Misual Pawl Ko Dingah A Ra (sim tu Rev. Fr. Peter Zin), January 16, 2021.

 “Misual Pawl Ko Dingah A Ra”

Thuthangtha sim tu Rev. Fr. Peter Lal Zin Thang

Zarhkel Zarh (1) nak, Zarhte ni

Siarding: Hebru 4: 12 – 16; Saam 19: 8-10, 15; Marka 2:13-17.

“Mi harhdam pawl in sibawi an hai lo; a na mi lawng in an hai a si. Miding pawl ko dingah ka ra lo, misual pawl ko dingah ka ra a si,” 

          Thuthangṭha a ngaitu Bawi Khrih ah duhdawtmi nu le pa, u le nau pawl, nan zate hnen ah Bawipa ih pek mi hnangam daihnak um ringring hram seh. Tuni January 16, 2021 (Zarhte) ni ih kan siar ding mi Bible pawl hmangin thlarau thazaang kan lak tlang ding in ka lo sawm. Kan siar ding mi Bible pawl cu a veikhat siarnak ah Hebru 4: 12 – 16 tiang a si ih Pathain ih thu asilole Pathian ih ṭongkam ih a cah zia, a maksak zia le Jesuh cu Puithiam Sang a sinak thu pawl kan hmu thei. Saam kan siar ding mi cu Saam 19: 8-10, 15 a si ih hi nah khalah Pathian ih ṭongkam, Pathain ih daan pawl cu a dik, a ṭha ih a famkimnak thu pawl kan thei thei. Gospel kan siar dingmi cu Marka 2:13-17 tiang a si ih Bawi Jesuh in Levi asilole Matthai kha a dungthluntu si dingah a kawhnak thu asi.

Marka 2:13-17 ah Bawi Jesuh in Levi asilole Matthai a kawhnak thu cu hi tin a si, 

Bawi Jesuh cu Galilee Tilikap ah a va feh ih mi tampi cu a hnenah an ra. Bawi Jesuh khal in cu pawl kha thu a zirh hai. A feh phahah Jew miphun lak ah mi sual zet cazin ah an ret mi siahkhongtu, Alfias ih fapa Levi a zungkhan sungih a to kha a rak hmu. Cutikah Bawi Jesuh in, “I thlun aw,” a tiah Levi cu a ko ih Levi khal cu a tho ih a thlun cih ta. Cu hnuah Bawi Jesuh cu Levi inn ah a lengih rawl khal a ei. Siahkhong le misual tiih hnonmi midang tampi khal in Bawi Jesuh cu an thlun ih cupawl ṭhenkhat khal cu Bawi Jesuh le a dungthluntu pawl thawn rawl an rak ei tlang ve. Farasi mi Daanthiam hrekkhat pawl in Jesuh cu hibangtuk hnonmi misual le siahkhong pawl thawn rawl a ei kha an hmuh tikah a dungthluntu pawl hnenah, “Ziangah hivek misual pawl thawn rawl a ei tlang thiam?” tiah an ti. Cu tiin an ti mi Bawi Jesuh in a theih tikah, “Mi harhdam pawl in sibawi an hai lo; a na mi lawng in an hai a si. Miding pawl ko dingah ka ra lo, misual pawl ko dingah ka ra a si,” tiah an mah hrang ah siseh, kanmah hrang ah siseh a man nei zet mi, a sunglawi zet mi thuthangṭha a rak sim a si.

        Mifamkim lo hlir umnak hi leilung tlun ih kan tlan lennak ah pakhat le pakhat kan thei thiam aw thei nak ding ah, pakhat le pakhat kan bawm aw theinak ding ah himi Bawi Jesuh ih ṭongkam te hi a ṭul zet mi, a thupi zet mi le a man nei zet mi ṭongkam le, kan mang sal ringring a ṭulmi ṭongkam a si tiin kan hmu. Leitlun daan ah cu kan hnaṭuan pi tu ding, a thupi bikah ṭhansonak ding hrang pakhat khat kan tuah tikah in bawm tu ding hi a ṭhabik a famkim bik deuh hi kan hril duh deuh ṭheu. Company tivek ih hnaṭuan kan duh asi khal le boss pawl in a thimbik tikvek kha an hril ṭheu. Kan rualpi si ding ah khal siseh miṭha mifel deuh hi kan hril ṭheu. Nu le pa in kan fale pawl nun kan sim tik khal ah cu nu cu pa cu kom hlah miṭha lo a si tiah kan tiam aw ṭheu. A si, hi ti vekih kan ruahmi kan tuahmi pawl hi thil ṭha zet asi ko tin ka ruat. Miṭha mifel le mi ṭhangso mi kan si dingah cu miṭha mifel kha hawl in va kom ding, an mah thawn pawl kom ding hi thilṭha zet mi a si. 

