a rak tlan len lai khal ah a zumtu pawl lawngin Pathian ih huham le kutcak an nun ih an rak hmuhngah suak vek in tui san khal ah a zum ngaingai tu pawl lawngin Sacrament timi hmuhsaknak thawngih Pathian ih a langter mi a huham le a kutcak kan hmungah ve a si.

A rak ngaitu nan zaten kan Bawipa ih hmuh theih thilri hmuhsaknak tha zet in tanta mi a Sacrament pawl hmangih in pek mi thluasuah pawl zumnak thawn a cohlang ih a hmufiang le a tep ngahtu si thei dingah le hmuhsaknak dangdang dil ringring mentu si lo dingah nan zumnak lo thang ter hram seh! Amen.