        Asinan cu hnak ih a ṭha deuh mi thil a rak um lai. Cumicu tuni kan siarmi Bible thawn in kan Bawipa in in zirh asi. A tlangpi thu in misual tiah mi zapi ih hmuh mi pawl hi a hrial kan duh ṭheu. Bawi Jesuh san lai ah Siahkhawng tu pawl hi misual zet cazin ah a tel mi pawl an si ih an mah thawn rawl ei tlang, an mah thawn tlan leng tlang tivek hi an duh lo. An mah thawn kan ei kan in tlangih kan tlangleng tlang le mithiang lo ah kan cang ve ding tiah an ruat. Culakah Bawi Jesuh cu siahkhawngtu Levi kha a dungthluntu si dingah, a mah thawn hna ṭuan tlang tu dingah a ko ih a inn ah khal rawl a ei. Amah lawng siloin midang siahkhawngtu pawl khal an ra ih hmun khat ah rawl an ei tlang. Cu mi an hmu tikah Farasi pawl cu ‘ziangtin hivek in misual pawl thawn rawl an ei tlang thiam’ tiah an phun zai a si. Cutikah Bawi Jesuh in leitlun ih a ratnak san kha a sim hai, ‘Miding pawl ko dingah ka ra lo, misual pawl ko dingah ka ra a si,’ a ti.

        Bawi Jesuh in misual pawl hrangah ka ra a ti tikah misual kan sinak kha a duh mi si lo in kan zaten misual kan si tikha thei aw in sualsirnak thinlung nei in a mah hnen kan kir sal ding kha a duh sawn mi a si ti khal cu kan theih cia mi a si ko ding. Kan dam ringring a si ah cun sibawi ih a ṭulnak kan thei thei lo. Cuvek thotho in kanmah le kanmah misual ka si tiin kan thei aw lo a si ah cun Bawi Jesuh kan ṭul lo ti thawn a bang aw ve a si. Mah le mah misual ka si ti cohlang aw aw hi thinlung tangdornak nei nak a si ih kan rundamnak hrang ih a ṭul tengteng mi khal asi. Mah le mah misual ka si ti kan thei aw lawng ah midang pawl ih sualnak midang pawl ih thanaunak khal kan thei thiam sak thei dingih midang pawl kha sawisel lam silo in bawm duhnak thinlung khal kan nei  thei ding a si.

        Tuni ah thupi deuh ih ka sim duh mi te cu hmaisa ih kan sim mi vekin misual, miṭha lo tiah mipi in hmuhmi pawl kha hril in fel te in um kan zuam thei le thil ṭha pakhat a si. Asinan cu hnak in a ṭha sawn mi cu, misual deuh ih kan hmu mi pawl kha Bawi Jesuh in a pan hai ih lam ṭha lam hman ah a hruai vek in kan nih khal an mah kha va hrial lo in kan hruai sal thei ve a si le cu a ṭhabik mi a si.  Sualpi sungih a tang mi va run suak ding hi thil ṭha zet a si vek in a har khal a har zet mi a si ve ih kan mah hrang khal ah sualforhnak tumpi ah a cang thei ve a si. Bible vei khatnak kan siarmi sungah ‘kanmah vekin sualforhnak a phunphun a tong vemi a si; asinain anih cu a sual lo,’ tiah kan Bawipa khal cu sualforhnak a phunphun a tong ve nak thu in sim. Kan Bawipa khal cu misual lakah a tlangleng ruangah sualforhnak tampi a tong, asinan cuih sualforhnak pawl kha a neh ṭheh. 

        Anetnak ah a tawi zongin kan sim ding a si le, sualnak sungah kan tlak lo nak dingah misual dueh pawl kha kan hrial thei le a ṭha. Cuhnakin a ṭha sawn mi cu kan Bawipa vek in mih ih hnon mi pawl kha va pan in lam ṭha lam hman ah kan hruai thei a si le cu a ṭha sinsin mi asi. Cutin kan tuah tum tikah tukforhnak tampi a ra thleng dingih cumi pawl kan neh thei nak dingah cu nehnak a hmu zo tu kan Bawipa kha rinsan in a mah hnen ah thazaang dil in kan zuam ringring ṭul asi. Pathain in pakhat le pakhat kan bawm aw thei nak dingin thazaang thluasuah in pek cio hram seh.   

Fr. Peter Lal Zin Thang (Hakha Diocese)